Samwele wa Bubidi 13:1-39
13 Ino Abisalome mwanā Davida wadi na mwanabo mwana-mukaji muyampe mpala witwa bu Tamala,+ ino Amenone+ mwanā Davida wamusanswa.
2 Amenone wajingwa mutyima bininge, wabela’nka ne kubela pa mwanda wa mwanabo Tamala, mwanda wadi mujike kadi Amenone kadipo ubwanya kumulonga kintu kyo-kyonso.
3 Ino Amenone wadi na mulunda witwa bu Yehonadaba,+ mwanā Shimēa,+ mwanabo na Davida; kadi Yehonadaba wadi muntu wa ñeni bininge.
4 Ebiya wamwipangula’mba: “Mwanda waka, a mwanā mulopwe, unyoñama bininge pa mutyima lubanga ne lubanga? Mwanda waka kunsapwilapo?” Amenone wamulondolola’mba: “Nasanswa Tamala, mwanabo+ na mwanetu Abisalome.”
5 Yehonadaba wamulondolola’mba: “Lāla pa kitanda kyobe wienge kubela. Shi shobe waiya kukutala, mulombole amba, ‘Nakwisāshila, leka mwanetu Tamala āye ampe’ko byakudya. Shi watēka bidibwa bipebwanga ubela* ku meso ami, nsa kwibidīla ku makasa andi.’”
6 Penepo Amenone walāla weenga kubela, mulopwe nandi watwela kumutala. Ebiya Amenone wanena mulopwe amba: “Nakwisāshila, leka mwanetu Tamala atwele kadi atēke mikate ibidi idi bwa mutyima ku meso ami amba ndīle bidibwa ku makasa andi.
7 Ponkapo Davida watuma musapu kudi Tamala ku njibo, amba: “Enda’po ku njibo ya mwanenu Amenone umutēkele bidibwa.”*
8 Ebiya Tamala waenda ku njibo ya mwanabo Amenone, kwine kwaadi ulēle. Wasela mukama weumama bu mikate ku meso andi kupwa watēka mikate.
9 Penepo wayata mpanu kamupe bidibwa. Ino Amenone wapela kudya kanena’mba: “Tambijai bantu bonso mondi!” Ebiya bantu bonso bamutamba’mo.
10 Ebiya Amenone wanena Tamala amba: “Tweja bidibwa* mu kyumba kya kulāla’mo, amba ndīle’byo ku makasa obe.” Penepo Tamala wasela mikate idi bwa mutyima yaalongele waselela’yo mwanabo Amenone mu kyumba kya kulāla’mo.
11 Aye pa kumuselela’yo adye, wamushipila kanena’mba: “Iya, lāla nami, a mwanetu.”
12 Ino Tamala wamunena’mba: “Aa, a mwanetu! Kokamfwija bumvu, mwanda kino kintu kekiloñwangapo mu Isalela.+ Kokalonga kino kintu kya bumvu.+
13 Le nsa kwikala namani na buno bumvu? Kadi nobe ukamonwa pamo bwa umo wa mu bana-balume bazobejibwe mu Isalela. Shi ke pano, nakwisāshila, wisambe na mulopwe mwanda kasapo kupela kumpāna kodi.
14 Ino wapela kumwivwana, kadi wamukomena wamufwija bumvu na kulāla nandi ku bukomo.
15 Penepo Amenone washilula kumushikwa mushikwa mukatampe bininge, kadi mushikwa waamushikilwe watabuka ne buswe bwaamusenswe. Amenone wamunena’mba: “Imana; enda!”
16 Ponkapo Tamala wamunena’mba: “Aa, a mwanetu, mwanda kumpanga koumpanga pano i kubi mpata kupita bintu byowanonga!” Ino aye wapela kumwivwana.
17 Penepo waita mwingidi wandi nsongwalume kanena’mba: “Talula’po uno muntu ku meso ami, kadi shita ne mulango kunyuma kwandi.”
18 (Ino wadi uvwele nkanzo ya pa bula,* mwanda bino byo bivwalwa byadi bivwala bana bana-bakaji bajike ba mulopwe.) Ebiya mwingidi wandi wamulupwila panja washita ne mulango kunyuma kwandi.
19 Kupwa Tamala wetūta buto ku mutwe,+ wasana nkanzo yandi milumbuluke yaadi uvwele; kadi wekwata makasa ku mutwe kaenda, wenda udila.
20 Ponkapo mwanabo Abisalome+ wamwipangula’mba: “Le i mwanenu Amenone wadi nobe? Shi ke pano uba talala, abe mwanetu. Aye i mwanenu.+ Mutyima obe keukilangalanga uno mwanda.” Kupwa Tamala waikala kwandi kwa bunka mu njibo ya mwanabo Abisalome.
