Samwele wa Bubidi 24:1-25
24 Bulobo bwa Yehova bwaakila monka Isalela+ patonwenwe Davida na muntu kampanda* amba: “Enda, kabale+ Isalela ne Yuda.”+
2 Ebiya mulopwe wanena Yoabe+ mukata wa kibumbo kya divita wadi nandi amba: “Nakwisāshila, pita mu bisaka byonso bya Isalela, tamba ku Dani kutūla ne ku Bela-Sheba,+ kalembe bantu, mwanda wa ndyuke bungi bwa bantu.”
3 Ino Yoabe wanena mulopwe amba: “Yehova Leza obe avudije’ko bantu misunsa 100, kadi meso a mfumwami mulopwe amone’kyo, ino mwanda waka mfumwami mulopwe usaka kulonga kintu kya uno muswelo?”
4 Ino kinenwa kya mulopwe kyatādila Yoabe ne bakata ba kibumbo kya divita. Ebiya Yoabe ne bakata ba kibumbo kya divita batamba ku meso a mulopwe bakalemba bantu ba Isalela.+
5 Baabuka Yodano batūla nkambi ku Aloele+ ku lundyo* lwa kibundi mu bukata mwa musanza,* dya ku bene Ngade, baenda kufika ne ku Yazele.+
6 Kupwa baenda ku Ngileade+ ne ku ntanda ya Tatimi-Hodeshi, balunguluka kufika ne ku Dane-Yane kadi bajokoloka kufika ne ku Shidona.+
7 Ebiya baenda ku nsakwa mikomo ya Tyila+ ne ku bibundi byonso bya bene Hivi+ ne bene Kenani, mfulo mfulō bafika mu Nengeba+ wa Yuda ku Bela-Sheba.+
8 Enka nenki bapita mu ntanda yonso, baiya ku Yelusalema ku mfulo kwa myeji kitema ne mafuku 20.
9 Penepo Yoabe wapa mulopwe bungi bwa bantu balembelwe’ba. Isalela wadi na ba bulwi 800 000 belumbile bipete ne bana-balume ba Yuda nabo badi 500 000.+
10 Ino mutyima* wa Davida wamutopeka bininge+ pa kupwa kubala bantu. Kupwa Davida wanena Yehova amba: “Nalonga bubi+ bukatampe pa kulonga kino kintu. Shi ke pano, a Yehova, nakwisāshila, lekela mwingidi obe kilubo,+ mwanda nalonga bya bulembakane mpata.”+
11 Davida pa kubūka lubanga, kinenwa kya Yehova kyaiya kudi Ngade+ mupolofeto, mumoni wa bimonwa wa Davida amba:
12 “Enda kasapwile Davida amba, ‘Yehova wanena namino amba: “Nakupe bintu bisatu bya kutonga’po. Tonga kintu kimo kyomfwaninwe kukuletela.”’”+
13 Penepo Ngade watwela kwa Davida wamusapwila’mba: “Le ubatonge kipupo kya nzala kiponene yobe ntanda myaka isamba-ibidi?+ Nansha le ubatonge kunyema bakinkwa nobe myeji isatu kitatyi kyobakulondalonda?+ Nansha ubatonge kwiye mafuku asatu a kipupo kya misongo mu ntanda yobe?+ Shi ke pano langa senene byomfwaninwe kukalondolola Yewa untumine.”
14 Ebiya Davida wanena Ngade amba: “I kya bulanda mpata kondi. Nakwisāshila, tuponene’tu mu kuboko kwa Yehova,+ mwanda lusa lwandi i lukatampe;+ ino kokamponeneja mu makasa a muntu.”+
15 Ponkapo Yehova watuma kipupo kya misongo+ mu Isalela tamba lubanga kufika ne pa kitatyi kitungwe, penepo bantu 70 000 bafwa,+ tamba ku Dani kufika ne ku Bela-Sheba.+
16 Mwikeulu pa kolwela kuboko kwandi dya ku Yelusalema mwanda wa kwikyonakanya, Yehova wealakanya* pa mwanda wa kyamalwa’kya,+ ebiya wanena mwikeulu wadi uleta bonakani mu bantu amba: “Kubapu! Pano konya kuboko kobe.” Mwikeulu wa Yehova wadi kubwipi na kipūdilo kya Alauna+ mwine Yebushi.+
17 Davida pa kumona mwikeulu wadi wipaya bantu, wanena Yehova amba: “Ami ye upile mambo, kadi ami ye ulubile; ino le ino mikōko+ kyoilongele i kika? Nakwisāshila, kuboko kobe kwiye pondi ne pa njibo ya tata.”+
18 Penepa Ngade watwela kwa Davida mu dyodya difuku kamunena’mba: “Kanda, kashimikile Yehova kisōkelo pa kipūdilo kya Alauna mwine Yebushi.”+
19 Ebiya Davida wakanda mungya kinenwa kya Ngade, monka mwasoñaninye’kyo Yehova.
20 Alauna pa kutala munshi wamona mulopwe ne bengidi bandi bāya kwadi, ponka na ponka Alauna wataluka wevukwila kudi mulopwe mpala pa nshi.
21 Alauna waipangula’mba: “Kyaila mfumwami mulopwe kudi mwingidi wandi i kika?” Davida walondolola’mba: “I kukupota kipūdilo mwanda wa kushimikila Yehova kisōkelo, amba kimpengele kiponēne bantu kipwe.”+
22 Ino Alauna watentulula Davida amba: “Mfumwami mulopwe asele’kyo alambule’po byobya byamona bu biyampe kwadi.* Bañombe ba kulambula kyamulambu kisōkwe aba kebo ne kipungwa kya kupūla nakyo ne bingidilwa bya bañombe bikale bu nkuni.
23 Abe mulopwe, bino byonso Alauna wape’byo mulopwe.” Kupwa Alauna wanena mulopwe amba: “Yehova Leza obe akutōkelwe mutyima.”
24 Inoko, mulopwe wanena Alauna amba: “Aa, mfwaninwe kukupota’kyo ku lupoto. Nkisapo kulambula Yehova Leza wami bitapwa bisōkwe byonkijimijijepo lupeto.” Ebiya Davida wapota kipūdilo ne bañombe ku mashekele* 50 a ndalama.+
25 Penepo Davida waubakila Yehova kisōkelo+ kwine’kwa, walambula bitapwa bisōkwe ne bitapwa bya kipwano. Kupwa Yehova waitabija kuzenza kobadi bazenzela ntanda,+ ebiya kimpengele kyaponēne Isalela kyapwa.
Kunshi kwa Dyani
^ Nansha’mba “patonwenwe Davida.”
^ Nansha’mba “kunshi.”
^ Nansha’mba “kinekaneka.”
^ Nansha’mba “mutyima wa mundamunda.”
^ Nansha’mba “watapwa ku mutyima.”
^ Kishima pa kishima i, “byobya biyampe ku meso andi.”
^ Shekele imo i mangalame 11,4. Tala Mbwejo B14.
