Samwele wa Bubidi 4:1-12
4 Ishi-Boshete mwanā Solo*+ pa kwivwana’mba Abinele wafu mu Hebelona,+ bukomo bwamupwa* ne bene Isalela bonso nabo bavutakanibwa.
2 Kwadi bana-balume babidi badi bendeja bibumbo bya bañonaona bya mwanā Solo: dijina dya umo i Baane ne mukwabo nandi i Lekaba. Badi bana ba Dimōne mwine Belote wa ku kisaka kya Benjemani. (Mwanda Belote+ nandi wadi ubadilwa ku Benjemani.
3 Bene Belote banyemēne ku Ngitaimi,+ kadi i beni ba kibundi kwine’kwa kufika ne dyalelo.)
4 Ino, Yonafane+ mwanā Solo wadi na mwana mwana-mulume kilema*+ kya maulu. Wadi na myaka itano paile musapu wa lufu lwa Solo ne Yonafane ku Yezelele,+ muledi wandi wamusela kanyema, ino byaadi unyema na luzakalo, wamupona walemana. Dijina dyandi i Mefibosheta.+
5 Bana ba Dimōne mwine Belote, ba Lekaba ne Baane, baenda ku njibo ya Ishi-Boshete kitatyi kinananga dyuba, aye papo ukōkolokwa dyuba mu mitwe.
6 Batwela mu njibo bwa abo bakimba kusela ñano, bamutapa mu difu; kupwa ba Lekaba ne mwanabo Baane+ banyema.
7 Pobatwelele mu njibo wadi ulēle pa kitanda kyandi mu kyumba kya kulāla’mo, penepo bamutapa ne kwipaya bamwipaya, kupwa bamuketa mutwe. Basela mutwe wandi baenda bufuku bonso mu dishinda dyenda ku Alaba.
8 Penepo bakatwala mutwe wa Ishi-Boshete+ kudi Davida ku Hebelona, kebanena mulopwe amba: “Au keo mutwe wa Ishi-Boshete mwanā Solo walwana nobe+ wadi ukimba būmi bobe.*+ Dyalelo’di Yehova walubwila Solo ne lutundu lwandi kinongo pa mwanda wa mfumwami mulopwe.”
9 Ino Davida walondolola ba Lekaba ne mwanabo Baane, bana ba Dimōne mwine Belote, kaebanena’mba: “Bine ne Yehova byadi mūmi, mwine waunyongolwele* mu tusua tonso,+
10 paile muntu kunsapwila’mba ‘Tala Solo wafu,’+ aye wadi ulanga’mba waiya kunsapwila myanda miyampe, namukwete namwipaya+ mu Zikelake. Ino yo mpalo ya mukendi yaatambwile kondi!
11 Le penepa shi bantu babi abaipaya muntu moloke mu njibo yandi pa kitanda kyandi ke pepi! Mwene mfwaninwe kulomba mashi andi ku makasa enu+ ne kwimufundula pano pa ntanda?”
12 Penepo Davida wasoñanya bansongwalume bebepaye.+ Nabo bebatēta makasa ne maulu bebayeyeka+ dya ku kijiba mu Hebelona. Ino bayata mutwe wa Ishi-Boshete beujīka mu kibundu kya Abinele mu Hebelona.
Kunshi kwa Dyani
^ Kishima pa kishima i, “Mwanā Solo.”
^ Kishima pa kishima i, “maboko andi azoza.”
^ Nansha’mba “mulemane.”
^ Nansha’mba “muya obe.”
^ Nansha’mba “wakūdile muya wami.”