21 Mulopwe Davida pa kwivwana bino byonso, waloba bininge.+ Ino kadipo usaka kusanshija wandi mwana Amenone mu milangwe, mwanda wadi umusenswe bininge, ke-pantu ye wadi wandi mwana umbedi.
22 Kadi Abisalome kesambilepo na Amenone kintu nansha kimo, kikale kibi nansha kiyampe; mwanda Abisalome washikilwe+ Amenone mwanda wafwijije mwanabo Tamala bumvu.+
23 Kupwa kwa myaka ibidi mituntulu, boba batendanga mikōko ya Abisalome badi ku Bāla-Hazole, kubwipi na Efelaimi,+ ebiya Abisalome waityija bana bonso ba mulopwe.+
24 Ebiya Abisalome watwela kwa mulopwe kanena’mba: “Mwingidi obe utendejanga mikōko yandi. Nakwisāshila, mulopwe ne bengidi bandi bende nami.”
25 Ino mulopwe wanena Abisalome amba: “Aa, a wami mwana. Shi twende batwe bonso tusa kukulēmeneja kiselwa.” Nansha byaamuningile’nka kumuningila, ino aye kaitabijepo kwenda, ino wamwesela’tu.
26 Penepo Abisalome wanena’mba: “Shi abe kwendapo, nakwisāshila, leka mwanetu Amenone ende netu.”+ Mulopwe wamutentulula’mba: “Mwanda waka ende nobe?”
27 Ino Abisalome wamuzenza, penepa watuma Amenone pamo ne bana bonso ba mulopwe.
28 Penepo Abisalome wasoñanya bengidi bandi amba: “Tadijai, shi mubamone mutyima wa Amenone keusangala mu vinyu, nsa kwimunena’mba, ‘Tapai Amenone!’ Penepa nenu mwipayei. Kemukikwatwa moyo. Mwene i ami wemusoñanya? Mwikomejei kadi kankamanai.”
29 Ebiya bengidi ba Abisalome balonga Amenone monka mwebasoñaninye Abisalome; kupwa bana bakwabo bonso ba mulopwe baimana, muntu ne muntu wakanda pa kimbulu kyandi kanyema.
30 Abo pobadi bakidi mu dishinda, musapu wafika kudi Davida amba: “Abisalome waipaya bana bonso ba mulopwe kutupu nansha umo wapanda.”
31 Penepo mulopwe waimana wasana bivwalwa byandi, walāla pa nshi, kadi bengidi bandi bonso badi bemene kubwipi na bivwalwa byabo bisanike.
32 Ino, Yehonadaba+ mwanā Shimēa,+ mwanabo na Davida, wanena’mba: “Mfumwami kakilanga’mba abaipaya bana bonso bankasampe ba mulopwe, mwanda i enka Amenone ye wafwa.+ Wafu mungya musoñanya wa Abisalome, wakanine kulonga kino+ tamba difuku dyafwijije Amenone mwanabo+ Tamala bumvu.+
33 Shi ke pano, mfumwami mulopwe kakita mutyima* ku musapu wa amba, ‘Bana bonso ba mulopwe abafu’; i enka Amenone ye wafwa.
34 Mu kine kitatyi’kya, Abisalome wanyema.+ Kupwa mulami watulula meso wamona bantu bavule bāya mu dishinda dyadi kunyuma kwandi kubwipi na lūlu.
35 Penepo Yehonadaba+ wasapwila mulopwe amba: “Tala! Bana ba mulopwe abajoka. I enka mwanenenanga’kyo mwingidi obe.”
36 Aye upwa’tu kwisamba, bana ba mulopwe batwela, badila bininge; kadi mulopwe ne bengidi bandi bonso badila bya bulanda mpata.
37 Ino Abisalome wanyema waenda kwa Talamai+ mwanā Amihuda mulopwe wa Ngeshula. Davida wadila wandi mwana mafuku mavule.
38 Kupwa Abisalome wanyema waenda ku Ngeshula,+ washikata’ko myaka isatu.
39 Ku mfulo Mulopwe Davida waabila bininge kwenda kudi Abisalome, mwanda wadi ke mutūkije mutyima* pa lufu lwa Amenone.
Kunshi kwa Dyani
^ Nansha’mba “mukate wa busengi.”
^ Nansha’mba “mukate wa busengi.”
^ Nansha’mba “mukate wa busengi.”
^ Nansha’mba “midyangulwe.”
^ Kishima pa kishima i, “kakitūla ku mutyima wandi.”
^ Nansha’mba “kadi musengibwe kala pa.”
