Balopwe wa Bubidi 25:1-30
25 Mu mwaka wa kitema wa bulopwe bwa Zedekia, mu kweji wa dikumi, mu difuku dya dikumi dya kweji, Nebukaneza+ mulopwe wa Babiloni waiya kutamba Yelusalema+ bulwi na kibumbo kyandi kyonso kya divita. Wamutūdila nkambi kupwa wamūbakila ne lubumbu lwa kasāla kufulakufula,+
2 kadi kibundi kyatēkelwa kasāla kufika ne mu mwaka wa 11 wa Mulopwe Zedekia.
3 Mu difuku dya kitema dya kweji wa buná kipupo kya nzala kyanana+ mu kibundi, kadi bantu ba ntanda’ya kebadipo na byakudya.+
4 Lubumbu lwa kibundi lwatubulwa kipunzu,+ kadi basola bonso batambila pa kibelo pa bukata bwa mumbu ibidi kubwipi na budimi bwa mulopwe, banyema bufuku, papo bene Kaladea bajokolokele kibundi; mulopwe nandi waenda mu dishinda dya ku Alaba.+
5 Ino kibumbo kya divita kya bene Kaladea kyalonda mulopwe kyamupetela mu malungu a Yediko mudi zolē, penepo bibumbo byandi byonso bya basola byamupalakana.
6 Kupwa bakwata mulopwe+ bakamutwala kwa mulopwe wa Babiloni ku Dibēla, ebiya bamutyibila nsambu.
7 Batapa bana ba Zedekia mu meso andi; kupwa Nebukaneza wasaba Zedekia meso, wamukuta nkano ya mukuba waenda nandi ku Babiloni.+
8 Mu kweji wa butano, mu difuku dya busamba-bubidi dya kweji, ko kunena’mba mu mwaka wa 19 wa Mulopwe Nebukaneza mulopwe wa Babiloni, Nebuzaladana+ mukata wa basola balami, mwingidi wa mulopwe wa Babiloni, waiya ku Yelusalema.+
9 Wasōka njibo ya Yehova,+ ne njibo* ya mulopwe,+ ne mobo onso a mu Yelusalema;+ wasōka ne mobo a bantu bonso balēme.+
10 Mumbu yonso yadi ijokolokele Yelusalema nayo yabundulwa na kibumbo kyonso kya divita kya bene Kaladea kyadi na mukata wa basola balami.+
11 Nebuzaladana mukata wa basola balami wasela bantu bakwabo bashele mu kibundi bu misungi, ne bantu banyemene baenda kwa mulopwe wa Babiloni, ne bantu bakwabo bonso.+
12 Ino mukata wa basola balami washiya’ko bantu bamo balanda bininge ba ntanda’ya ke ba kwingila bu bengidi ba mu madimi a mañanza ne bu bengidi ba mingilo ya kuningilwa.+
13 Penepo bene Kaladea balala bibesebibese bikomo bya mukuba+ bya njibo ya Yehova ne matempa+ ne Dijiba dya mukuba+ dyadi mu njibo ya Yehova, kupwa baselela mukuba ku Babiloni.+
14 Basela ne bininga bya buto, ne bipawa, ne mikashi ya kubula nayo mudilo, ne bitomeno, ne bipungwa byonso bya mukuba byadi bingidijibwa ku mingilo ya ku tempelo.
15 Mukata wa basola balami wasela bininga bya mudilo, ne ngeso byadi bya olo+ ne ndalama+ ya binebine.
16 Ino bikomo bibidi’bya, ne Dijiba, ne matempa byalongele Solomone mwanda wa njibo ya Yehova, mukuba wa bino bintu byonso wadi mukomo’nka ne kupima bulēmi.+
17 Kikomo ne kikomo kyadi na maboko* 18 mu bwimwa,+ ne mutwe wakyo wadi wa mukuba; ne bula bwa mutwe wa kikomo bwadi bwa maboko asatu, ne bukonde ne bipa bya mangelenade byadi bijokoloke mutwe wa kikomo, byonso byadi bya mukuba.+ Kikomo kya bubidi pamo ne bukonde bwakyo kyadi pamo bwa kikwabo.
