Balopwe wa Bubidi 4:1-44
4 Penepo umo wa mu bakaji ba bana ba bapolofeto+ wadidila Edisha, kanena’mba: “Mwingidi obe wami mulume i mufwe, kadi uyukile biyampe amba mwingidi obe wadi nyeke wakaminwe Yehova.+ Ino pano mwapulwa waiyanga kusela bami bana bonso babidi bekale bapika bandi.”
2 Ponkapo Edisha wamunena’mba: “Le nkulongele bika? Nombole, le i bika byodi nabyo mu njibo?” Nandi amba: “Mwingidi obe kadipo na kintu nansha kimo mu njibo poso’nka mutyibi* wa māni.”+
3 Ebiya wanena’mba: “Tamba panja, kalombe bipungwa ku balondakani nobe bonso, bipungwa mwampikwa kintu. Kokilomba bityetye.
4 Kupwa twela wishityile mwinjibo pamo ne bobe bana. Yuja māni mu bino bipungwa byonso, byobya biyula wibitūla pafula.”
5 Penepo mwana-mukaji’wa wamushiya.
Aye pa kwishityila mu njibo pamo ne bandi bana, badi bamutambika bipungwa, nandi upungulula’nka kupungulula.+
6 Bipungwa’bya pa kuyula, wanena mwana umo amba: “Ndetele kipungwa kikwabo.”+ Nandi wamutentulula’mba: “Kekukidipo bipungwa bikwabo.” Ponkapo māni aketeka.+
7 Penepo mwana-mukaji’wa watwela wasapwila muntu wa Leza wa bine, nandi wamunena’mba: “Enda, kapoteje māni’o ujokeje mapu, penepa byobya bishala’ko bikukwashe abe ne bobe bana.”
8 Difuku dimo Edisha waenda ku Shuneme,+ kwine kwadi mwana-mukaji umo mulēmekibwe, nandi wamuningila adye byakudya kwine’kwa.+ Kitatyi kyonso kyaadi upita wadi wimana kwine’kwa wadya.
9 Ebiya wanena wandi mulume amba: “Ndyukile amba i muntu ujila wa Leza upityilanga dino kyaba ne kyaba.
10 Nakwisāshila, tumūbakile kakyumba ka pangala+ tumutūdile’mo ne butanda ne meza ne kityi ne kitūlwa-binanu. Penepo ponso paiya kuno, washikata’mo.”+
11 Difuku dimo waiya kwine’kwa, waenda kukalāla mu kyumba kya pangala.
12 Kupwa wanena mwingidi wandi Ngehazi+ amba: “Ita mwana-mukaji mwine Shuneme.”+ Ebiya wamwita, nandi waimana ku meso andi.
13 Penepo wanena Ngehazi amba: “Mulombole’po bidi amba, ‘Byowetususukila ano masusu onso.+ Le i bika byombwanya kukulongela?+ Le nkunenene kwa mulopwe+ nansha kwa mukata wa kibumbo kya divita?’” Ino aye walondolola’mba: “Nshikatanga mu bantu bami.”
14 Ebiya wanena’mba: “Penepo i bika bibwanya kumulongelwa?” Ngehazi nandi watentulula’mba: “Inoko kadipo na mwana mwana-mulume,+ kadi wandi mulume ke mununu.”
15 Ponkapo wanena’mba: “Mwite.” Penepo wamwita, nandi waimana pa kibelo.
16 Penepa wanena’mba: “Mwaka wiya’ko mu kino kitatyi, usa kufumbakanya mwana mwana-mulume.”+ Ino aye amba: “Mhm, a mfumwami, abe muntu wa Leza wa bine! Leka kubepela mwingidi obe.”
17 Nansha nankyo, mwana-mukaji’wa waimita wabutula mwana mwana-mulume mwaka wiya’ko pa kitatyi kimo kyonka, monka mwamulombwedile’kyo Edisha.
18 Mwana’wa watama, ino difuku dimo watamba waenda kudi shandi wadi pamo na bangudi.
19 Wadi unena’nka kunena shandi amba: “Yō mutwe, yō mutwe!” Kupwa shandi wanena mwingidi amba: “Kamutūle kudi inandi.”
20 Ebiya nandi wakamujokeja kudi inandi, washikata pa maulu a inandi kufika ne dyuba mu mitwe, kupwa wafwa.+
21 Penepo wakanda wamulādika pa kitanda kya muntu wa Leza wa bine,+ kupwa washita ku njibo waenda.
22 Ebiya waita wandi mulume kanena’mba: “Ntumine’ko mwingidi umo ne mpunda umo, ñende bukidi kudi muntu wa Leza wa bine kupwa njoke.”
23 Ino aye amba: “Kyokamutadila dyalelo i kika? Ke kweji katentapo+ kadi ke dya sabatopo.” Penepo nandi wamunena’mba: “Byonso bidi biyampe.”
