Balopwe wa Bubidi 9:1-37
9 Penepo mupolofeto Edisha waityija umo wa mu bana ba bapolofeto kamunena’mba: “Wikute bivwalwa byobe mu kifuka, sela bukidi kano katyibi ka māni wende ku Lamote-Ngileade.+
2 Shi ubafika kwine’kwa, kimba Yehu+ mwanā Yehoshafata mwanā Nimishi; twela umwimike mu bukata mwa banababo umutweje mu kyumba kya munda bininge.
3 Kupwa usele katyibi ka māni umupungulwile’o pa mutwe, unene amba, ‘Yehova wanena namino amba: “Nakushinga māni kodi mulopwe pa Isalela.”’+ Penepa ushitule kibelo unyeme pampikwa kulejaleja.”
4 Ebiya mwingidi wa mupolofeto waenda ku Lamote-Ngileade.
5 Aye pa kufika, bakata ba kibumbo kya divita badi bashikete kwine’kwa. Wanena’mba: “Abe mukulumpe ngidi na musapu obe.” Yehu waipangula’mba: “Le i musapu wa ani potudi’pa?” Nandi amba: “I obe, abe mukulumpe.”
6 Ponkapo Yehu waimana watwela mu njibo; mwingidi wamupungulwila māni pa mutwe kamunena’mba, “Yehova Leza wa Isalela wanena namino amba: ‘Nakushinga māni kodi mulopwe pa bantu ba Yehova, ke pa Isalela kadi.+
7 Ufwaninwe kutapa njibo ya mfumobe Ahaba, kadi nsa kulubula kinongo kya mashi a bengidi bami bapolofeto ne bengidi bonso ba Yehova bafwile ku makasa a Yezebele.+
8 Njibo yonso ya Ahaba isa kukuba; kadi nsa kutukija mwana-mulume yense* kwa Ahaba, ne mufudile ne muzoze mwine kumo mu Isalela.+
9 Nkalonga njibo ya Ahaba pamo bwa njibo ya Yeloboame+ mwanā Nebata ne pamo bwa njibo ya Baasha+ mwanā Ahiya.
10 Yezebele nandi, bambwa bakamudīla mu kapindi ka ntanda ka Yezelele,+ kadi i kutupu ukamujīka.’” Ponkapo washitula kibelo kaenda lubilo.+
11 Yehu pa kujokela kudi bengidi ba mfumwandi, bamwipangula’mba: “Le byonso bidi biyampe? Kyailanga uno mulembakane kodi i kika?” Nandi webalondolola’mba: “Muyukile kala uno muntu mwaikadile ne mwanenenanga.”
12 Ino abo banena’mba: “Ke bya binepo! Witusapwile’tu.” Penepa wanena’mba: “Waunombolanga bino, kupwa wabwejanga’ko amba, ‘Yehova wanena namino amba: “Nakushinga māni kodi mulopwe pa Isalela.”’”+
13 Ponkapo abo bonso bakasela bukidi bivwalwa byabo bebyala munshi mwandi pa lukala lwampikwa kwala’po kintu,+ kebēle lusengo koku banena’mba: “Yehu ke mulopwe!”+
14 Ebiya Yehu+ mwanā Yehoshafata mwanā Nimishi wakutyila Yeholama kitumba.
Yeholama wadi ukatengēle ku Lamote-Ngileade,+ aye ne Isalela yense mwanda wa Hazaele+ mulopwe wa Shidea.
15 Mwenda mafuku Mulopwe Yeholama wajokela ku Yezelele+ mwanda wa kwiundapija bilonda byamutapile bene Shidea paakalwile na Hazaele mulopwe wa Shidea.+
Penepo Yehu wanena’mba: “Shi mwitabije,* kemwakalekai muntu nansha umo anyeme mu kibundi ende akasapule kino mu Yezelele.”
16 Kupwa Yehu wakanda pa dikalo dyandi waenda ku Yezelele, mwanda Yeholama wadi ulēle kwine’kwa mutapwe bilonda, kadi Ahazia mulopwe wa Yuda watūkile kukamona Yeholama.
17 Mulami wadi wimene pa kiteba mu Yezelele, wamona kibumbo kikatampe kya bantu ba Yehu kīya kifwena. Ponkapo wanena’mba: “Namone kibumbo kikatampe kya bantu.” Yeholama nandi wanena’mba: “Sela’ko sola wa pa kabalwe umutume akesambakane nabo, ebanene amba, ‘Le mubaiya mu ndoe?’”
18 Penepo yewa ukandanga pa kabalwe waenda kukamusambakana kanena’mba: “Mulopwe wanena namino amba, ‘Le ubaiya mu ndoe?’” Ino Yehu aye amba: “Le myanda ya ‘ndoe’ ikutala namani? Pita kunyuma kwami!”
Kupwa mulami wasapula’mba: “Mukendi webatana inoko kajokelepo.”
19 Ebiya watuma muntu wa bubidi ukandanga pa kabalwe, aye pa kufika kobadi wanena’mba: “Mulopwe wanena namino amba, ‘Le mubaiya mu ndoe?’” Ino Yehu wanena’mba: “Le myanda ya ‘ndoe’ ikutala namani? Pita kunyuma kwami!”
