Samwele wa Bubidi 14:1-33
14 Ino Yoabe mwanā Zeluya+ waivwana’mba mutyima wa mulopwe wabilanga bininge Abisalome.+
2 Penepo Yoabe watuma bantu ku Tekoa+ waityija’ko mwana-mukaji umo wa ñeni, kamusapwila’mba: “Nakwisāshila, wiengelekeje bwa abe udi mu madilo, kadi vwala bivwalwa bya madilo, kokeshinga māni.+ Longa bwa mwana-mukaji udila madilo a muntu mufwe ke peje.
3 Ebiya twela wisambe na mulopwe uno muswelo.” Enka nenki Yoabe watūla binenwa mu kyakanwa kya mwana-mukaji.*
4 Mwana-mukaji mwine Tekoa watwela kwa mulopwe, wapona mpala pa nshi wevukwila, kanena’mba: “A mulopwe, nkwashe’ko!”
5 Mulopwe wamutentulula’mba: “Le i mwanda’ka?” Nandi amba: “Yō, ne mukaji wa kishala; wami mulume i mufwe.
6 Kadi ami mwingidi obe, nadi na bana babidi bana-balume, abo bonso bubidi badi bekupila mu ntanda. Kekwadipo muntu wa kwibalamununa, penepo umo washinda mukwabo wamwipaya.
7 Pano kisaka kyonso kibantalukila ami mwingidi obe, kebanena’mba, ‘Leta yewa waipaya mwanabo nandi tumwipaye mwanda wa būmi* bwa mwanabo wawaipaya,+ nansha shi bilomba kuvuididila mpyana!’ Badi basaka kubula dikala dya mudilo dyonshele nadyo* ne kushiya wami mulume pampikwa dijina nansha muntu upandile* pangala pa ntanda.”
8 Penepo mulopwe wanena mwana-mukaji amba: “Enda kobe, nsa kuleta musoñanya pa mwanda obe.”
9 Ebiya mwana-mukaji mwine Tekoa wanena mulopwe amba: “A mfumwami mulopwe, mambo ekale pondi ne pa njibo ya tata, ino mulopwe ne lupona lwandi kebadipo na mambo.”
10 Kupwa mulopwe wanena’mba: “Shi muntu wakunena monka, mulete kuno, nabya kasapo kukukambakanya dikwabo.”
11 Ino aye wanena’mba: “Nakwisāshila, mulopwe avuluke Yehova Leza obe, kutyina’mba muntu ulubula kinongo kya mashi+ wakonakanya ne kutukija wami mwana.” Nandi amba: “Bine ne Yehova byadi mūmi,+ i kutupu lunywene nansha lumo lwa obe mwana lukapona pa nshi.”
12 Ino mwana-mukaji wanena’mba: “Nakwisāshila, mwingidi obe anene’ko kinenwa kimo kudi mfumwami mulopwe.” Nandi amba: “Nena!”
13 Mwana-mukaji’wa wanena’mba: “Penepa mwanda waka ulanga kulonga kintu kya uno muswelo ku bantu ba Leza?+ Panena mulopwe namino, wepija aye mwine mambo, mwanda mulopwe kajokejepo wandi mwana mupangwe.+
14 Na bubine tusa kufwa ne kwikala pamo bwa mema obapungulwila pa nshi keakokejikapo kōlolwa. Ino Leza kasapo kufundula būmi,* kadi ukimbanga bubinga kebufwaninwepo yewa mupangwe kwikala nyeke mupangwe kwadi.
15 Natwela kunena bino kudi mfumwami mulopwe mwanda bantu bankwatyije moyo. O mwanda mwingidi obe wanena’mba, ‘Nesambe’po bidi na mulopwe. Padi mulopwe usa kulonga bimulomba umpika wandi.
16 Mulopwe ubwanya kuteja ne kukūla umpika wandi ku kuboko kwa muntu ukimba kunkubija ami ne wami mwana umo kete ku bupyani bwitupele Leza.’+
17 Penepo mwingidi obe wanenene amba, ‘Binenwa bya mfumwami mulopwe binsenge’po,’ mwanda mfumwami mulopwe udi pamo bwa mwikeulu wa Leza wa bine mu kushiañanya biyampe mu bibi. Yehova Leza obe ekale nobe.”
18 Ino mulopwe walondolola mwana-mukaji’wa amba: “Nakwisāshila, kokamfya kintu nansha kimo kyonkwipangula.” Mwana-mukaji nandi watentulula’mba: “Mfumwami mulopwe esambe’po.”
