Samwele wa Bubidi 3:1-39
3 Divita dyadi pa bukata bwa njibo ya Solo ne njibo ya Davida dyaijije mpata; Davida wadi wenda ukomena’ko bininge,+ ino njibo ya Solo yadi yenda izoza’nka kuzoza.+
2 Mu kine kitatyi’kya, Davida wabutula bana mu Hebelona.+ Wandi mwana umbajinji i Amenone+ wabutwilwe na Ahinoame+ wa ku Yezelele.
3 Wandi mwana wa bubidi i Kileabe wabutwilwe na Abikele,+ mukaji wa kishala wa Nabalu mwine Kalamela; ne wa busatu nandi i Abisalome+ mwanā Maka, mwana mwana-mukaji wa Talamai+ mulopwe wa Ngeshula.
4 Wa buná i Adoniya+ mwanā Hakite, ne wa butano i Shefatia mwanā Abitale.
5 Wa busamba i Italeame wabutwilwe na Ekela mukaja Davida. Bano bo bana babutwile Davida mu Hebelona.
6 Kitatyi kyadi kyendelela divita pa bukata bwa njibo ya Solo ne njibo ya Davida, Abinele+ nandi wadi uningisha’nka kuningisha lupusa lwandi mu njibo ya Solo.
7 Ino Solo wadi na mukaji wa pafula wa dijina dya bu Dizepa,+ mwanā Aiya. Mwenda mafuku Ishi-Boshete+ wanena Abinele amba: “Mwanda waka ubalāla na mukaja tata wa pafula?”+
8 Abinele waloba bininge mwanda wa binenwa bya Ishi-Boshete kanena’mba: “Le ami ne mutwe wa mbwa wa ku Yuda? Kufika ne dyalelo’di, nalombwele buswe bwa ndamatyidile pa njibo ya shobe Solo ne ku banababo ne balunda nandi, kadi nkyakwabilepo mu makasa a Davida; ino dyalelo ubangite neshintulwile pa mwanda wa kilubo kyonalonga na mwana-mukaji.
9 Leza alongele monka kudi Abinele ne kubweja’ko shi nkilongēlepo Davida monka mwamutyipile’kyo Yehova:+
10 kutundulula bulopwe butambe ku njibo ya Solo ne kuningisha lupona lwa Davida pa Isalela ne pa Yuda, tamba ku Dani kufika ne ku Bela-Sheba.”+
11 Kabwenyepo kunena kishima kikwabo kya kulondolola Abinele, mwanda wadi umutyina.+
12 Ponka na ponka Abinele watuma mikendi kudi Davida amba: “Lelo ntanda i ya ani?” Wabweja’ko amba: “Samba nami kipwano, nami nkalonga buninge bwami bonso* ngalamwine Isalela ense kodi.”+
13 Davida nandi watentulula’mba: “Biyampe! Nsa kusamba nobe kipwano. Ino kintu kimo kyonkulomba i kino, kokatompa kumona mpala yami poso unselele bidi Mikale+ mwanā Solo poiya kwimona nami.”
14 Kupwa Davida watuma mikendi kudi Ishi-Boshete+ mwanā Solo amba: “Mpe wami mukaji Mikale onasongele ku bikoba 100 bya ngitu ya bwana-bulume bya bene Fidishitia.”+
15 Ebiya Ishi-Boshete watuma bantu bakamusele kudi wandi mulume Paletyele+ mwanā Laishe.
16 Ino wandi mulume wadi wenda nandi pamo, wadi udila koku umulonda kutūla ne ku Bahudime.+ Kupwa Abinele wamunena’mba: “Enda kajoke!” Nandi wajoka.
17 Mu kine kitatyi’kya, Abinele watumina bakulumpe ba Isalela musapu amba: “Tamba kitatyi kampanda mwadi musaka Davida emubikadile bu mulopwe.
18 Shi ke pano, longelai monka, mwanda Yehova wanenene Davida+ amba: ‘Na kuboko kwa mwingidi wami Davida, nkapandija bantu bami bene Isalela mu makasa a bene Fidishitia ne mu makasa a balwana nabo bonso.’”
19 Penepa Abinele wesamba na bantu ba Benjemani.+ Kadi Abinele wakesamba kwa bunka bwandi na Davida ku Hebelona, wamusapwila byaitabija Isalela ne njibo yonso ya Benjemani.
20 Abinele pa kufika kwadi Davida ku Hebelona na bantu 20, Davida wasobela Abinele ne bantu baadi nabo masobo.
21 Kupwa Abinele wanena Davida amba: “Ndeke ñende nkakongakenye Isalela ense pamo kudi mfumwami mulopwe, amba basambe nobe kipwano, nobe ukekala mulopwe pa byonso byosaka.”* Penepo Davida wanena Abinele ende, nandi waenda mu ndoe.
