Samwele wa Bubidi 19:1-43
19 Basapwidile Yoabe amba: “Mulopwe awa udila uyoyokota pa mwanda wa Abisalome.”+
2 Enka nenki bushindañani* bwa dyodya difuku bwaalamuka ke madilo ku bantu bonso, mwanda baivwene amba mulopwe udi na njia pa mwanda wa wandi mwana.
3 Bantu bajokela mu kibundi+ mu kitalala dyodya difuku pamo bwa bantu bafwijibwa bumvu mwanda abanyema ku divita.
4 Mulopwe wepūta mu mpala kadila’nka kudila na diwi dikatampe amba: “Wami mwana Abisalome! Abisalome wami mwana, wami mwana!”+
5 Kupwa Yoabe watwela kwa mulopwe mu njibo kanena’mba: “Dyalelo ubafwija bengidi bobe bonso bumvu bene bapandija būmi* bobe dyalelo’di ne būmi* bwa bobe bana bana-balume+ ne bwa bobe bana bana-bakaji+ ne bwa bobe bakaji ne bwa bobe bakaji ba pafula.+
6 Ubasanswa boba bakushikilwe ne kushikwa boba bakusenswe, mwanda dyalelo ubamwekeja’kyo patōka amba bakata ba bantu ne bengidi bobe i ba bitupu kodi, mwanda nayuka binebine amba shi Abisalome wadi’tu mūmi dyalelo’di, ino bantu bakwabo bonso bafwe, byadi bya kwikala biyampe kodi.
7 Shi ke pano imana, tamba ukakulupije* bengidi bobe, mwanda natyipe mu dijina dya Yehova amba shi kutambilepo, i kutupu muntu usa kushala nobe buno bufuku. Kino kisa kukubipila mpata kutabuka bibi byonso bikufikīle tamba pa busongwalume bobe kufika ne pano.”
8 Ebiya mulopwe wataluka wakashikata mu kibelo kya kibundi, penepa balombola bantu bonso amba: “Pano mulopwe yewa ushikete mu kibelo.” Ponkapo bantu bonso baiya kudi mulopwe.
Ino Isalela wadi munyeme, muntu ne muntu ku njibo yandi.+
9 Bantu bonso ba mu bisaka byonso bya Isalela badi bepatanya’mba: “Mulopwe wetupandije ku balwana netu,+ kadi wetunyongolwele ku bene Fidishitia; ino pano wanyema ntanda mwanda wa Abisalome.+
10 Kadi Abisalome, mwine otwashingile māni potudi,+ wafu mu bulwi.+ Shi ke pano, kyokemulongelapo kintu mwanda wa kujokeja mulopwe i kika?”
11 Mulopwe Davida watuma uno musapu kudi Zadoki+ ne kudi Abiatala+ babitobo amba: “Sapwilai bakulumpe ba Yuda+ amba, ‘Mwanda waka mwikale ba mfulo kujokeja mulopwe ku yandi njibo, akyo kinenwa kya Isalela ense ke kifike kwa mulopwe ku yandi njibo?
12 Banwe mwi banabetu; mwi kikupa kyami ne ngitu yami.* Mwanda waka mwikale ba mfulo kujokeja mulopwe?’
13 Kadi mufwaninwe kusapwila Amasa+ amba, ‘Mwene abe wi kikupa kyami ne ngitu yami? Nanshi Leza anongele monka ne kubweja’ko shi tamba pano ubulwe kwikala mukata wa kibumbo kyami kya divita pa kyaba kya Yoabe.’”+
14 Ebiya wanekenya* mityima ya bana-balume bonso ba Yuda pamo bwa muntu umo, kadi batuma musapu kudi mulopwe amba: “Joka abe ne bengidi bobe bonso.”
15 Mulopwe waanza kujoka wafika ku Yodano, kadi bantu ba Yuda baiya ku Ngilengale+ kusambakana mulopwe ne kumwabula pa Yodano.
16 Kupwa Shimei+ mwanā Ngela, mwine Benjemani wa ku Bahudime, watūka bukidi pamo na bantu ba Yuda bakasambakana Mulopwe Davida,
17 kadi kwadi bantu 1 000 ba Benjemani badi nandi. Ne Ziba+ mwingidi wa njibo ya Solo, pamo ne bandi bana 15 bana-balume ne bengidi 20, batūkila lubilo ku Yodano babadikidila mulopwe.
18 Waabuka* kyabu kya lwa ntobwa* kukabula ba mu njibo ya mulopwe ne kulonga byonso byaadi usaka. Ino Shimei mwanā Ngela wapona ku meso a mulopwe paadi’tu kaabuka Yodano.
19 Wanena mulopwe amba: “Mfumwami kakilama mambo onamupile, kadi kokivuluka kibi kyalongele mwingidi obe+ mu difuku dyatambile mfumwami mulopwe mu Yelusalema. Mulopwe kakilama’byo ku mutyima,
20 mwanda mwingidi obe uyukile biyampe amba ne mupye mambo; o mwanda dyalelo ne mubajinji kutūka mu ba mu njibo yonso ya Yosefa kusambakana mfumwami mulopwe.”
21 Ponkapo Abishai+ mwanā Zeluya+ wanena’mba: “Mwene Shimei ufwaninwe kwipaibwa pa kino, mwanda wafingile mushingwe māni wa Yehova?”+
22 Ino Davida wanena’mba: “Le uno mwanda wimutala namani banwe bana ba Zeluya+ pa kusaka amba munongele bintu bibi dyalelo? Lelo kudi ufwaninwe kwipaibwa dyalelo’di mu Isalela? Mwene dyalelo nayuka amba ne mulopwe pa Isalela?”
