Bilongwa bya Mafuku wa Bubidi 10:1-19
-
Isalela watombokela Lehaboma (1-19)
10 Lehaboma waenda ku Shekema,+ mwanda Isalela yense waile kumubikika ku Shekema.+
2 Yeloboame+ mwanā Nebata pa kwivwana’tu uno mwanda (wadi ukidi mu Edipito ke-pantu wanyemene pa mwanda wa Mulopwe Solomone),+ Yeloboame wajoka kutamba ku Edipito.
3 Penepo bamwityija, Yeloboame ne Isalela yense baiya kudi Lehaboma, kebanena’mba:
4 “Shobe wetulēmeneje lupungu.+ Ino shi abe witupēlejeje’ko mwingilo mukomo wa shobe ne kwitupēlejeja’ko lupungu lulēma* lwaetutwikile, nabya tukakwingidila.”
5 Ebiya webanena’mba: “Jokelai kondi kupwa kwa mafuku asatu.” Ponkapo bantu baenda.+
6 Kupwa Mulopwe Lehaboma wesamba na bana-balume banunu* baingidile shandi Solomone paadi ukidi mūmi, webepangula’mba: “Le i madingi’ka omusa kuleta mwa kulondolwela bano bantu?”
7 Nabo bamulondolola’mba: “Shi wikale biyampe na bano bantu kadi wibasangaje ne kwibalondolola biyampe, nabya bakekala nyeke bengidi bobe.”
8 Inoko wapela madingi amudingile bana-balume banunu,* wakesamba na bansongwalume baatamine nabo badi pano ke bengidi bandi.+
9 Webepangula’mba: “I madingi’ka omusa kuleta’po tuyuke mwa kulondolwela bano bantu baunenene amba, ‘Witupēlejeje’ko lupungu lwetutwikile shobe’?”
10 Bansongwalume baatamine nabo bamunena’mba: “Bino byo byokasapwila bantu bakunenene amba, ‘Shobe wetulēmeneje lupungu, ino abe ufwaninwe kwitupēlejeja’lo’; ukebalondolola namino amba, ‘Kamindwa kami kakekala kakatampe kupita kifuka kya tata.
11 Tata wemutwikile lupungu lulēma, ino ami nsa kubweja ku lupungu lwenu. Tata wemupele mfuto na kwimukupila nsonde, ino ami nsa kwimupa mfuto na kwimukupila nsonde ya biseba.’”
12 Yeloboame ne bantu bonso baiya kudi Lehaboma mu difuku dya busatu, monka mwanenene mulopwe amba: “Jokelai kondi mu difuku dya busatu.”+
13 Ino mulopwe webalondolola na kasumalomo. Enka nenki Mulopwe Lehaboma wapela madingi amudingile bana-balume banunu.*
14 Wesamba nabo mungya madingi a bansongwalume amba: “Ami nsa kulēmejeja’ko lupungu lwenu, ne kubweja’ko. Tata wemupele mfuto na kwimukupila nsonde, ino ami nsa kwimupa mfuto na kwimukupila nsonde ya biseba.”
15 Enka nenki mulopwe kaivwenepo bantu, mwanda Leza wa bine+ walengeje ino myanda yalamuke namino, mwanda wa kufikidija kinenwa kyanenene Yehova kupityila kudi Ahiya+ mwine Shilona kudi Yeloboame mwanā Nebata.
16 Ino Isalela yense, mulopwe byaapelele kwibevwana, bantu batentulula mulopwe amba: “Le i kyepelo’ka kyotudi nakyo mudi Davida? Ketudipo na bupyani mudi mwanā Yese. A Isalela, muntu ne muntu ende kudi baleza bandi! A Davida,+ pano sasaketa njibo yobe abe mwine.” Enka nenki Isalela yense wajokela kwabo.*+
17 Ino Lehaboma waendelela kubikala bene Isalela badi bashikete mu bibundi bya Yuda.+
18 Kupwa Mulopwe Lehaboma watuma Hadolamu,+ wadi utala boba baselelwe kwingila mingilo ya kuningilwa, ino bene Isalela bamwasa mabwe wafwa. Mulopwe Lehaboma wakanda pa dikalo dyandi wanyemena ku Yelusalema.+
19 Kadi bene Isalela batombokela njibo ya Davida kufika ne dyalelo.
Kunshi kwa Dyani
^ Nansha’mba “lwa kasusu.”
^ Nansha’mba “bakulumpe.”
^ Nansha’mba “bakulumpe.”
^ Nansha’mba “bakulumpe.”
^ Kishima pa kishima i, “ku mapema abo.”
