Samwele wa Bubidi 16:1-23
16 Davida pa kupita’tu bityetye pa mutwe wa lūlu,+ Ziba+ mwingidi wa Mefibosheta+ waiya kumusambakana ne bampunda babidi bavwikwe bishikato, kadi baselele mikate 200, ne mikate 100 ya mañanza, ne mikate 100 ya bipa bya ku dikumbi,* ne mutyibi mukatampe wa vinyu.+
2 Penepa mulopwe wanena Ziba amba: “Kyowaila na bino bintu i kika?” Ziba nandi walondolola’mba: “Bampunda i ba kukanda’po bantu ba mu njibo ya mulopwe, mikate ne bipa bya ku dikumbi i bya kudya bansongwalume, ne vinyu nayo i ya kutoma boba bapungila mu ntanda mutuputupu.”+
3 Ino mulopwe waipangula’mba: “Le penepa mwanā* mfumobe udi kwepi?”+ Ebiya Ziba walondolola mulopwe amba: “Washala mu Yelusalema, mwanda wanenene amba, ‘Dyalelo njibo ya Isalela isa kunjokejeja bulopwe bwa tata.’”+
4 Penepo mulopwe wanena Ziba amba: “Tala! Bintu byonso bya Mefibosheta ke byobe.”+ Ziba nandi amba: “Nevukwila ku meso obe. Mfumwami mulopwe antōkelwe’po mutyima.”+
5 Mulopwe Davida pa kufika ku Bahudime, muntu umo wa ku kisaka kya njibo ya Solo witwa bu Shimei,+ mwanā Ngela, watamba kamufinge na diwi dikatampe koku wiya ufwena.+
6 Wadi wasa Davida mabwe ne bengidi bonso ba Mulopwe Davida, ne bantu bonso ne bana-balume bakomokomo badi ku lundyo ne ku lunkuso lwandi.
7 Shimei wadi ufinga koku unena’mba: “Taluka, taluka, abe muntu wa mambo a mashi! Abe muntu wa bituputupu!
8 Yehova wakulubwila mambo onso a mashi a njibo ya Solo owapingakene bu mulopwe, ino Yehova wapāna bulopwe mu makasa a obe mwana Abisalome. Pano kyamalwa kibakutana mwanda wi muntu wa mambo a mashi!”+
9 Kupwa Abishai mwanā Zeluya+ wanena mulopwe amba: “Mwanda waka uno mbwa mufwe+ ufinga mfumwami mulopwe?+ Nakwisāshila, ndeke ñende kamutēte mutwe.”+
10 Ino mulopwe walondolola’mba: “Le ngidi nenu mwanda’ka, banwe bana ba Zeluya?+ Mulekei amfinge,+ mwanda Yehova wamunena amba,+ ‘Finga Davida!’ Penepa i ani ubwanya kunena’mba, ‘Kyolongela namino i kika?’”
11 Penepo Davida wanena Abishai ne bengidi bandi bonso amba: “Tala wami mwana mwine watambile ku umbidi wami, yeu ukimba būmi bwami,*+ le mwine Benjemani+ papo ke pepi! Mulekei’tu amfinge, mwanda i Yehova wamusapwila’kyo!
12 Padi Yehova usa kumona tusua twami,+ kadi Yehova usa kunjokejeja buyampe pa kyaba kya mafingo ongelelwa mabila dyalelo.”+
13 Penepo Davida ne bantu bandi badi batūka’nka kutūka mu dishinda koku Shimei wenda ukunkuja lūlu mu lubavu lwandi, umufinga+ na diwi dikatampe ne kumwasa mabwe ne biloba bivule.
14 Kitatyi pa kupita’po mulopwe ne bantu bonso baadi nabo bafika kobadi benda bapungile, ebiya betūja.
15 Mu kine kitatyi’kya, Abisalome ne bantu bonso ba Isalela bafika mu Yelusalema, ne Ahitofele+ wadi nandi.
16 Hushai+ mwine Aleke,+ mulunda* na Davida pa kutwela kwa Abisalome, Hushai wanena Abisalome amba: “Mulopwe ufwa bununu!+ Mulopwe ufwa bununu!”
17 Penepo Abisalome wanena Hushai amba: “Lelo bwabo bo buswe bwa ndamatyidile bowalombola mulunda nobe? Mwanda waka kwaendelepo na mulunda nobe?”
18 Ebiya Hushai walondolola Abisalome amba: “Aa, ami ngidi ku mutamba wa yewa utongelwe na Yehova, ne na bano bantu, ne na bantu bonso ba Isalela. Nsa kushala nandi.
19 Nanenene kadi amba, Le i ani onkengidila? Mwene i wandi mwana? Monka monaingidile shobe, mo monsa kukwingidila ne abe.”+
20 Kupwa Abisalome wanena Ahitofele amba: “Mpe’ko madingi.+ Le tulonge namani?”
21 Ebiya Ahitofele wanena Abisalome amba: “Lāla na bakaji ba shobe ba pafula,+ boba baashile kulama njibo.*+ Penepa Isalela ense ukevwana’mba ubelonga bu kintu kinunka bibi kudi shobe, kadi boba badi ku mutamba obe bakakomejibwa.”
22 Penepo bashimikila Abisalome pema pa musaka,+ kadi Abisalome walāla na bakaji ba shandi ba pafula+ ku meso a Isalela ense.+
23 Mu mene mafuku’a madingi a Ahitofele+ adi amonwa pamo’nka bwa* kinenwa kya Leza wa bine. Mo mwadi mulēmekēlwe madingi onso a Ahitofele na Davida ne na Abisalome mwine.
Kunshi kwa Dyani
^ Kupityidila i bikuyu nansha padi i tukonkoma.
^ Nansha’mba “munkanā.”
^ Nansha’mba “muya wami.”
^ Nansha’mba “wa kusapwila myanda mifyame.”
^ Nansha’mba “njibo mikatakata.”
^ Nansha’mba “adi pamo bwa muntu wipangula.”