24 Ebiya wavwika mpunda kishikato kanena mwingidi wandi amba: “Enda bukidi. Kokityepeja lubilo poso shi nakunena.”
25 Penepo waenda kudi muntu wa Leza wa bine ku Lūlu lwa Kalamela. Muntu wa Leza wa bine pa kumumona’tu dya kulampe, wanena mwingidi wandi Ngehazi amba: “Tala! Mwana-mukaji mwine Shuneme awa keye.
26 Enda’po bidi lubilo ukesambakane nandi umwipangule amba, ‘Le udi biyampe? Le ne obe mulume udi biyampe? Le obe mwana nandi udi biyampe?’” Nandi amba: “Byonso bidi biyampe.”
27 Aye pa kufika kudi muntu wa Leza wa bine ku lūlu, ponkapo wamushipila ku maulu.+ Ebiya Ngehazi wafwena kamutalula’ko, ino muntu wa Leza wa bine wamunena’mba: “Muleke, mwanda udi na bululu bukatampe ku mutyima,* ino Yehova wamfi’kyo kanombwelepo.”
28 Mwana-mukaji’wa wanena’mba: “Lelo nalombele mfumwami mwana mwana-mulume? Mwene nanenene amba, ‘Kokankulupija bya bubela’?”+
29 Ponkapo Edisha wanena Ngehazi amba: “Wikute bivwalwa byobe mu kifuka+ usele ne mukombo wami mu makasa obe wende. Shi ubesambakana na muntu, shi ani shi ani, kokimwimuna; kadi shi muntu wakwimuna, kokimwitabija. Enda katūle mukombo wami pa mpala ya mwana.”
30 Ponkapo inandya mwana wanena amba: “Bine ne Yehova byadi mūmi ne byodi abe mwine* mūmi, nkisapo kukushiya.”+ Penepo nandi wataluka waenda nandi.
31 Ngehazi webabadikidila watūla mukombo pa mpala ya mwana, ino ke kwadipo diwi nansha malondololo mene.+ Wajoka kwisambakana na Edisha kamulombola’mba: “Mwana kabūkilepo.”
32 Edisha pa kutwela mu njibo, mwana’wa wadi ulēle pa kitanda kyandi mufwe.+
33 Watwela ne kwishityila mu njibo bubidi bwabo, kalombela kudi Yehova.+
34 Kupwa wakanda pa kitanda walādila padi mwana, watūla kyakanwa kyandi pa kyakanwa kya mwana, meso andi pa meso a mwana, ne makasa andi pa makasa a mwana, weolwela padi kasha wiolola, ponkapo umbidi wa mwana washilula kukaba.+
35 Wadi wendakana koku ne koku mu njibo, wakanda pa kitanda weolwela monka padi mwana. Mwana’wa waasula misunsa isamba-ibidi, kupwa wapūtula meso.+
36 Ino Edisha waita Ngehazi, kanena’mba: “Ita mwana-mukaji mwine Shuneme.” Penepo wamwita, nandi watwela mwaadi. Ebiya wamunena’mba: “Tekuna obe mwana.”+
37 Penepo watwela wapona ku andi maulu kaevukwila pa nshi ku meso andi, kupwa watekuna wandi mwana watamba.
38 Edisha pa kujokela ku Ngilengale, kwadi kipupo kya nzala mu ntanda’ya.+ Bana ba bapolofeto+ badi bashikete ku meso andi, wanena mwingidi wandi amba:+ “Tūla kisuku kikatampe pa mudilo utēkele bana ba bapolofeto busuku butyite.”
39 Penepo umo mobadi waenda ku budimi kukāpa mani a kamutyi ka ngimove, watana muñanza wa ntanda waapa’ko myungu ya ntanda, weidinga mu kivwalwa kyandi. Ebiya wajoka weiketela mu kisuku kya busuku’kya kwampikwa kuyuka i bika.
40 Kupwa bapa’byo bantu amba badye, ino abo’tu pa kudya busuku butyite’bwa, kebadila’mba: “Mu kisuku mudi lufu, abe muntu wa Leza wa bine.” Kebabwenyepo kudya’byo.
41 Penepo wanena’mba: “Letai tubukula.” Aye pa kupwa kwitwela mu kisuku, wanena’mba: “Pá’byo bantu badye.” Kekwakidipo kintu kibi mu kisuku.+
42 Kwaiya muntu utamba ku Bāla-Shadisha,+ waletela muntu wa Leza wa bine mikate 20 ya mebele a buluba+ milongwe na bipa bibajinji byele, pamo ne mufuko wa miseke mipya.+ Penepa Edisha wanena’mba: “Pá’byo bantu badye.”
43 Inoko mwingidi wandi wanena’mba: “Le mbwanya kupa’byo namani bantu 100?”+ Nandi wanena’mba: “Pá’byo bantu badye mwanda Yehova wanena namino amba, ‘Basa kudya kushale ne bimo.’”+
44 Penepo watūla’byo ku meso abo, badya kwashala ne bimo,+ mungya kinenwa kya Yehova.
Kunshi kwa Dyani
^ Nansha’mba “mutyibi wa nshingo milampe.”
^ Nansha’mba “mwanda muya wandi udi na bululu munda mwandi.”
^ Nansha’mba “muya obe byoudi.”
