Balopwe wa Bubidi 6:1-33
6 Bana ba bapolofeto+ banena Edisha amba: “Tala! Kifuko kyotushikete’po nobe kibetutyepela bininge.
2 Twende’po bidi ku Yodano. Muntu ne muntu asele’ko dikomba, tushimike’ko kifuko motubwanya kushikata.” Nandi amba: “Endai.”
3 Umo mobadi wanena’mba: “Le ubulwepo kwenda na bengidi bobe?” Nandi amba: “Nsa kwenda.”
4 Ebiya waenda nabo, bafika ku Yodano bashilula kutēta mityi.
5 Umo mobadi paadi utēta mutyi, kasolwa kakonkokela mu mema, kadila’mba: “Yō, a mfumwami, ne mulombe’ko!”
6 Muntu wa Leza wa bine waipangula’mba: “Le kadi kabaponena pepi?” Nandi wamulombola pokadi kabaponena. Penepo waketa kipindi kya mutyi wekyela’po waleleja kasolwa.
7 Wanena’mba: “Wikabule.” Ebiya waolola kuboko kwandi wekasela.
8 Penepa mulopwe wa Shidea wakalwa divita na Isalela.+ Wesamba na bengidi bandi amba: “Nsa kutūla nenu nkambi ku kifuko kampanda ne ku kifuko kankenge.”
9 Ino muntu wa Leza wa bine+ watuma musapu kudi mulopwe wa Isalela, kanena’mba: “Dyumuka kokapityila ku kifuko kampanda, mwanda bene Shidea basa kutūkila’ko.”
10 Penepo mulopwe wa Isalela watuma musapu ku kifuko kyamudyumwine’ko muntu wa Leza wa bine. Aye wadi umudyumuna’nka kumudyumuna, nandi kaendele’kopo misunsa mivule mine.*+
11 Kino kyalobeja bininge mulopwe* wa Shidea, ponkapo waityija bengidi bandi kaebanena’mba: “Nsapwilei! Le i ani motudi muno udi ku mutamba wa mulopwe wa Isalela?”
12 Mwingidi wandi umo wamulondolola’mba: “I kutupu nansha umo motudi, abe mfumwami mulopwe! I Edisha mupolofeto wa mu Isalela usapwilanga mulopwe wa Isalela myanda yowisambanga mu kyumba kyobe kya kulāla’mo.”+
13 Wanena’mba: “Endai mukakimbe kwadi, mwanda wa ntume’ko bantu bamukwate.” Mwenda mafuku bamusapwila’mba: “Udi ku Dotani.”+
14 Ponkapo watuma’ko tubalwe ne makalo a divita, pamo ne kibumbo kikatampe kya bulwi; kyafika bufuku kyajokoloka kibundi.
15 Mwingidi wa muntu wa Leza wa bine pa kubūka lubanga bininge watamba panja, wamona kibumbo kikatampe pamo ne tubalwe ne makalo a divita ajokolokele kibundi. Ponkapo mwingidi wamunena’mba: “Yō, a mfumwami! Le tusa kulonga namani?”
16 Ino aye wamunena’mba: “Kokikwatwa moyo!+ Mwanda boba botudi nabo i bangi kupita boba bobadi nabo.”+
17 Kupwa Edisha washilula kulombela kanena’mba: “A Yehova, mupūtule’po bidi meso amba amone.”+ Ponkapo Yehova wapūtula meso a mwingidi wamona, kadi tala! ntanda ya ngulu yadi miyule tubalwe ne makalo a divita a mudilo+ bijokolokele Edisha.+
18 Bene Shidea pa kutūkila kwadi, Edisha walombela Yehova amba: “Nakwisāshila, ela uno muzo kafi.”+ Penepo nandi webela kafi, monka mwalombēle’kyo Edisha.