19 Penepa mulopwe wamwipangula’mba: “Le i Yoabe wakusoñanyanga bino byonso?”+ Mwana-mukaji walondolola’mba: “Bine ne byodi* mūmi, a mfumwami mulopwe, bidi enka* mwanenena mfumwami mulopwe, mwanda i mwingidi obe Yoabe wanombolanga ne kutūla bino binenwa byonso mu kyakanwa kya mwingidi obe.
20 Mwingidi obe Yoabe walonga kino mwanda wa kushinta mumwekelo wa bintu, ino mfumwami udi na tunangu pamo na twa mwikeulu wa Leza wa bine kadi uyukile byonso bilongeka mu ntanda.”
21 Kupwa mulopwe wanena Yoabe amba: “Biyampe, nsa kulonga kino kintu.+ Enda ukajokeje nsongwalume Abisalome.”+
22 Ponkapo Yoabe wapona mpala pa nshi kaevukwila ne kutendela mulopwe. Yoabe wanena’mba: “Dyalelo mwingidi obe wayuka’mba ubantōkelwa mutyima, a mfumwami mulopwe, mwanda mulopwe walonga byamulomba mwingidi wandi.”
23 Penepo Yoabe wataluka waenda ku Ngeshula,+ waiya na Abisalome ku Yelusalema.
24 Inoko, mulopwe wanena’mba: “Ajokele ku yandi njibo, ino kakimona mpala yami.” Penepo Abisalome wajokela ku yandi njibo, kamwenepo mpala ya mulopwe.
25 Ino mu Isalela ense, kemwadipo mwana-mulume utendelwa bininge buya bwandi pamo bwa Abisalome. Tamba ku kinyantyilo kya kulu kwandi kutūla ne ku nsongo ya mutwe wandi, kekwadipo kabulema mwadi.
26 Shi wetenda ku mutwe—wadi utenda’o ku mfulo kwa mwaka ne mwaka mwanda wadi umulēmena—nywene ya ku mutwe wandi yadi ilēma mashekele 200* ku kipimo kya mabwe kya bulopwe.*
27 Abisalome wabutwile bana basatu bana-balume+ ne mwana-mukaji umo witwa bu Tamala. Wadi mwana-mukaji muyampe mpala kashā.
28 Kadi Abisalome waendelela kwikala mu Yelusalema myaka ibidi mituntulu, ino kamwenepo mpala ya mulopwe.+
29 Ebiya Abisalome waityija Yoabe mwanda wa kumutuma kwa mulopwe, ino Yoabe kailepo kwadi. Kupwa wamwityija dikwabo musunsa wa bubidi, ino aye wapela monka kwiya.
30 Ku mfulo wanena bengidi bandi amba: “Kapindi ka ntanda ka Yoabe kadi kubwipi na kami, kadi ukidi’mo na mebele a buluba. Endai mukekasōke.” Ponkapo bengidi ba Abisalome basōka kapindi ka ntanda’ka.
31 Ebiya Yoabe wataluka waiya ku njibo ya Abisalome kamunena’mba: “Mwanda waka bengidi bobe abasōka kapindi kami ka ntanda?”
32 Abisalome walondolola Yoabe amba: “Tala! Nakutumīne uno musapu amba, ‘Iya nkutume kwa mulopwe umwipangule amba: “Kyonatambīle ku Ngeshula+ i kika? Byadi biyampe longa nashele konka. Shi ke pano leka mone mpala ya mulopwe, kadi shi kudi mambo ompile, nabya angipaye.”’”
33 Penepo Yoabe watwela kwa mulopwe wamusapwila. Ebiya waityija Abisalome, nandi watwela kwa mulopwe kaevukwila kwadi, wapona mpala pa nshi ku meso a mulopwe. Kupwa mulopwe wafifya Abisalome.+
Kunshi kwa Dyani
^ Nansha’mba “wamulombola bya kunena.”
^ Nansha’mba “muya.”
^ Ko kunena’mba, lukulupilo lwa mfulo lwa ntundu.
^ Kishima pa kishima i, “ushele’ko.”
^ Nansha’mba “muya.”
^ Nansha’mba “muya obe i.”
^ Nansha’mba “kekudipo ubwanya kwenda ku lunkuso nansha ku lundyo.”
^ Kintu kya makilo 2,3. Tala Mbwejo B14.
^ Padi kino i kipimo kya nyeke kyadi kilaminwe mu njibo mikatakata ya bulopwe nansha shekele ya “bulopwe” yadi mishile na shekele ya bantu bonso.
