Samwele wa Bubidi 10:1-19
-
Bushindañani pa Amone ne pa Shidea (1-19)
10 Mwenda mafuku mulopwe wa bene Amone+ wafwa, wandi mwana Hanune wabikala pa kyandi kyaba.+
2 Penepo Davida wanena’mba: “Nsa kulombola Hanune mwanā Nahashi buswe bwa ndamatyidile mwaunombwedile shandi buswe bwa ndamatyidile.” Ebiya Davida watuma bengidi bandi bakamusenge pa kujimija kwaajimija shandi. Ino bengidi ba Davida pa kutwela mu ntanda ya bene Amone,
3 bamfumu ba bene Amone banena mfumwabo Hanune amba: “Le ulanga’mba Davida walēmeka shobe pa kukutumina bantu ba kukusenga? Mwene Davida wakutumina bengidi bandi mwanda wa kukimba kuyuka kibundi, kwikibela ne kwikiponeja?”
4 Penepa Hanune wayata bengidi ba Davida webatenda myevu+ kipindi ne kusana bivwalwa byabo pa bukata kufika ne ku matako kupwa webanena bende.
5 Pobasapwidile’byo Davida, nandi watuma ponka na ponka bantu kukebasambakana, mwanda bana-balume’ba bafwijibwe bumvu bininge; kadi mulopwe webasapwidile amba: “Shikatai mu Yediko+ enka ne bimena myevu monka kupwa kemujoka.”
6 Mwenda mafuku bene Amone bamona’mba abaikala kintu kinunka bibi kudi Davida, penepo bene Amone batuma mikendi kadi bafuta bene Shidea wa Bete-Lehobe+ ne bene Shidea wa Zoba,+ basola ba lwa nshi 20 000; ne mulopwe wa Maka+ pamo ne bana-balume 1 000; ne ku Ishitobe* nako bana-balume 12 000.+
7 Davida pa kwivwana’o, watuma Yoabe ne kibumbo kyonso kya divita, kubadila’mo ne ba bulwi bandi bakomokomo kutabuka.+
8 Ebiya bene Amone batamba, bepanga mu milongo ya bulwi ku ntwelelo ya kibelo kya kibundi papo bene Shidea wa Zoba ne wa Lehobe, pamo ne Ishitobe* ne Maka badi kwa abo bene mu ntanda.
9 Yoabe pa kumona’mba basola abamutambe’dyo kunyuma ne kumeso, watonga’ko bibumbo bilumbuluke bya basola mu Isalela, webipanga mu milongo ya bulwi mwa kwisambakena na bene Shidea.+
10 Watūla bana-balume bashele’ko mu lupusa* lwa mwanabo Abishai,+ mwanda wa kwibapanga mu milongo ya bulwi mwa kwisambakena na bene Amone.+
11 Kupwa wanena’mba: “Shi bene Shidea abankomena bininge, nabya ufwaninwe kwiya kunkūla; ino shi nobe bene Amone abakukomena bininge, nabya nsa kwiya kukukūla.
12 Tufwaninwe kwikomeja ne kukankamana+ pa mwanda wa bantu betu ne pa mwanda wa bibundi bya Leza wetu, ne kadi Yehova usa kulonga byobya biyampe ku meso andi.”+
13 Kupwa Yoabe ne bantu bandi bafwena kwisambakana na bene Shidea mu bulwi, nabo banyema ku meso andi.+
14 Bene Amone pa kumona’mba bene Shidea abanyema, nabo banyema ku meso a Abishai bakatwela mu kibundi. Kupwa Yoabe wajoka kwadi bene Amone waiya ku Yelusalema.
15 Bene Shidea pa kumona’mba abanekenibwa na Isalela, bebunga monka.+
16 Ebiya Hadadezele+ waabija bene Shidea ba ku ntanda ya Munonga,*+ kupwa baiya ku Helame, pamo ne Shobake mukata wa kibumbo kya divita kya Hadadezele wibaludika.
17 Musapu pa kufika kudi Davida, ponkapo wakongakanya Isalela ense, waabuka Yodano waiya ku Helame. Bene Shidea nabo bepanga mu milongo ya bulwi mwanda wa kwisambakana na Davida, balwa nandi.+
18 Ino bene Shidea banyema ku meso a Isalela; kadi Davida waipaya bantu 700 bakandanga pa makalo, ne bene Shidea 40 000 bakandanga pa tubalwe, watapa Shobake mukata wa kibumbo kyabo kya divita, wafwila ponka.+
19 Balopwe bonso, bengidi ba Hadadezele, pa kumona’mba abanekenibwa na Isalela, baenda bukidi kukapwana na Isalela, baikala bantu babo;+ bene Shidea badi kebatyina kukwasha monka bene Amone.
Kunshi kwa Dyani
^ Nansha’mba “bana-balume ba Tobe.”
^ Nansha’mba “bana-balume ba Tobe.”
^ Kishima pa kishima i, “mu dikasa.”
^ Ko kunena’mba, Ufalete.