19 Ebiya Edisha webanena’mba: “Ke ku dino dishindapo, kadi ke ku kino kibundipo. Nondei nkemutwale kudi muntu omusaka.” Ino aye waenda nabo ku Samadia.+
20 Abo pa kufika mu Samadia, Edisha wanena’mba: “A Yehova pūtula meso abo amba bamone.” Ebiya Yehova wapūtula meso abo, bamona’mba badi mu bukata bwa Samadia.
21 Mulopwe wa Isalela pa kwibamona, wanena Edisha amba: “A tata, le nebatape, nebatape?”
22 Ino aye amba: “Aa, kufwaninwepo kwibatapa. Le utapanga na kipete kyobe ne muketo obe boba bokwatanga bu misungi? Wibape mikate ne mema amba badye batome+ kupwa bajokele kudi mfumwabo.”
23 Ebiya webasobela masobo makatampe, badya batoma, kupwa webaleka bende bajokele kudi mfumwabo. Kadi bibumbo bya bañonaona bya bene Shidea+ kebyasomwenwepo kutwela monka mu ntanda ya Isalela.
24 Kupwa Bene-Hadada mulopwe wa Shidea wakongakanya kibumbo kyandi kya divita kyonso,* wakanda kutēkela Samadia kasāla.+
25 Penepa kwapona kipupo kikatampe kya nzala+ mu Samadia, kadi bekitēkela kasāla kufika ne byadi kebipotwe mutwe wa mpunda+ ku bibese 80 bya ndalama, ne kipimo kimo kya kabe* kya bityololo bya bankunda kyadi kekipotwe ku bibese 5 bya ndalama.
26 Mulopwe wa Isalela paadi upita pa lubumbu, mwana-mukaji umo wamwela lubila’mba: “Witukwashe a mfumwami mulopwe!”
27 Ponkapo wamutentulula’mba: “Shi Yehova kakukweshepo, le i kwepi konkatana bya kukukwasha nabyo? Le i ku kipūdilo? Nansha le i ku kyengelo kya vinyu nansha kya māni, a?”
28 Mulopwe wamwipangula’mba: “Le i mwanda’ka odi nao?” Nandi watentulula’mba: “Uno mwana-mukaji waunenene amba, ‘Leta obe mwana tumudye dyalelo, wami mwana nandi tumudye kesha.’+
29 Penepa twatēkele wami mwana twamudya.+ Difuku dilonda’ko namunena’mba, ‘Leta obe mwana nandi tumudye.’ Ino aye wafi wandi mwana.”
30 Ino mulopwe pa kwivwana’tu binenwa bya mwana-mukaji’wa, wasana bivwalwa byandi.+ Paadi upita pa lubumbu, bantu bamumona uvwele masāka munshi mwa bisandi byandi.*
31 Kupwa wanena’mba: “Leza anongele monka ne kubweja’ko shi mutwe wa Edisha mwanā Shafata ushale pādi dyalelo’di!”+
32 Edisha wadi ushikete mu yandi njibo, kadi bakulumpe badi bashikete nandi. Penepo mulopwe watangidija muntu kumeso, ino padi kepafikile mukendi, Edisha wanena bakulumpe amba: “Le mubamone uno mwanā ntapañani+ mwaatumina muntu wa kuntēta mutwe? Tai mutyima, pasa kwiya mukendi mushite ku kibelo, lekai kibelo kishite amba kakitwela. Mwene mishindo ya maulu a mfumwandi idi kunyuma kwandi?”
33 Paadi’tu ukīsamba nabo, mukendi’wa wafika paadi, ebiya mulopwe wanena’mba: “Kino kyamalwa kitambanga kudi Yehova. Kyongilaijija monka Yehova i kika?”
Kunshi kwa Dyani
^ Nansha’mba “kutabuka musunsa umo nansha ibidi.”
^ Kishima pa kishima i, “mutyima wa mulopwe.”
^ Kishima pa kishima i, “nkambi.”
^ Kabe imo i litele 1,22 (kwatyi 1,11 ya byūmu). Tala Mbwejo B14.
^ Nansha’mba “munshi, kubwipi na lukoba lwandi.”
