Balopwe wa Bubidi 21:1-26
21 Manase+ wadi na myaka 12 paabikele, wabikele myaka 55 mu Yelusalema.+ Dijina dya inandi i Hefeziba.
2 Wadi ulonga bibi ku meso a Yehova, ulonda bilongwa bya munyanji bya mizo+ yapangilwe na Yehova ku meso a bantu ba Isalela.+
3 Waubakulwile mitenta yobaonakenye kudi shandi Hezekia,+ washimikila Bāla bisōkelo ne kulonga kipanda kikola*+ na mwalongēle Ahaba mulopwe wa Isalela.+ Kadi wadi wivukwila ku bibumbo byonso bya mūlu, webingidila.+
4 Waubaka ne bisōkelo mu njibo ya Yehova,+ mine yanenene Yehova amba: “Mu Yelusalema mo monkatūla dijina dyami.”+
5 Waubakila ne bibumbo byonso bya mūlu+ bisōkelo mu bipango bibidi bya njibo ya Yehova.+
6 Wapityija ne wandi mwana mu mudilo; walonga bya maleñanya, wakimba mitāmu,+ watonga babuka na bibanda ne bilumbu.+ Walonga bibi bya mwiko ku meso a Yehova, mwanda wa kumusanshija.
7 Watūla nkishi musōnge wa kipanda kikola*+ waalongele mu njibo mine yanenene Yehova kudi Davida ne kudi wandi mwana Solomone amba: “Mu ino njibo ne mu Yelusalema, onatonga mu bisaka byonso bya Isalela, mo monkatūla dijina dyami nyeke.+
8 Kadi nkikalumbakanyapo monka maulu a Isalela mu ntanda yonapele bakulutuba babo,+ shi balame ndaminine byonso byonebasoñenye,+ ne Bijila byonso byebanenene kulonda mwingidi wami Mosesa.”
9 Ino kebakōkelepo, kadi Manase wadi wibalubija nyeke, wibalengeja balonge bibi bininge kupita mizo yatukije Yehova ku meso a bene Isalela.+
10 Yehova wadi wisamba nyeke kupityila kudi bengidi bandi bapolofeto+ amba:
11 “Manase mulopwe wa Yuda walonga bino bintu byonso bikobakane; walonga bibi mpata kupita ne bene Amole bonso+ bamubadikidile,+ kadi walongeja Yuda bubi na bilezaleza bya mukenye.*
12 O mwanda Yehova Leza wa Isalela wanena namino amba: ‘Yeu ndeta kyamalwa pa Yelusalema+ ne Yuda kine kikalengeja muntu yense wivwana’kyo matwi andi onso abidi akatenda.+
13 Nsa kutamwina pa Yelusalema lukamba lwa kupima nalo+ lwaingidijibwe pa Samadia+ ne kwingidija kingidilwa kya kōlola nakyo* pa njibo ya Ahaba,+ kadi nsa kukombeleja Yelusalema tō, mukendelanga muntu lweso tō, kumukombeleja ne kumufulamika.+
14 Nsa kwela bashele’ko ba bupyani bwami+ ne kwibapāna mu makasa a balwana nabo, bakela bikwatwa ne bitūtwa bya balwana nabo bonso,+
15 mwanda balongele bibi ku meso ami kadi badi bansanshija kyaba kyonso tamba difuku dyātambile bakulutuba babo mu Edipito kufika ne dyalelo.’”+
16 Kadi Manase wamwangile mashi mangi mpata a kubulwa mambo enka ne byaayujije Yelusalema tamba ku mfulo imo kutūla ne ku mikwabo,+ kutalula’mo bidi bubi bwandi bwaalongeje Yuda pa kulonga bibi ku meso a Yehova.
17 Myanda mikwabo ya mānga ya Manase ne byonso byaalongele ne bubi bwaalongele, mwene i milembwe mu mukanda wa mānga ya bitatyi bya balopwe ba Yuda?
18 Kupwa Manase walādikwa mwanda wa kukōkolokwa na bakulutuba bandi, wajīkwa mu budimi bwa ku yandi njibo, mu budimi bwa Uzā;+ ebiya wandi mwana Amona wabikala pa kyandi kyaba.
19 Amona+ wadi na myaka 22 paabikele, wabikele myaka ibidi mu Yelusalema.+ Dijina dya inandi i Meshulemete mwanā Haluze wa ku Yoteba.
20 Wadi ulonga nyeke bibi ku meso a Yehova, na mwalongēle shandi Manase.+
21 Wadi unangila nyeke mu mashinda onso anangile’mo shandi, kadi wadi wingidila nyeke ne kwivukwila ku bilezaleza bya mukenye byaingidile shandi.+
22 Enka nenki waleka Yehova Leza wa bakulutuba bandi, kadi kanangīlepo mu dishinda dya Yehova.+
23 Ku mfulo bengidi ba Amona bamukutyila kitumba, baipaila mulopwe mu yandi njibo.
24 Ino bantu ba ntanda’ya baipaya boba bonso bakutyīle Mulopwe Amona kitumba, ebiya babikika wandi mwana Yoshia pa kyandi kyaba.+
25 Myanda mikwabo ya mānga ya Amona, byaalongele, mwene i milembwe mu mukanda wa mānga ya bitatyi bya balopwe ba Yuda?
26 Penepo bamujīka mu kibundu kyandi mu budimi bwa Uzā,+ ebiya wandi mwana Yoshia+ wabikala pa kyandi kyaba.
Kunshi kwa Dyani
^ Tala Nshintulwilo ya Bishima.
^ Tala Nshintulwilo ya Bishima.
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Nansha’mba “monji mukute’ko fweta.”