18 Mukata wa basola balami wasela ne Selaya+ kitobo mukulu, ne Zefenia+ kitobo wa bubidi, ne batulama basatu ba pa kibelo.+
19 Kadi wasela mu kibundi mwingidi umo wa bulēme wa mu kipango wadi mukwashi wa lupusa pa basola, ne bapwani batano ba mulopwe ba pa mutyima batenwe mu kibundi, pamo ne mulembi wa mukata wa kibumbo kya divita, mwine wadi ukongakanya bantu ba ntanda’ya, ne bana-balume 60 ba mu bantu bitupu ba ntanda’ya batenwe mu kibundi.
20 Nebuzaladana+ mukata wa basola balami webasela waenda nabo kwa mulopwe wa Babiloni ku Dibēla.+
21 Mulopwe wa Babiloni webatapa ne kwibepaila ku Dibēla mu ntanda ya Hamata.+ Enka nenki Yuda waenda bu musungi kutamba ku ntanda yandi.+
22 Nebukaneza mulopwe wa Babiloni watonga Ngedadia+ mwanā Ahikama+ mwanā Shafana+ bu wa kuludika bantu baashile mu ntanda ya Yuda.+
23 Bakata bonso ba kibumbo kya divita ne bana-balume babo pa kwivwana’mba mulopwe wa Babiloni watonge Ngedadia, baiya ponka na ponka kudi Ngedadia ku Mizipa. I ba Ishemele mwanā Netania, Yohanana mwanā Kalea, Selaya mwanā Tanehumete mwine Netofa, ne Yazania mwanā mwine Makati, pamo ne bana-balume babo.+
24 Ngedadia webatyipila mutyipo abo ne bana-balume babo kaebanena’mba: “Kemukikwatwai moyo wa kwikala bengidi ba bene Kaladea. Shikatai mu ino ntanda mwingidile mulopwe wa Babiloni, nabya bikemwikadila biyampe.”+
25 Ebiya mu kweji wa busamba-bubidi, Ishemele+ mwanā Netania mwanā Edishama, wa ku musuku wa bulopwe,* waiya na bana-balume bakwabo dikumi, penepa batapa Ngedadia wafwa, pamo ne Bayuda ne bene Kaladea baadi nabo mu Mizipa.+
26 Kupwa bantu bonso, ne batyetye ne bakatampe bene, kubadila’mo ne bakata ba kibumbo kya divita, bataluka baenda ku Edipito,+ mwanda bakwetwe bene Kaladea moyo.+
27 Mu mwaka wa 37 tamba Yehoyakini+ mulopwe wa Yuda uselwa bu musungi, mu kweji wa 12, mu difuku dya 27 dya kweji, Evile-Melodake mulopwe wa Babiloni, mu mwaka waabikele, wakutulula* Yehoyakini mulopwe wa Yuda mu kifungo.+
28 Wesamba nandi biyampe kadi wazunzula lupona lwandi pangala pa mpona ya balopwe bakwabo baadi nabo mu Babiloni.
29 Ponkapo Yehoyakini wavūla bivwalwa byandi bya mu kifungo, kadi wadi udya nyeke ku meso andi mafuku onso a būmi bwandi.
30 Badi bamupa kyaba kyonso mposo ya byakudya kwa mulopwe, difuku ne difuku, mafuku onso a būmi bwandi.
Kunshi kwa Dyani
^ Nansha’mba “njibo mikatakata.”
^ Kuboko kumo i masantimetele 44,5. Tala Mbwejo B14.
^ Kishima pa kishima i, “lukunwa lwa bulopwe.”
^ Kishima pa kishima i, “watulula mutwe wa.”