23 Kupwa mulopwe wanena Shimei amba: “Kusapo kufwa.” Ebiya mulopwe wamutyipila mutyipo.+
24 Mefibosheta+ munkanā Solo, nandi watūka kukasambakana mulopwe. Kelongolwelepo ku maulu nansha kutenda mwevu wandi wa pa mulomo wa kūlu nansha kukenda bivwalwa byandi, tamba difuku dyatalukile mulopwe kufika ne difuku dyaajokele mu ndoe.
25 Aye pa kwiya ku* Yelusalema kusambakana mulopwe, mulopwe wamunena’mba: “A Mefibosheta, mwanda waka kwaendelepo nami?”
26 Nandi amba: “Mfumwami mulopwe, mwingidi wami+ waundimbile. Mwanda mwingidi obe wanenene amba, ‘Bangadile’ko kishikato pa mpunda nkande’po ñende na mulopwe,’ mwanda mwingidi obe i kilema kya maulu.+
27 Ino wavubakeninye mwingidi obe myanda kudi mfumwami mulopwe.+ Inoko, mfumwami mulopwe udi pamo bwa mwikeulu wa Leza wa bine, shi ke pano longa byonso byomona bu biyampe.
28 Ba mu njibo yonso ya tata badi ba kutungilwa lufu na mfumwami mulopwe, inoko abe watūdile mwingidi obe mu boba badya ku meza obe.+ Penepo i lupusa’ka londi nalo lwa kudidila monka mulopwe?”
29 Ino mulopwe wamunena’mba: “Kine kyonenena’nka kunena nankyo i kika? Ami natyibe butyibi amba abe ne Ziba mufwaninwe kwiabila madimi.”+
30 Penepo Mefibosheta wanena mulopwe amba: “Muleke asele byonso, pano pajoka mfumwami mulopwe ku njibo yandi mu ndoe.”
31 Kupwa Balezilai+ mwine Ngileade watamba ku Lokedimi watūkila ku Yodano kukasela mulopwe kufika ne ku Yodano.
32 Balezilai wadi ke mununu bininge, wa myaka 80, wapele mulopwe byakudya paadi mu Mahanaimi,+ mwanda wadi mpeta mukatampe.
33 Penepa mulopwe wanena Balezilai amba: “Abuka pamo nami, kadi nami nsa kukupa bidibwa mu Yelusalema.”+
34 Ino Balezilai wanena mulopwe amba: “Le i mafuku* anga anshadila’ko mu būmi bwami amba nkande na mulopwe ku Yelusalema?
35 Dyalelo ngidi na myaka 80.+ Le mbwanya kujingulula kiyampe ne kibi? Lelo mbwanya, ami mwingidi obe, kwivwana butobaji bwa byondya ne byontoma? Le nekibwanya kwivwana mawi a batuimba bana-balume ne bana-bakaji?+ Penepa mwanda waka mwingidi obe abwejeje’ko mfumwami mulopwe kiselwa kilēma?
36 Kudi ami mwingidi obe, kutwala mulopwe ku Yodano i kubwane. Le kimpadila mulopwe ino mpalo i kika?
37 Nakwisāshila, leka mwingidi obe ajoke, ndeke nkafwile mu kibundi kyetu kidi kubwipi na kifuko kya kujīka’mo kya ba tata ne mama.+ Ino mwingidi obe Kimehame+ au keye. Muleke abuke na mfumwami mulopwe, kadi ubwanya kumulongela byonso byomona bu biyampe.”
38 Ebiya mulopwe wanena’mba: “Kimehame usa kwabuka nami, kadi nsa kumulongela byobya byomona bu biyampe; kyonso kyokanomba nsa kukulongela’kyo.”
39 Bantu bonso papo bashilula kwabuka Yodano, kadi mulopwe pa kwabuka, mulopwe wafifya Balezilai+ wamwesela ne kumwesela; Balezilai nandi wajokela kwandi.
40 Mulopwe pa kwabukila ku Ngilengale,+ Kimehame nandi waabuka nandi. Bantu bonso ba Yuda ne kipindi kya bantu ba Isalela baabula mulopwe.+
41 Kupwa bantu bonso ba Isalela bafwena mulopwe kebanena’mba: “Mwanda waka banabetu bana-balume ba Yuda bakwibile kebasela mulopwe ne ba mu njibo yandi kwabuka nandi Yodano, pamo ne bana-balume bonso ba Davida?”+
42 Bana-balume bonso ba Yuda balondolola bana-balume ba Isalela amba: “Mwanda tubutulwanga na mulopwe.+ Kyomwalobela pa uno mwanda i kika? Le kudi kintu kya mu lupeto lwa mulopwe kyotudīle, nansha le kudi kyabuntu kyotupelwe?”
43 Ino bana-balume ba Isalela balondolola bana-balume ba Yuda amba: “Tudi na bipindi dikumi mudi mulopwe, o mwanda tudi na kyepelo kikatampe mudi Davida kwimupita. Penepa, mwanda waka mwetuzobeje? Mwene batwe bo badi ba kwikala babajinji kujokeja mulopwe wetu?” Ino binenwa bya bana-balume ba Yuda byatādila* bya bana-balume ba Isalela.
Kunshi kwa Dyani
^ Nansha’mba “lupandilo.”
^ Nansha’mba “muya.”
^ Nansha’mba “myuya.”
^ Kishima pa kishima i, “unene ku mutyima wa.”
^ Nansha’mba “babutule bami ba ku mashi.”
^ Kishima pa kishima i, “waonya.”
^ Kyabukwa lwa nshi.
^ Bibwanika padi i, “Baabuka.”
^ Bibwanika padi i, “tamba.”
^ Kishima pa kishima i, “mafuku a myaka.”
^ Nansha’mba “byadi bikomo kutabuka.”
