Balopwe wa Bubidi 18:1-37
18 Mu mwaka wa busatu wa Hoshea+ mwanā Elā mulopwe wa Isalela, Hezekia+ mwanā Ahaza+ mulopwe wa Yuda wabikala.
2 Wadi na myaka 25 paabikele, wabikele myaka 29 mu Yelusalema. Dijina dya inandi i Abi* mwanā Zekadia.+
3 Wadi ulonga nyeke byoloke ku meso a Yehova+ na mwalongēle mukulutuba wandi Davida.+
4 Ye aye watalwile mitenta,+ walalakanya bikomo bikola, ne kutyumuna kipanda kikola.*+ Kadi wapondakenye ne nyoka wa mukuba obapungile kudi Mosesa;+ mwanda kufika ne mu kine kitatyi’kya bantu ba Isalela badi bafitwila’ko mwishi wa bitapwa kadi wadi witwa divule bu kilezaleza kya nyoka wa mukuba.*
5 Wadi ukulupile mudi Yehova+ Leza wa Isalela; kekudipo nansha umo wadi pamo bwa aye mu balopwe bonso ba Yuda balondele’po nansha boba bamubadikidile.
6 Wadi ulamete bininge kudi Yehova.+ Wamulondele pampikwa kusāsuka; wadi ulamine nyeke mbila yobapele Mosesa kudi Yehova.
7 Kadi Yehova wadi nandi. Wadi ulonga bya tunangu konso kwaadi wenda. Watombokela mulopwe wa Ashidia, wapela kumwingidila.+
8 Wanekenye ne bene Fidishitia+ kufika’nka ne ku Ngaza ne matanda andi mene, kushilwila ku kiteba kya mulami kutūla ne ku kibundi kikomejibwe.*
9 Mu mwaka wa buná wa Mulopwe Hezekia, ko kunena’mba mwaka wa busamba-bubidi wa Hoshea+ mwanā Elā mulopwe wa Isalela, Shalemanese mulopwe wa Ashidia wakanda kulwa Samadia bulwi, kamutēkela kasāla.+
10 Bamukwata+ ku mfulo kwa mwaka wa busatu; mu mwaka wa busamba wa Hezekia, mwaka wa kitema wa Hoshea mulopwe wa Isalela, Samadia wakwatwa.
11 Kupwa mulopwe wa Ashidia waselela Isalela mu Ashidia bu misungi+ wakebekadija mu Halaha ne mu Habole ku munonga wa Ngozane ne mu bibundi bya bene Mede.+
12 Byadi namino mwanda kebaivwenepo diwi dya Yehova Leza wabo, ino badi bajilula’nka kujilula kipwano kyandi, byonso byasoñenye Mosesa mwingidi wa Yehova.+ Kebadipo bevwana nansha kukōkela kwine.
13 Mu mwaka wa 14 wa Mulopwe Hezekia, Senakediba mulopwe wa Ashidia+ wakanda kulwa bulwi na bibundi byonso bikomejibwe bya Yuda ne kukwata webikwata.+
14 Ebiya Hezekia mulopwe wa Yuda watuma musapu ku Lakishi kudi mulopwe wa Ashidia amba: “Ne mulube. Leka kundwa, nami nsa kukupa byonso byokantunga.” Penepo mulopwe wa Ashidia watunga Hezekia mulopwe wa Yuda mambo a talenta* 300 ya ndalama ne talenta 30 ya olo.
15 Ebiya Hezekia wapāna ndalama yonso yatenwe mu njibo ya Yehova ne mu bibīko bya byabulēme bya njibo* ya mulopwe.+
16 Mu kine kitatyi’kya Hezekia watalula* milango ya ku tempelo+ ya Yehova ne ñunji yobabambile olo kudi Hezekia mulopwe wa Yuda aye mwine,+ wapa’byo mulopwe wa Ashidia.
17 Kupwa mulopwe wa Ashidia watuma Talatana,* ne Labasadise,* ne Labashake* na kibumbo kikatampe kya divita, batamba ku Lakishi+ baenda ku Yelusalema+ kwa Mulopwe Hezekia. Bakanda ku Yelusalema baimana dya ku mukola wa kijiba kya kungala, udi mu dishinda dikatampe dya budimi bwa muntu ukendanga bisandi.+
18 Abo pa kwita mulopwe atambe, kwatamba Ediakimi+ mwanā Hilekia wadi utala ba mu njibo,* ne Shebāna+ mulembi, ne Yoa mwanā Asafa musoneki, baiya kobadi.
19 Penepo Labashake webanena’mba: “Nemwisāshila, sapwilai Hezekia amba, ‘Mulopwe mukatampe, mulopwe wa Ashidia, wanena namino amba: “Le kikulupiji kyobe kimanine pa bika?+
20 Ubanena’mba, ‘Ngidi na bunwa ne na bukomo bwa kulwa divita,’ ino bino i binenwa bya bituputupu. Le i ani owikulupile kosomonwa kuntombokela ami?+
21 Tala! Ubekulupila bukwashi bwa dino dibungu difyotoke, ke Edipito+ kadi, ino shi muntu waeyalela’ko dibwanya kutwela mu dikasa dyandi dyeditubula. Mo mwikadile ne Felo mulopwe wa Edipito ku boba bonso bamukulupile.
