Balopwe wa Bubidi 8:1-29
8 Edisha wanena mwana-mukaji waasangwidile* mwana’mba:+ “Taluka wende, abe ne ba mu njibo yobe, kashikate bu mweni konso kobwanya kushikata, mwanda Yehova walaa kipupo kya nzala,+ kadi kisa kufika mu ino ntanda myaka isamba-ibidi.”
2 Ebiya mwana-mukaji’wa wataluka walonga byamunenene muntu wa Leza wa bine. Waenda na ba mu njibo yandi wakashikata mu ntanda ya bene Fidishitia+ myaka isamba-ibidi.
3 Ku mfulo kwa myaka isamba-ibidi, mwana-mukaji watamba ku ntanda ya bene Fidishitia waenda kukazenza mulopwe pa mwanda wa njibo yandi ne budimi bwandi.
4 Penepa mulopwe wadi wisamba na Ngehazi mwingidi wa muntu wa Leza wa bine, kanena’mba: “Nsekunwine’po bidi bintu byonso bikatakata byalongele Edisha.”+
5 Aye paadi usekunwina mulopwe mwaasangwidile muntu mufwe,+ mwana-mukaji mwine obasangwidile mwana wafika kwa mulopwe, kamuzenze pa mwanda wa njibo yandi ne budimi bwandi.+ Ponkapo Ngehazi wanena’mba: “Mfumwami mulopwe, uno ye mwana-mukaji’wa, kadi uno ye mwana mwine obasangwile kudi Edisha.”
6 Penepo mulopwe waipangula mwana-mukaji, nandi wamusekunwina myanda’ya. Kupwa mulopwe wamupa mwingidi wa bulēme wa mu kipango, wamusapwila’mba: “Mujokejeje bintu byandi byonso ne bintu byonso bya mu budimi tamba difuku dyaatalukile mu ino ntanda kufika ne pano.”
7 Edisha waiya ku Damakasa+ kitatyi kyadi kibela Bene-Hadada+ mulopwe wa Shidea. Bamusapwila’mba: “Muntu wa Leza wa bine+ i mwiye kuno.”
8 Ponkapo mulopwe wanena Hazaele+ amba: “Sela byabuntu wende ukasambakane muntu wa Leza wa bine.+ Ipangula Yehova kupityila kwadi amba, ‘Le nsa kukoma ku ino misongo?’”
9 Hazaele wakesambakana nandi wasela ne byabuntu, bintu biyampe bya Damakasa bya miswelo ne miswelo, biselwa na bangamedia 40. Waiya waimana ku meso andi kanena’mba: “Obe mwana, Bene-Hadada mulopwe wa Shidea wantume kodi kukwipangula’mba, ‘Le nsa kukoma ku ino misongo?’”
10 Edisha wamulondolola’mba: “Enda kamusapwile amba, ‘Na bubine usa kukoma,’ inoko Yehova wanombola’mba na bubine usa kufwa.”+
11 Penepo wamubambila meso sō enka ne byaafwile bumvu. Kupwa muntu wa Leza wa bine kadila.
12 Hazaele waipangula’mba: “A mfumwami kyodidila i kika?” Nandi amba: “Mwanda ndyukile bibi byokalonga bantu ba Isalela.+ Bifuko byabo bikomejibwe ukebisōka na mudilo, bantu babo balumbuluke ukebatapa na kipete, babo bana ukebasonsakanya bisesobiseso, ne babo bana-bakaji ba memi ukebasaba mafu.”+
13 Hazaele wanena’mba: “Le mwingidi obe udi bwa mbwa wa bituputupu ubwanya kulonga bino bintu namani?” Ino Edisha wanena’mba: “Yehova wanombola’mba usa kwikala mulopwe pa Shidea.”+
14 Kupwa washiya Edisha wajokela kudi mfumwandi, nandi wamwipangula’mba: “Le Edisha wakulombola bika?” Nandi amba: “Wanombola’mba na bubine usa kukoma.”+
15 Ino kufika kesha, Hazaele wayata mpūto weitubika mu mema wamupūta’yo* mu mpala enka ne byaafwile.+ Ebiya Hazaele wabikala pa kyandi kyaba.+
16 Mu mwaka wa butano wa Yeholama+ mwanā Ahaba mulopwe wa Isalela, papo Yehoshafata wadi mulopwe wa Yuda, Yeholama+ mwanā Yehoshafata mulopwe wa Yuda wabikala.
17 Wadi na myaka 32 paabikele, wabikele myaka mwānda mu Yelusalema.
18 Wanangīle mu dishinda dya balopwe ba Isalela,+ enka mwalongēle bantu ba mu njibo ya Ahaba,+ mwanda mwanā Ahaba ye waikele ke wandi mukaji;+ kadi wadi ulonga nyeke bibi ku meso a Yehova.+
19 Ino Yehova kadipo usaka konakanya Yuda pa mwanda wa mwingidi wandi+ Davida, mwanda wamulaile kumupa kinanu aye+ ne bandi bana nyeke ne nyeke.
20 Mu andi mafuku Edoma watombokela Yuda,+ webikikila aye mwine mulopwe.+
21 Ebiya Yeholama waabukila ku Zaila na makalo andi onso, wabūka bufuku wanekenya bene Edoma badi bamujokolokele ne bakata ba makalo; penepo bibumbo bya basola byanyemena mu mapema abyo.
22 Ino Edoma waendelela kutombokela Yuda kufika ne dyalelo. Dibena+ nandi watombokele mu kine kitatyi’kya.
23 Kadi myanda mikwabo ya mānga ya Yeholama, byonso byaalongele, mwene i milembwe mu mukanda wa mānga ya bitatyi bya balopwe ba Yuda?
24 Kupwa Yeholama walādikwa mwanda wa kukōkolokwa na bakulutuba bandi, wajīkwa na bakulutuba bandi mu Kibundi kya Davida.+ Ebiya wandi mwana Ahazia+ wabikala pa kyandi kyaba.
25 Mu mwaka wa 12 wa Yeholama mwanā Ahaba mulopwe wa Isalela, Ahazia mwanā Yeholama mulopwe wa Yuda wabikala.+
26 Ahazia wadi na myaka 22 paabikele, wabikele mwaka umo mu Yelusalema. Dijina dya inandi i Atadia+ munkanā* Omidi+ mulopwe wa Isalela.
27 Wanangīle mu dishinda dya njibo ya Ahaba+ kadi wadi ulonga nyeke bibi ku meso a Yehova, pamo bwa njibo ya Ahaba, mwanda wadi ubutulwa na njibo ya Ahaba kupityila ku busongi.+
28 Penepo waenda na Yeholama mwanā Ahaba kukalwa divita na Hazaele mulopwe wa Shidea ku Lamote-Ngileade,+ ino bene Shidea batapa Yeholama bilonda.+
29 Penepa Mulopwe Yeholama wajokela ku Yezelele+ kukeundapija bilonda byamutapile bene Shidea ku Lama paadi ulwa na Hazaele mulopwe wa Shidea.+ Ahazia mwanā Yeholama mulopwe wa Yuda watūkila ku Yezelele kukatala Yeholama mwanā Ahaba, mwanda wadi mutapwe bilonda.*
Kunshi kwa Dyani
^ Nansha’mba “waajokejeje ku būmi.”
^ Nansha’mba “wamutūla’yo.”
^ Kishima pa kishima i, “mwana mwana-mukaji wa.”
^ Nansha’mba “wadi ubela.”