20 Penepa mulami wasapula’mba: “Webatana, inoko kajokelepo, kadi mwendejejo udi pamo bwa mwendejejo wa Yehu munkanā* Nimishi, mwanda wendejanga’nka bwa kilubi.”
21 Yeholama wanena’mba: “Teakanya! Penepo wateakanya dikalo dyandi dya divita, kadi Yeholama mulopwe wa Isalela ne Ahazia+ mulopwe wa Yuda batamba muntu ne muntu pa dikalo dyandi dya divita bakasambakana Yehu. Bamutana mu kapindi ka ntanda ka Nabote+ mwine Yezelele.
22 Yeholama pa kumona’tu Yehu, wanena’mba: “Le ubaiya mu ndoe, a Yehu?” Ino aye amba: “Le ndoe ibwanya kwikala’ko namani koku busekese bwa inobe Yezebele+ ne butyi bwandi bungi konka?”+
23 Ponkapo Yeholama waalamuna dikalo dyandi kanyema, kupwa wanena Ahazia amba: “Tubadimbwe, abe Ahazia!”
24 Yehu wasela buta bwa miketo mu makasa waasa Yeholama pa bukata bwa bipuji, penepa muketo watambila pa mutyima, ponkapo nandi waponena mu dikalo dyandi dya divita.
25 Kupwa wanena Bidikale sola wandi mukwashi amba: “Mutekune ukamwele mu budimi bwa Nabote mwine Yezelele.+ Vuluka, abe ne ami twadi twendeja makalo pamo* kunyuma kwa shandi Ahaba panenene Yehova uno musapu pa mwanda wandi amba:+
26 “Monka monamwenine mashi a Nabote+ ne mashi a bandi bana kesha,” i Yehova unena, “Mo monsa kukujokejeja kinongo+ enka mu kano kapindi ka ntanda’ka,” i Yehova unena.’ Shi ke pano mutekune ukamwele mu kapindi ka ntanda, mungya kinenwa kya Yehova.”+
27 Ahazia+ mulopwe wa Yuda pa kumona byalongeka, wanyemena ku dishinda dya ku njibo ya budimi. (Kupwa Yehu wamulonda lubilo kanena’mba: “Mutapei nandi!” Ponkapo bamutapila mu dikalo paadi wenda dya ku Ngule, kibundi kidi dya ku Ibeleame.+ Ino aye wanyema’nka kunyema kufika ne ku Mekido wakafwila konka.
28 Ebiya bengidi bandi bamuselela ku Yelusalema mu dikalo, bamujīka mu mutá wandi pamo na bakulutuba bandi mu Kibundi kya Davida.+
29 Ahazia+ wabikele pa Yuda mu mwaka wa 11 wa Yeholama mwanā Ahaba.)
30 Paile Yehu ku Yezelele,+ Yezebele+ waivwana’o. Ebiya weshinga bifīta* mu meso, welongolola ku mutwe wandi katale panshi dya pa dididisha.
31 Yehu pa kutwelela pa kibelo, Yezebele wanena’mba: “Le byapityīle Zimidi biyampe, mwine waipaile mfumwandi?”+
32 Yehu watulwila meso pa dididisha kanena’mba: “Le i ani udi ku wami mutamba? Le i ani?”+ Ponkapo bengidi ba bulēme ba mu kipango babidi nansha basatu bamutala munshi.
33 Wanena’mba: “Mwelei pa nshi!” Nabo bamwela pa nshi, mashi andi amo asampukila ku lubumbu ne ku tubalwe, nandi wamutyampakanya.
34 Penepa watwela, wadya watoma. Kupwa wanena’mba: “Kakwatakanyei uno mwana-mukaji mufingwe mafingo, kamujīkei. Ke-pantu i mwanā mulopwe mwana-mukaji.”+
35 Abo pa kwenda’mba bakamujīke, kebatenepo kintu nansha kimo poso’nka kabamba ka mutwe ne binyantyilo ne bikasala bya maboko andi kete.+
36 Pobajokele bamusapwila’mo, nandi wanena’mba: “Kino kibafikidija byanenene Yehova+ kupityila kudi mwingidi wandi Ediya mwine Tishibi amba, ‘Bambwa bakadya umbidi wa Yezebele mu kapindi ka ntanda ka Yezelele.+
37 Kadi umbidi mufwe wa Yezebele ukekala bu mboleo pangala pa budimi mu kapindi ka ntanda ya Yezelele, kutyina bakanena’mba: “Uno i Yezebele.”’”
Kunshi kwa Dyani
^ Kishima pa kishima i, “muntu ense usukwila ku lubumbu.” I muneneno wa mu Kihebelu wa kufutulula bana-balume.
^ Nansha’mba “muya wenu witabije.”
^ Kishima pa kishima i, “mwanā.”
^ Kishima pa kishima i, “bisumpi bikandanga.”
^ Nansha’mba “tupenta twa pa bikopelo.”
