Balopwe wa Bubidi 5:1-27
5 Penepo Nemani mukata wa kibumbo kya divita kya mulopwe wa Shidea wadi muntu mutumbe wadi mulēmekibwe na mfumwandi, mwanda Yehova wapēle Shidea bushindañani* kupityila kwadi. Wadi wa bulwi mukomokomo, nansha byaadi wa makopo.*
2 Bene Shidea pobakatambañene’dyo, baselele mu ntanda ya Isalela kanuke kana-kakaji bu musungi, kaikele ke mwingidi wa mukaja Nemani.
3 Walombola mfumwandi mwana-mukaji amba: “Shi mfumwami waendele’tu kukamona mupolofeto+ mu Samadia! Longa wamundapa makopo andi.”+
4 Penepo nandi* waenda wakasapwila’mo mfumwandi, wamulombola byanenene kana-kakaji ka ku Isalela.
5 Ponkapo mulopwe wa Shidea wanena’mba: “Enda’nka pano! Nsa kutumina mulopwe wa Isalela mukanda.” Penepo waenda, wasela ne talenta* dikumi ya ndalama, ne bibese 6 000 bya olo,* ne bivwalwa dikumi bya kwishinta.
6 Waselela mulopwe wa Isalela mukanda wadi mulembe amba: “Natume mwingidi wami Nemani na uno mukanda owatambula, mwanda wa umundape makopo andi.”
7 Mulopwe wa Isalela pa kutanga’tu mukanda’wa, wasana bivwalwa byandi kanena’mba: “Le ami ne Leza wa kwipaya ne kulama būmi?+ Mwanda wantumina uno muntu, kaunombola’mba mundape makopo andi! Mubamone banwe bene amba unkimbanga myanda.”
8 Ino Edisha muntu wa Leza wa bine pa kwivwana’mba mulopwe wa Isalela wasana bivwalwa byandi, ponkapo wamutumina musapu amba: “Kyowasanina bivwalwa byobe i kika? Muleke’po bidi āye kondi mwanda wa ayuke amba kudi mupolofeto mu Isalela.”+
9 Penepo Nemani waiya na tubalwe ne makalo andi a divita waimana ku kibelo kya njibo ya Edisha.
10 Inoko Edisha wamutumina mukendi umusapwile amba: “Enda, koye misunsa isamba-ibidi+ mu Yodano+ penepa ngitu yobe isa kujoka, kadi usa kutōka.”
11 Ponkapo Nemani wafītwa mutyima kajoka koku unena’mba: “Nadi nena mu mutyima’mba, ‘Usa kwiya kondi emane pano, ete dijina dya Yehova Leza wandi koku upolweja kuboko pa makopo mwanda wa akome.’
12 Mwene Abana ne Falapala, minonga ya Damakasa,+ i milumbuluke kupita mema onso a Isalela? Le nkibwanyapo koya’mo natōka?” Ponkapo waalamuka kaenda mukalabale bya mwiko.
13 Bengidi bandi bamufwena kebanena’mba: “A tata, shi mupolofeto wakunenene kulonga kintu kikomo mpata, le kwadipo wa kulonga’kyo? Le pano paakunena’tu amba, ‘Oya utōke’ ke pepi?”
14 Ponkapo watūka waketumpa* mu Yodano misunsa isamba-ibidi, mungya kinenwa kya muntu wa Leza wa bine.+ Penepo ngitu yandi yajoka biyampe pamo bwa ngitu ya mwana mutyetye,+ ne kutōka watōka.+
15 Kupwa papo wajokela kudi muntu wa Leza wa bine,+ aye ne bantu bandi bonso,* waimana ku meso andi kanena’mba: “Pano nayuka’mba i kutupu Leza konsokonso mu ntanda yonso poso’nka mu Isalela.+ Shi ke pano, nakwisāshila, itabija kyabuntu* kikupa mwingidi obe.”
16 Inoko Edisha wanena’mba: “Bine ne Yehova oñingidila* byadi mūmi, nkisapo kwitabija’kyo.”+ Wamuzenza etabije’kyo, ino aye wapela’nka kupela.
