Samwele wa Bubidi 8:1-18
8 Kitatyi kampanda pa kupita’po, Davida wanekenya bene Fidishitia+ webatādila,+ kadi Davida wayata Metenge-Ama mu makasa a bene Fidishitia.
2 Wanekenya bene Moabu,+ webalādika pa nshi kaebapima na monji. Wapima myonji ibidi ya bantu ba kwipaya, ne monji umo mutuntulu wa bantu ba kulama bōmi.+ Penepo bene Moabu baikala ke bengidi ba Davida kebamulambula milambu.+
3 Davida wanekenya Hadadezele mwanā Lehobe mulopwe wa Zoba+ paadi wenda kukajokeja lupusa lwandi ku Munonga wa Ufalete.+
4 Davida wamuyata bantu 1 700 bakandanga pa tubalwe ne basola 20 000 ba lwa nshi. Kupwa Davida waketa tubalwe tonso mijilo kutalula’mo tubalwe 100 kete twa makalo.+
5 Bene Shidea ba ku Damakasa+ pa kwiya kukwasha Hadadezele mulopwe wa Zoba, Davida waipaya bene Shidea 22 000.+
6 Penepa Davida watūla bibumbo bya basola mu Shidea wa Damakasa, kadi bene Shidea baikala ke bengidi ba Davida kebamulambula milambu. Yehova wadi upa Davida bushindañani* konso kwaadi wenda.+
7 Ne kadi Davida wayata bengidi ba Hadadezele mangabo majokoloke a olo waenda nao ku Yelusalema.+
8 Mulopwe Davida wasela mikuba mivule mpata ku Beta ne ku Belotai bibundi bya Hadadezele.
9 Ino Mulopwe Toi wa Hamata+ waivwana’mba Davida wanekenya kibumbo kyonso kya divita kya Hadadezele.+
10 Penepo Toi watuma wandi mwana Yolama kudi Mulopwe Davida amwipangule mwabūkile ne kumufwija’ko mwanda walwile ne kunekenya Hadadezele (ke-pantu Hadadezele wadi uvudile kulwa na Toi), kadi waile na bintu bya ndalama, bya olo, ne bya mukuba.
11 Mulopwe Davida wapandwila Yehova bino bintu, pamo ne ndalama ne olo byaapandwile kutamba ku mizo yonso yaanekenye:+
12 kutamba ku Shidea ne Moabu,+ ku bene Amone, bene Fidishitia,+ bene Amaleke,+ ne ku bitūtwa bya Hadadezele+ mwanā Lehobe mulopwe wa Zoba.
13 Kadi Davida welongela dijina paajokele kwaadi ukepaile bene Edoma 18 000 mu Musanza wa Mwepo.+
14 Watūla bibumbo bya basola mu Edoma. Mu Edoma monso watūla’mo bibumbo bya basola, kadi bene Edoma bonso baikala ke bengidi ba Davida.+ Yehova wadi upa Davida bushindañani* konso kwaadi wenda.+
15 Davida waendelela kubikala pa Isalela ense,+ kadi Davida wadi utyibila bantu bandi bonso+ mambo na bululame ne na boloke.+
16 Yoabe+ mwanā Zeluya wadi mukatampe wa kibumbo kya divita, kadi Yehoshafata+ mwanā Ahiluda wadi musoneki.
17 Zadoki+ mwanā Ahitube ne Ahimeleke mwanā Abiatala badi babitobo, kadi Selaya wadi mulembi.
18 Benaya+ mwanā Yehoyada wadi mukatampe wa bene Keleta ne bene Peletyi.+ Ino Bana ba Davida baikala ke bamfumu bakatampe.*
Kunshi kwa Dyani
^ Nansha’mba “lupandilo.”
^ Nansha’mba “lupandilo.”
^ Kishima pa kishima i, “baikala ke babitobo.”