22 Kupwa’tu pene’pa, bengidi ba Davida ne Yoabe bajoka kobakatambile ba bulwi, baiya na bitūtwa bivule. Abinele kakidipo na Davida mu Hebelona, mwanda wamulekele ende mu ndoe.
23 Yoabe+ ne kibumbo kyonso kya divita kyadi nandi pa kufika, basapwila Yoabe amba: “Abinele+ mwanā Nele+ waiyanga kwa mulopwe, nandi wamuleka ende, ne kwenda waenda mu ndoe.”
24 Ebiya Yoabe watwela mudi mulopwe kanena’mba: “Le i bika byowalonga? Nanshi Abinele waiyanga kodi. Mwanda waka ubamulekanga ende, nandi waenda’tu senene?
25 Abe uyukile Abinele mwanā Nele! Waiyanga kuno mwanda wa kukongola ne kuyuka konso koenda ne kujingulula kintu kyonso kyolonga.”
26 Penepo Yoabe wataluka kwadi Davida, watuma mikendi ilonde Abinele, yamujokeja tamba pa kyumbu kya Shīla; ino Davida kadipo uyukile kantu nansha kamo pa uno mwanda.
27 Abinele pa kujokela ku Hebelona,+ Yoabe wamuselela dya kufula munda mwa kibelo mwanda wa kwisamba nandi kwa bunka bwabo. Ino kwine’kwa, wamutapa munda, ne kufwa wafwa;+ wamulongele namino mwanda waipaile* mwanabo Asahele.+
28 Kupwa, Davida pa kwivwana’o, wanena’mba: “Ami ne bulopwe bwami twi batōka nyeke ku meso a Yehova ku mambo a mashi+ a Abinele mwanā Nele.
29 Ajokele pa mutwe wa Yoabe+ ne pa njibo yonso ya shandi. Njibo ya Yoabe keyakabulwa mwana-mulume ubela misongo ya bimusūma+ nansha makopo+ nansha mwana-mulume wingila ku kinoa kya nyushi* nansha upona ku kipete nansha muntu usakilwa byakudya!”+
30 Ino Yoabe ne mwanabo Abishai+ baipaile Abinele+ mwanda waipaile Asahele mwanabo mu divita ku Ngibeone.+
31 Kupwa Davida wanena Yoabe ne bantu bonso baadi nabo amba: “Sanai bivwalwa byenu muvwale masāka, yoyokotai miyoa pa mwanda wa Abinele.” Mulopwe Davida mwine wadi wenda ulonda kunyuma kwa butanda bwa lufu.
32 Bajīka Abinele mu Hebelona; mulopwe wadila bininge ku kibundu kya Abinele, ne bantu bonso nabo badila.
33 Mulopwe waimbila Abinele amba:
“Lelo Abinele ufwaninwe kufwa pamo bwa muntu wampikwa ñeni?
34 Maboko obe keadipo makutwe,Kadi maulu obe keadipo mu nkano.*
Ubapone pamo bwa muntu upona ku meso a bankuma-bibi.”*+
Ponkapo bantu bonso bamudila monka.
35 Kupwa bantu bonso baiya kupa Davida mukate wa busengi* adyo dikidi dyuba, ino Davida watyipa’mba: “Leza alongele monka ne kubweja’ko shi ntompe kudya mukate nansha kintu kyo-kyonso kumeso kwa dyuba kupona!”+
36 Bantu bonso bajingulula’kyo, kadi kyebasangaja. Kyasangaja bantu bonso pamo’nka na mwadi mwibasangeja bintu byonso byadi bilonga mulopwe.
37 Penepo bantu bonso ne Isalela ense bayuka’mba ke mulopwepo waipaija Abinele mwanā Nele.+
38 Ebiya mulopwe wanena bengidi bandi amba: “Le kemuyukilepo amba mfumu kadi muntu mukatampe wapone dyalelo’di mu Isalela?+
39 Dyalelo nazoza, nansha byonshingilwe māni bu mulopwe,+ kadi bano bana-balume, bana ba Zeluya,+ badi na kansontomokela kabi kondi.+ Yehova alubwile nonga-bibi mungya bibi byandi aye mwine.”+
Kunshi kwa Dyani
^ Kishima pa kishima i, “kadi tala! kuboko kwami kudi nobe.”
^ Nansha’mba “bisaka muya obe.”
^ Kishima pa kishima i, “mwanda wa mashi a.”
^ Padi kīsambila pa kisheta kinenwe kwingila kaji ka bana-bakaji.
^ Kishima pa kishima i, “mukuba.”
^ Kishima pa kishima i, “bana ba bukondame.”
^ Nansha’mba “mukate wa madilo.”