17 Mfulo mfulō Nemani wanena’mba: “Byowapela, nakwisāshila, leka mwingidi obe apebwe kiselwa kya biloba bya ino ntanda biselwa na bimbulu bibidi, mwanda mwingidi obe kakikalambulapo monka kyamulambu kisōkwe nansha kitapwa ku baleza bakwabo bo-bonso poso’nka kudi Yehova kete.
18 Ino Yehova alekele mwingidi obe kino kintu kimo’tu: Shi mfumwami watwela kukevukwila mu njibo* ya Dimōne, waeyalela ku kuboko kwami, papo nenwe kwivukwila ku njibo ya Dimōne. Shi nevukwila ku njibo ya Dimōne, bine Yehova alekele mwingidi obe kino kintu.”
19 Ponkapo wamunena’mba: “Enda mu ndoe.” Aye pa kumushiya ne kwenda kakyaba kalampe’ko,
20 Ngehazi+ mwingidi wa Edisha muntu wa Leza wa bine+ wanena mu mutyima wandi amba: ‘Mfumwami waleka uno Nemani+ mwine Shidea ende pampikwa kutambula byawaile nabyo. Bine ne Yehova byadi mūmi, nsa kumulonda lubilo nkasele’ko bya kusela.’
21 Penepo Ngehazi walonda Nemani lubilo. Nemani pa kumona muntu umulonda lubilo, watūka pa dikalo dyandi wakesambakana nandi, kamwipangula’mba: “Le byonso bidi biyampe?”
22 Ponkapo nandi wanena’mba: “Byonso bidi biyampe. Mfumwami wantume amba, ‘Tala! Kubangīla bana-balume babidi batamba ku ntanda ya ngulu ya Efelaimi ku bana ba bapolofeto. Nakwisāshila, wibape’ko talenta imo ya ndalama ne bivwalwa bibidi bya kwishinta.’”+
23 Nemani wanena’mba: “Sela, sela talenta ibidi.” Wamuzenza’nka kumuzenza,+ nandi wavungila talenta ibidi ya ndalama mu mifuko ibidi, ne bivwalwa bibidi bya kwishinta, wapa’byo bengidi bandi babidi, nabo bebisela ku meso andi.
24 Aye pa kufika ku Ofele,* webayata’byo wakebitūla mu njibo, wanena bantu’ba bende. Abo pa kutaluka,
25 watwela wakemana kubwipi na mfumwandi. Penepo Edisha wamwipangula’mba: “Kotamba i kwepi, a Ngehazi?” Ino aye amba: “Mwingidi obe kadipo kwaadi wendele.”+
26 Edisha wamunena’mba: “Lelo mutyima wami kewadipo nobe kokwa patūkanga mwana-mulume’wa pa dikalo dyandi kwiya kukusambakana? Le kino i kitatyi kya kwitabija ndalama nansha kwitabija bivwalwa ne bitongo bya impafu ne madimi a mañanza ne mikōko ne bañombe ne bengidi bana-balume ne bana-bakaji?+
27 Shi ke pano makopo+ a Nemani asa kukulamata abe ne lutundu lobe nyeke ne nyeke.” Ponka na ponka watamba ku meso andi na makopo, utōka tō pamo bwa mashika mekwate.+
Kunshi kwa Dyani
^ Nansha’mba “lupandilo.”
^ Nansha’mba “mukupilwe na luba lwa kikoba.”
^ Pakwabo kifunkila padi Nemani.
^ Talenta imo i makilo 34,2. Tala Mbwejo B14.
^ Nansha’mba “nsahabu.”
^ Nansha’mba “wetokenya.”
^ Kishima pa kishima i, “dyese.”
^ Kishima pa kishima i, “nkambi.”
^ Kishima pa kishima i, “oñimene kumeso.”
^ Nansha’mba “tempelo.”
^ Kifuko kya mu Samadia, pakwabo i mukuna nansha kifuko kikomejibwe.