22 Kadi shi munombole amba, ‘Tukulupile mudi Yehova Leza wetu,’+ mwene i aye obatalwidile mitenta ne bisōkelo kudi Hezekia,+ kanena Yuda ne Yelusalema amba, ‘Mufwaninwe kwivukwila ku meso a kino kisōkelo mu Yelusalema’?”’+
23 Shi ke pano, nakwisāshila, pikana na mfumwami mulopwe wa Ashidia: Nsa kukupa tubalwe 2 000 shi ubwanya kutana bantu babwane ba kukanda’po.+
24 Le penepo ubwanya namani kujokeja nansha’tu mbikavu umo mutyetye bininge mu bengidi ba mfumwami, koku wikulupile Edipito pa mwanda wa makalo ne bantu bakandanga pa tubalwe?
25 Lelo ke na lupusapo lwa Yehova lonaiya kulwa nalo kino kifuko mwanda wa kwikyonakanya? Yehova mwine waunenene amba, ‘Kanda ulwe na ino ntanda wiyonakanye.’”
26 Ponkapo Ediakimi mwanā Hilekia, ne Shebāna+ ne Yoa banena Labashake+ amba: “Tubakwisāshila, wisambe na bengidi bobe mu ludimi lwa Kialamia,*+ mwanda tubwanya kwivwana’lo; kokīsamba netu mu ludimi lwa Bayuda mu matwi a bantu badi pa lubumbu.”+
27 Ino Labashake webatentulula’mba: “Le mfumwami wantume kunena bino binenwa enka kudi mfumwenu ne komudi banwe kete? Mwene i ne kudi bana-balume bashikete pa lubumbu, boba basa kudya tuvwi twabo ne kutoma masu abo pamo nenu?”
28 Kupwa Labashake waimana kaela lubila na diwi ditunduke mu ludimi lwa Bayuda amba: “Ivwanai binenwa bya mulopwe mukatampe, mulopwe wa Ashidia.+
29 Mulopwe wanena namino amba, ‘Kemwakyongolwai na Hezekia, mwanda kabwanyapo kwimukūla mu kuboko kwami.+
30 Kadi Hezekia kakemukulupija mudi Yehova na kunena’mba: “Na bubine Yehova usa kwitukūla, kadi kino kibundi kekisapo kupānwa mu kuboko kwa mulopwe wa Ashidia.”+
31 Kemwakevwanai Hezekia, mwanda mulopwe wa Ashidia wanena namino amba: “Pwanai nami mwitūle,* nabya muntu ne muntu momudi ukadya ku muñanza wandi ne ku kikuyu kyandi ne kutoma mema a mu kyumbu kyandi,
32 enka ne byomfika nemuselele mu ntanda+ idi pamo bwa ntanda yenu, ntanda ya miseke ne vinyu mipya, ntanda ya mikate ne madimi a mañanza, ntanda ya impafu ne būki. Penepa mukekala bōmi, kemukafupo. Kemwakevwanai Hezekia, mwanda wimongolanga na kunena’mba, ‘Yehova usa kwitukūla.’
33 Lelo kudi baleza kampanda ba mizo bakūdile yabo ntanda mu kuboko kwa mulopwe wa Ashidia?
34 Le baleza ba Hamata+ ne ba Alapade badi kwepi? Lelo baleza ba Sefavaime,+ ba Hena, ne ba Iva badi kwepi? Le bakūdile Samadia mu kuboko kwami?+
35 Le i leza’ka mu baleza bonso ba matanda wakūdile ntanda yabo mu kuboko kwami, amba Yehova nandi akūle Yelusalema mu kuboko kwami?”’”+
36 Ino bantu badi bobile’nka nyā, kebamulondolwelepo kishima nansha kimo, mwanda mulopwe wasoñenye bantu amba, “Kemufwaninwepo kumulondolola.”+
37 Ino Ediakimi mwanā Hilekia wadi utala ba mu njibo,* ne Shebāna mulembi, ne Yoa mwanā Asafa musoneki baiya kudi Hezekia na bivwalwa bisane kebamulombola binenwa bya Labashake.
Kunshi kwa Dyani
^ Mutelelo wa mu kīpi wa Abidya.
^ Tala Nshintulwilo ya Bishima.
^ Nansha’mba “wadi witwa bu Nehushetane.”
^ Ko kunena’mba, konsokonso, kudi bantu batyetye nansha bangi.
^ Talenta imo i makilo 34,2. Tala Mbwejo B14.
^ Nansha’mba “njibo mikatakata.”
^ Kishima pa kishima i, “watyiba’ko.”
^ Nansha’mba “mukata wa batuseya.”
^ Nansha’mba “mukata wa bengidi ba bulēme.”
^ Nansha’mba “mukata wa basola.”
^ Nansha’mba “njibo mikatakata.”
^ Nansha’mba “lwa bene Shidea.”
^ Kishima pa kishima i, “Kwiesela dyese pamo nami ne kutambila kondi.”
^ Nansha’mba “njibo mikatakata.”
