Samwele wa Bubidi 20:1-26
20 Ino kwadi muntu umo uleta kavutakanya witwa bu Sheba+ mwanā Bikidi, mwine Benjemani. Waidile lusengo+ kanena’mba: “Ketudipo na kyepelo mudi Davida, kadi ketudipo na bupyani mudi mwanā Yese.+ A Isalela,+ muntu ense ende kudi baleza* bandi!”
2 Ponkapo bana-balume bonso ba Isalela baleka kulonda Davida kebalonda Sheba mwanā Bikidi;+ ino bana-balume ba Yuda balamata mulopwe wabo, tamba ku Yodano kufika ne ku Yelusalema.+
3 Davida pa kufika ku yandi njibo* ku Yelusalema,+ mulopwe wasela bakaji dikumi ba pafula baashile kulama njibo,+ webatūla mu njibo milamwe. Wadi wibapa byakudya, ino kalēlepo nabo+ nansha dimo. Baikala nyeke balamwe mu njibo kufika ne difuku dyobafwile, badi bekele pamo bwa bakaji ba kishala nansha byobadi na mulume mūmi.
4 Penepo mulopwe wanena Amasa+ amba: “Nkongakenye bana-balume ba Yuda mu mafuku asatu, kadi nobe ufwaninwe kwikala kuno.”
5 Ebiya Amasa wakongakanya Yuda, ino waiya ke mungya kala kupita ne kitatyi kine kyamutungīlwe.
6 Kupwa Davida wanena Abishai+ amba: “Sheba+ mwanā Bikidi ubwanya kwitulonga bibi kupita ne byalongele Abisalome bine.+ Sela bengidi ba mfumobe umulonde, kutyina’mba wakatana bibundi bikomejibwe etunyeme.”
7 Ebiya bana-balume ba Yoabe,+ bene Keleta, ne bene Peletyi,+ ne bana-balume bonso bakomokomo batamba kukamulonda; bashiya Yelusalema kebakalonda Sheba mwanā Bikidi.
8 Abo pa kufika kubwipi na dibwe dikatampe mu Ngibeone,+ Amasa+ waiya kwibasambakana. Ino Yoabe wadi uvwele bivwalwa byandi bya bulwi, wadi ne na kipete mu kikwa mwisomeke’kyo mu kifuka. Aye pa kwenda dya kumeso, kipete kyapona.
9 Yoabe wanena Amasa amba: “Le udi biyampe, a mwanetu?” Kupwa Yoabe wakwata Amasa ku mwevu na kuboko kwandi kwa lundyo na aye umufifya.
10 Amasa kadipo utele mutyima ku kipete kyadi mu kuboko kwa Yoabe, ebiya Yoabe wamutunga’kyo mu difu,+ ponkapo milá yalosoka yapona pa nshi. Kamutungile’kyopo dikwabo; wamutungile’kyo’tu dimo wamwipaya. Kupwa Yoabe ne mwanabo Abishai bakalonda Sheba mwanā Bikidi.
11 Umo wa mu bansongwalume ba Yoabe waimana dya kwaadi kanena’mba: “Ense udi ku mutamba wa Yoabe ne ense wa kwa Davida, alonde Yoabe!”
12 Papo Amasa wadi wialañanya mu mashi andi mu bukata bwa dishinda. Muntu’wa pa kumona’mba bantu bonso badi bemana, penepo watalula Amasa mu dishinda wamutūla mu budimi. Kupwa wamupūta kisandi, mwanda wamwene amba bantu bonso badi bemana pobadi bāya kwaadi.
13 Pa kupwa kumutalula mu dishinda, bana-balume bonso balonda Yoabe kebakapanga Sheba+ mwanā Bikidi.
14 Sheba wapita mu bisaka byonso bya Isalela kufika ne ku Abele wa Bete-Maka.+ Bene Bikidi bekongakenya pamo, nabo baenda kukamulonda.
15 Yoabe ne bana-balume* bandi baiya bamutēkela kasāla mu Abele wa Bete-Maka kadi babundila kibundi dibunda, mwanda kyadi mu bukata bwa dibunda. Kadi bana-balume bonso ba Yoabe badi bakola ku lubumbu mwanda wa kwiluponeja.
16 Penepo mwana-mukaji umo wa tunangu waela lubila aye mu kibundi amba: “Tejai, a bana-balume, tejai! Nemwisāshila, sapwilai Yoabe amba, ‘Iya pano nkusapwile.’”
17 Ebiya wafwena kwadi, mwana-mukaji’wa wanena’mba: “Le abe ye Yoabe?” Nandi amba: “I ami.” Ponkapo wamunena’mba: “Teja binenwa bya mwingidi obe.” Nandi amba: “Ntejanga.”
18 Wanena monka’mba: “Badi banenanga nyeke pa kala’mba, ‘Wibaleke bepangule mu Abele, enka nenki mwanda wapwa.’
19 Nenenanga bantu ba Isalela ba ndoe kadi ba kikōkeji. Ukimbanga konakanya kibundi kidi pamo bwa inabana mu Isalela. Le kyosakila kutukija* bupyani bwa Yehova i kika?”+
20 Yoabe walondolola’mba: “Kebibwanikapo ami kwikitukija ne kwikyonakanya.
21 Kebidipo nankyo. Ino, muntu witwa bu Sheba+ mwanā Bikidi wa mu ntanda ya ngulu ya Efelaimi+ watombokela* Mulopwe Davida. Shi mupāne uno muntu umo, nsa kupaluka ku kibundi.” Ebiya mwana-mukaji wanena Yoabe amba: “Tala! Basa kukwelela mutwe wandi pangala pa lubumbu!”
22 Ponkapo mwana-mukaji wa tunangu’wa watwela mwadi bantu bonso, nabo baketa mutwe wa Sheba mwanā Bikidi baela’o Yoabe. Penepo nandi waila lusengo, nabo bapalakana kutamba ku kibundi, muntu ne muntu waenda kwandi;+ ebiya Yoabe wajokela ku Yelusalema kwa mulopwe.
23 Ino Yoabe wadi mukatampe wa kibumbo kyonso kya divita kya Isalela;+ Benaya+ mwanā Yehoyada+ wadi utangidile bene Keleta ne bene Peletyi.+
24 Adolama+ wadi utangidile boba baselelwe kwingila mingilo ya kuningilwa; Yehoshafata+ mwanā Ahiluda wadi musoneki.
25 Sheva wadi mulembi; ba Zadoki+ ne Abiatala+ badi babitobo.
26 Kadi Ila mwine Yaila nandi waikala mfumu mukatampe* wa Davida.
Kunshi kwa Dyani
^ Bibwanika padi i, “mapema.”
^ Nansha’mba “njibo mikatakata.”
^ Kishima pa kishima i, “Abo.”
^ Kishima pa kishima i, “kumina.”
^ Kishima pa kishima i, “watulwila kuboko kwandi.”
^ Kishima pa kishima i, “waikala ke kitobo.”
