Balopwe wa Bubidi 7:1-20
7 Penepo Edisha wanena’mba, “Ivwana kinenwa kya Yehova. Yehova wanena namino amba: ‘Kesha dya mu kino kitatyi’ki pa kibelo* kya Samadia, kipimo kimo kya sea* kya bukula bupēla kikapotwa ku shekele imo,* ne bipimo bibidi bya sea bya mebele a buluba bikapotwa ku shekele imo.’”+
2 Ponkapo sola mukwashi wadi ukulupilwe na mulopwe wanena muntu wa Leza wa bine amba: “Nansha shi Yehova washitula malolo mūlu, le kino* kibwanya’tu kulongeka?”+ Penepo nandi wanena’mba: “Usa kwibimona na meso,+ ino kusapo kudya’byo.”+
3 Kwadi ba makopo baná ku ntwelelo ya kibelo kya kibundi,+ badi kebenena abo bene na bene amba: “Kyotushikatyile pano enka ne byotufwa i kika?
4 Shi tunene amba, ‘Tutwele mu kibundi,’ ayo nzala ikidi mu kibundi,+ tusa kufwila’mo. Kadi shi tushikate pano, tusa’nka kufwa. Shi ke pano twendei mu nkambi ya bene Shidea. Shi abetupandija, tusa kwikala bōmi, ino shi abetwipaya, nabya tufwe.”
5 Penepo batamba pa kapita i kāni batwela mu nkambi ya bene Shidea. Abo pa kufika kufula kwa nkambi ya bene Shidea, batana kutupu muntu.
6 Mwanda Yehova walengeje nkambi ya bene Shidea ivwane mishindo ya makalo ne ya tubalwe twa divita, lunwa lwa kibumbo kikatampe kya divita.+ Kebenena abo bene na bene amba: “Tala! Mulopwe wa Isalela wafuta balopwe ba bene Hiti ne balopwe ba Edipito bāye betutambe divita!”
7 Ponkapo bataluka banyema pa kapita i kāni, bashiya mapema abo, tubalwe, ne bampunda, ne nkambi yonso’nka moyadi ikadile, banyema mwanda wa kupandija būmi bwabo.*
8 Bano ba makopo pa kufika kufula kwa nkambi, batwela mu pema umo bashilula kudya ne kutoma. Basela’mo ndalama ne olo ne bivwalwa baenda bakebifya. Kupwa bajoka batwela mu pema mukwabo basela bintu byadi’mo baenda bakebifya.
9 Mfulo mfulō kebenena abo bene na bene amba: “Byotulonga’bi ke biyampepo. Dino i difuku dya myanda miyampe! Shi tulejeleje twilaije’nka ne byobukya, nabya tusa kupebwa mfuto. Shi ke pano twayai tukasapule kino ku njibo ya mulopwe.”
10 Ebiya baenda baita batulama ba ku kibelo kya kibundi kebebasapwila’mba: “Tubakatwelanga mu nkambi ya bene Shidea, ino kemwadipo muntu nansha umo—ketwivwenepo muntu nansha umo. Mwadi’nka tubalwe ne bampunda bakute ne mapema mashale’nka moadi ekadile.”
11 Ponkapo batulama ba ku kibelo baela lubila, ebiya basapula myanda’ya mu njibo ya mulopwe.
12 Ponka na ponka mulopwe wabūka bufuku kanena bengidi bandi amba: “Leka nemusapwile byetulonga bene Shidea. Bayukile amba tudi na nzala,+ o mwanda abashiye nkambi abakafyama mu ntanda, kebanena’mba, ‘Basa kutamba mu kibundi, netu tusa kwibakwata bōmi tutwele mu kibundi.’”+
13 Kupwa mwingidi umo wanena’mba: “Nakwisāshila, leka bana-balume bamo basele tubalwe tutano ku tubalwe tushele mu kibundi. Tala! Bakafula pamo’nka bwa kibumbo kyonso kya Isalela kishala muno. Tala! Bakafula pamo’nka bwa kibumbo kyonso kya Isalela kyafwa. Nanshi twibatume bende tutale.”
14 Penepo basela makalo abidi pamo ne tubalwe, mulopwe webatuma bende ku nkambi ya bene Shidea, kanena’mba: “Endai mukatale.”
15 Bebalonda kufika ne ku Yodano, kadi mu dishinda monso mwadi muyule bivwalwa ne bipungwa byaelele bene Shidea pobadi banyema na moyo. Mikendi’ya yajoka yasapwila’mo mulopwe.
16 Penepo bantu batamba bakatūta nkambi ya bene Shidea, enka ne byadi kebipotwe kipimo kimo kya sea ya bukula bupēla ku shekele imo, ne bipimo bibidi bya sea bya mebele a buluba nabyo kebipotwe ku shekele imo, mungya kinenwa kya Yehova.+
17 Mulopwe watongele sola mukwashi waadi ukulupile’wa bu wa kulama ku kibelo, ino bantu bamutyampakanya wafwila pa kibelo, monka mwanenene’kyo muntu wa Leza wa bine kudi mulopwe paatūkīle kwaadi.
18 Byalongeka’nka na mobasapwidile’kyo mulopwe kudi muntu wa Leza wa bine amba: “Bipimo bibidi bya sea bya mebele a buluba bikapotwa ku shekele imo, ne kipimo kimo kya sea kya bukula bupēla kikapotwa ku shekele imo kesha mu kino kitatyi’ki pa kibelo kya Samadia.”+
19 Ino sola mukwashi wanena muntu wa Leza wa bine amba: “Nansha shi Yehova washitula malolo mūlu, le kintu kya uno muswelo* kibwanya’tu kulongeka?” Ino Edisha wanenene amba: “Usa kwibimona na meso obe, ino kusapo kudya’byo.”
20 Kino kyamufikīle enka nabya, mwanda bantu bamutyampakenye wafwila pa kibelo.
Kunshi kwa Dyani
^ Nansha’mba “mansoko.”
^ Sea imo i malitele 7,33 (makwatyi 6,66 a byūmu). Tala Mbwejo B14.
^ Shekele imo i mangalame 11,4. Tala Mbwejo B14.
^ Kishima pa kishima i, “kino kinenwa.”
^ Nansha’mba “myuya yabo.”
^ Kishima pa kishima i, “kinenwa bwa kino.”
