Samwele wa Bubidi 1:1-27
1 Kupwa kwa lufu lwa Solo, pajokele Davida kwaadi ukanekenye* bene Amaleke, Davida washele ku Zikelake+ mafuku abidi.
2 Mu difuku dya busatu, kwaiya muntu umo utamba ku nkambi ya Solo na bivwalwa bisanike ne luvumbi ku mutwe. Aye pa kufwena kwadi Davida, wapona pa nshi kaevukwila.
3 Davida wamwipangula’mba: “Le utamba kwepi?” Nandi walondolola’mba: “Nanyemanga ku nkambi ya Isalela.”
4 Davida wamwipangula’mba: “Le bibapite namani? Nsapwile’po bidi.” Nandi amba: “Bantu abanyema ku bulwi, bavule abapone kadi abafu. Ne ba Solo ne wandi mwana Yonafane bene abafu.”+
5 Penepo Davida waipangula nsongwalume wamuletēle musapu’wa amba: “Le ubayuka namani amba Solo ne wandi mwana Yonafane abafu?”
6 Nsongwalume’wa wamulondolola’mba: “Na bya dyese nadi pa Lūlu lwa Ngidiboa,+ namona Solo usendaledile ku mukobe wandi, kadi makalo ne bantu ba pa tubalwe bamupeta.+
7 Ino aye pa kuvundamuka waumona, wangita, nami naitaba’mba, ‘Kalombo!’
8 Waungipangula’mba, ‘Le wi ani?’ Nami nalondolola’mba, ‘Ne mwine Amaleke.’+
9 Kupwa wanena’mba, ‘Nakwisāshila fwena kuno ungipaye, mwanda ndi na misanshi mikatampe inoko nakidi mūmi.’*
10 Ebiya namufwena namwipaya,+ mwanda nadi ndyukile amba kasapo kupanda pa kupwa kupona mutapwe bilonda. Kupwa nasela kilukwa* kyadi ku mutwe wandi ne luzenze lwadi ku kuboko kwandi, nebileta kuno kudi mfumwami.”
11 Penepo Davida wakwata bivwalwa byandi webisana, kadi ne bantu bonso baadi nabo balongela monka.
12 Badila ne kuyoyokota, kadi bashikilwa na nzala+ kufika ne ku kyolwa mwanda wa Solo, ne wandi mwana Yonafane, ne wa bantu ba Yehova, ne mwanda wa njibo ya Isalela,+ ke-pantu baponene ku kipete.
13 Davida waipangula nsongwalume wamuletēle musapu’wa amba: “Le wi wa kwepi?” Nandi amba: “Ne mwanā mweni umo wa kibundi mwine Amaleke.”
14 Penepo Davida wamunena’mba: “Mwanda waka kwatyininepo kutulula kuboko kobe kwipaya mushingwe māni wa Yehova?”+
15 Ponkapo Davida waita nsongwalume umo, kanena’mba: “Fwena umutape.” Nandi wamutapa ne kufwa wafwa.+
16 Davida wamunena’mba: “Mashi obe adi pa mutwe obe abe mwine, mwanda kyakanwa kyobe kibakuponeja pa kunena’mba, ‘I ami waipaile+ mushingwe māni wa Yehova.’”
17 Kupwa Davida waimba luno lwimbo lwa bulanda* padi Solo ne padi wandi mwana Yonafane+
18 kanena’mba bantu ba Yuda bafwaninwe kufundijibwa luno lwimbo lwa bulanda lwitwa bu “Buta bwa Miketo,” lulembelwe mu mukanda wa Yashala amba:+
19 “A Isalela, buya bubapone butapwe pa mitenta yobe.+
Yō bakomokomo abapone!
20 Kemukisapulai’o mu Ngata;+Kemwakinenai’o mu bipito bya Ashekelona,Kutyina’mba bana bana-bakaji ba bene Fidishitia bakasangala,Kutyina’mba bana bana-bakaji ba bana-balume ba kubulwa kutwejibwa kwisao bakasepelela.
21 A ngulu ya Ngidiboa,+Kekwakekala lumé nansha mvula pomudi,Nansha madimi kutambija byabuntu bijila,+Mwanda ako ko kwasubijibwa ngabo ya bakomokomo,Ngabo ya Solo keikishingilwepo māni monka.
22 Ku mashi a batapwe, ne ku māni a bakomokomo,Buta bwa miketo bwa Yonafane kebwajokelepo,+Ne kipete kya Solo kekyadipo kijoka pampikwa kunekenya.+
23 Solo ne Yonafane,+ baswedibwe kadi basanshibwe bininge* mu būmi bwabo,Ne mu lufu mwine kebasansenepo.+
Badi lubilo kupita mikebo,+Bakomokomo kupita bantambo.+
24 A bana bana-bakaji ba Isalela, dilai Solo,Wemuvwikile bityila pyā ne bya kwineñenya nabyo,Watūdile bya kwidyangula nabyo bya olo* ku bivwalwa byenu.
25 Yō bakomokomo abapone mu bulwi!
Yonafane walāla mutapwe pa mitenta yobe!+
26 Najingwe mutyima pa mwanda obe, abe mwanetu Yonafane;Wadi mulēme mpata kondi.+
Buswe bobe bwadi bulumbuluke kondi kupita buswe bwa bana-bakaji.+
27 Yō bakomokomo abaponeKadi byabulwi bya divita bibatukila!”
Kunshi kwa Dyani
^ Nansha’mba “ukepaile.”
^ Nansha’mba “mwanda muya wami onso ukidi mondi.”
^ Nansha’mba “nkaka.”
^ Nansha’mba “lwimbo lwa madilo.”
^ Nansha’mba “bayampe.”
^ Nansha’mba “nsahabu.”
