Samwele wa Bubidi 9:1-13
-
Buswe bwa ndamatyidile bwa Davida bwasenswe Mefibosheta (1-13)
9 Kupwa Davida wanena’mba: “Le kukishele muntu wa ku njibo ya Solo ombwanya kulombola buswe bwa ndamatyidile pa mwanda wa Yonafane?”+
2 Ino kwadi mwingidi umo wa ku njibo ya Solo witwa bu Ziba.+ Penepa bamwita āye kudi Davida, kadi mulopwe wamwipangula’mba: “Le abe ye Ziba?” Nandi amba: “I ami mwingidi obe.”
3 Mulopwe wabweja’ko amba: “Le kukishele muntu wa ku njibo ya Solo ombwanya kulombola bininge buswe bwa ndamatyidile bwa Leza?” Ziba walondolola mulopwe amba: “Kukidi mwanā Yonafane; kilema* kya maulu onso abidi.”+
4 Mulopwe wamwipangula’mba: “Le udi kwepi?” Ziba walondolola mulopwe amba: “Udi mu njibo ya Makile+ mwanā Amiele ku Lo-Debale.”
5 Mulopwe Davida watuma bantu’nka ponka’pa bakamusela ku njibo ya Makile mwanā Amiele ku Lo-Debale.
6 Mefibosheta mwanā Yonafane mwanā Solo pa kutwela mudi Davida, wapona mpala panshi ponka na ponka kaevukwila. Kupwa Davida wamwita’mba: “Mefibosheta!” nandi amba: “Ami uno mwingidi obe.”
7 Davida wamunena’mba: “Kokikwatwa moyo, mwanda na bubine nsa kukulombola buswe bwa ndamatyidile+ pa mwanda wa shobe Yonafane, nsa kukujokejeja ntanda yonso ya nkambo obe Solo, kadi ukadya* nyeke ku meza ami.”+
8 Ponkapo wevukwila kanena’mba: “Le mwingidi obe nandi i ani, amba ute mutyima* kudi mbwa mufwe+ pamo bwa ami?”
9 Penepo mulopwe waityija Ziba, mwingidi wa Solo kamunena’mba: “Bintu byonso byadi bya Solo ne bya njibo yandi yonso nape’byo munkanā mfumobe.+
10 Ukamudimina ntanda—abe ne bobe bana ne bengidi bobe—kadi ukakongakanya bidibwa bya mu ntanda’ya ke bya kudya bantu ba munkanā mfumobe. Ino Mefibosheta munkanā mfumobe ukadya nyeke ku meza ami.”+
Ino Ziba wadi na bana bana-balume 15 ne bengidi 20.+
11 Kupwa Ziba wanena mulopwe amba: “Mwingidi obe usa kulonga byonso byasoñanya mfumwami mulopwe kudi mwingidi wandi.” Ebiya Mefibosheta waanza kudya ku meza a Davida* pamo bwa umo wa mu bana ba mulopwe.
12 Ino Mefibosheta nandi wadi na mwana nsongwalume witwa bu Mīka,+ kadi boba bonso badi bashikatanga mu njibo ya Ziba baikala bengidi ba Mefibosheta.
13 Mefibosheta washikete mu Yelusalema, mwanda wadi udya nyeke ku meza a mulopwe;+ ne kadi wadi kilema kya maulu onso abidi.+
Kunshi kwa Dyani
^ Nansha’mba “mulemane.”
^ Kishima pa kishima i, “ukadya mukate.”
^ Kishima pa kishima i, “utale mpala.”
^ Bibwanika padi i, “ami.”
