Balopwe wa Bubidi 22:1-20
22 Yoshia+ wadi na myaka mwānda paabikele, wabikele myaka 31 mu Yelusalema.+ Dijina dya inandi i Yedida mwanā Adaya wa ku Bozekata.+
2 Wadi ulonga byoloke ku meso a Yehova kadi wanangīle mu mashinda onso a Davida mukulutuba wandi,+ kasāsukīlepo ku lundyo nansha ku lunkuso kwine.
3 Mu mwaka wa 18 wa Mulopwe Yoshia, mulopwe watuma mulembi Shafana mwanā Azadiya mwanā Meshulama, ku njibo ya Yehova+ amba:
4 “Kanda kwa Hilekia+ kitobo mukatampe, munene akongakanye lupeto lonso luletwa mu njibo ya Yehova,+ lwakongelwe mu bantu na batulama ba pa kibelo.+
5 Wibanene bape’lo boba batongelwe kutala mwingilo mu njibo ya Yehova, abo nabo bape’lo bengidi ba mu njibo ya Yehova basa kulongolola bintu byonekele ku* njibo,+
6 ko kunena’mba, basendwe, bōbaki, ne boba bayenga; bakapote nalo mityi ne mabwe masōnge bya kulongolola nabyo njibo.+
7 Ino kebafwaninwepo kulondwa mobengidijija lupeto lobapebwa, mwanda i bantu bakulupilwa.”+
8 Kupwa Hilekia kitobo mukatampe walombola Shafana mulembi+ amba: “Nasokola mukanda wa Bijila+ mu njibo ya Yehova.” Penepo Hilekia wapa Shafana mukanda’wa, nandi washilula kutanga’o.+
9 Ebiya Shafana mulembi waenda kwa mulopwe kamusapwila’mba: “Bengidi bobe abapungulula lupeto lwatanwa mu njibo, abape’lo boba batongelwe kutala mwingilo mu njibo ya Yehova.”+
10 Shafana mulembi wasapwila monka mulopwe amba: “Kudi mukanda+ waumpa Hilekia kitobo.” Penepo Shafana washilula kutanga’o ku meso a mulopwe.
11 Mulopwe pa kwivwana’tu binenwa bya mu mukanda wa Bijila, ponkapo wasana bivwalwa byandi.+
12 Ebiya mulopwe wasoñanya Hilekia kitobo, ne Ahikama+ mwanā Shafana, ne Akabola mwanā Mikaya, ne mulembi Shafana, ne Asaya mwingidi wa mulopwe namino amba:
13 “Endai mukepangule Yehova pangala pami, ne pangala pa bantu, ne pangala pa Yuda ense pa mwanda wa binenwa bya uno mukanda wasokolwa’u; ke-pantu bukalabale bwa Yehova bwetwakila i bukatampe,+ mwanda bakulutuba betu kebakōkelepo binenwa bya uno mukanda na kulama byonso bilembelwe’mo pa mwanda wetu.”
14 Ebiya Hilekia kitobo, ne Ahikama, ne Akabola, ne Shafana, ne Asaya baenda kudi Huluda mupolofeto mukaji.+ Wadi mukaja Shalumu mwanā Tikeva mwanā Halahasa mwine wadi utala kokwa kulamwanga bisandi, kadi wadi ushikata mu Mukenza wa Bubidi wa Yelusalema; penepo kebesambe nandi kwine’kwa.+
15 Nandi webanena’mba: “Yehova Leza wa Isalela wanena namino amba, ‘Kalombolei muntu wemutuma kondi amba:
16 “Yehova wanena namino amba, ‘Nsa kuleta kyamalwa pa kino kifuko ne pa bekadi bakyo, binenwa byonso bya mu mukanda watanga mulopwe wa Yuda.+
17 Byobangela ne kufitula mwishi wa bitapwa ku baleza bakwabo+ mwanda wa kunsanshija na mingilo yonso ya makasa abo,+ bukalabale bwami busa kwakila kino kifuko kadi kebukabulepo.’”+
18 Ino kasapwilei mulopwe wa Yuda wemutuma kwipangula Yehova amba, “Yehova Leza wa Isalela wanena namino amba: ‘Pangala pa binenwa byowaivwana,
19 mutyima obe byowatengwa* kadi ubetyepeja+ ku meso a Yehova na kwivwana byonanena bitala kino kifuko ne bekadi bakyo—bya amba bakekala ke kintu kya nzuba ne kifingwe mafingo—kadi ubasana bivwalwa byobe,+ ubadila ku meso ami, ami nami nakwivwana, i Yehova unena.
20 O mwanda nkakulunga kudi bakulutuba bobe,* ukalādikwa mu kibundu kyobe mu ndoe, kadi meso obe keakamonepo byamalwa byonso byonkaleta pa kino kifuko.’”’” Penepa baiya kusapwila mulopwe kilondololwa.
Kunshi kwa Dyani
^ Nansha’mba “mitanta mu.”
^ Kishima pa kishima i, “byowanekena.”
^ Uno i muneneno wa kusāsula ushintulula’mba kufwa.
