Balopwe wa Bubidi 16:1-20
16 Mu mwaka wa 17 wa Peka mwanā Lemadia, Ahaza+ mwanā Yotama mulopwe wa Yuda wabikala.
2 Ahaza wadi na myaka 20 paabikele, wabikele myaka 16 mu Yelusalema. Kalongelepo byoloke ku meso a Yehova Leza wandi na mwalongēle mukulutuba wandi Davida.+
3 Ino wanangīle mu dishinda dya balopwe ba Isalela,+ wapityija’nka ne wandi mwana mu mudilo,+ walonda bilongwa bya munyanji bya mizo+ yapangilwe na Yehova ku meso a bene Isalela.
4 Kadi wadi ulambula nyeke bitapwa ne kufitula mwishi wa bitapwa pa mitenta,+ pa mikuna ne munshi mwa mityi yonso mivwambile.+
5 I mu kine kitatyi’kya kyakandile Lezina mulopwe wa Shidea ne Peka mwanā Lemadia, mulopwe wa Isalela, kulwa divita na Yelusalema.+ Batēkela Ahaza kasāla ino kebabwenyepo kukwata kibundi.
6 Mu kine kitatyi’kya Lezina mulopwe wa Shidea wajokeja Elate+ ku Edoma, kupwa wapinga Bayuda* mu Elate. Penepo bene Edoma batwela mu Elate, bashikata’mo kufika ne dyalelo.
7 Ebiya Ahaza watumina Tilate-Pilese+ mulopwe wa Ashidia mikendi, amba: “Ami ne mwingidi obe kadi ne obe mwana. Kanda umpandije ku makasa a mulopwe wa Shidea ne ku makasa a mulopwe wa Isalela, baiya kuntamba bulwi.”
8 Penepo Ahaza wayata ndalama ne olo yatenwe mu njibo ya Yehova ne mu bibīko bya byabulēme bya mu njibo* ya mulopwe, watumina’byo mulopwe wa Ashidia wamutyiba milomo.+
9 Mulopwe wa Ashidia waitabija byaamulombele, wakanda ku Damakasa wamukwata, waselela bantu bandi ku Kila+ bu misungi, waipaya ne Lezina mwine.+
10 Kupwa mulopwe Ahaza waketana na Tilate-Pilese mulopwe wa Ashidia ku Damakasa. Mulopwe Ahaza pa kumona kisōkelo kyadi mu Damakasa, watumina kitobo Udiya bupunga bwa kisōkelo’kya, bulombola mokikadile ne mokipungīlwe.+
11 Kitobo Udiya+ waubaka kisōkelo+ mungya bulombodi bonso bwamutumīne mulopwe Ahaza paadi ku Damakasa. Kitobo Udiya wapwa kūbaka’kyo kumeso kwa Mulopwe Ahaza kujoka paadi ku Damakasa.
12 Mulopwe pa kujoka ku Damakasa wamona kisōkelo, wafwena ku kisōkelo walambwila’po byamulambu.+
13 Wadi ulambula nyeke byamulambu byandi bisōkwe ne kufitula mwishi wa byamulambu byandi bya miseke pa kisōkelo’pa; kadi wadi upungulwila’po byamulambu byandi bya bitomibwa ne kukusa’po mashi a bitapwa byandi bya kipwano.
14 Kupwa watalula kisōkelo+ kya mukuba kyadi ku meso a Yehova pa kyakyo kifuko ku meso a njibo, pa bukata bwa kisōkelo kyandi ne njibo ya Yehova, wakekitūla ku mutamba wa kutunduka wa kisōkelo kyandi.
15 Mulopwe Ahaza wasoñanya kitobo Udiya+ amba: “Fitula mwishi wa kyamulambu kisōkwe kya lubanga pa kisōkelo kikatampe,+ kadi ne kyamulambu kya miseke+ kya ku kyolwa, kyamulambu kisōkwe kya mulopwe, ne kyamulambu kyandi kya miseke, pamo ne byamulambu bisōkwe, ne byamulambu bya miseke, ne byamulambu bya bitomibwa bya bantu bonso. Ufwaninwe ne kukusa’po mashi onso a byamulambu bisōkwe ne mashi onso a bitapwa bikwabo. Ino shi ke kisōkelo kya mukuba, ndeke ami mwine ndyuke bya kulonga nakyo.”
16 Penepa kitobo Udiya walonga byonso byamusoñenye Mulopwe Ahaza.+
17 Ne kadi Mulopwe Ahaza watēta malata a mu mbavu mwa matempa+ tupinditupindi, watalula’po ne byoilo,+ watūkija ne Dijiba pa bañombe ba mukuba+ badi bediselele wakeditūla pa mabwe māle.+
18 Kadi watalula mu njibo ya Yehova kyūbakwa kipūte kūlu kya Sabato kyadi kyūbakwe mu njibo ne kitwelelo kya panja kya mulopwe; walongele namino mwanda wa mulopwe wa Ashidia.
19 Myanda mikwabo ya mānga ya Ahaza, byaalongele, mwene i milembwe mu mukanda wa mānga ya bitatyi bya balopwe ba Yuda?+
20 Kupwa Ahaza walādikwa mwanda wa kukōkolokwa na bakulutuba bandi, wajīkwa na bakulutuba bandi mu Kibundi kya Davida; ebiya wandi mwana Hezekia*+ wabikala pa kyandi kyaba.
Kunshi kwa Dyani
^ Nansha’mba “bantu ba Yuda.”
^ Nansha’mba “njibo mikatakata.”
^ Ko kushintulula’mba “Yehova Ukomejanga.”
