Lwimbo lwa Ñimbo 5:1-16
5 “Natwela mu budimi bwami,+A mwanetu mwana-mukaji, mutundaile wami.
Naposola mpakwa yami ne binunka mwenye byami.+
Nadi kisá kyami kya būki ne būki bwami;Natome vinyu yami ne mabele ami.”+
“Dyai, a balunda baswe!
Tomai mukolwe bilongwa bya kisanso!”+
2 “Ndēle, ino mutyima wami utala.+
Naivwana lunwa lwa muswe wami ukōkola!
‘Nshitwile, a mwanetu mwana-mukaji, muswedibwe wami,Nkunda wami, wampikwa dikeme!
Mwanda mutwe wami i mubombe lumé,Nywene yami nayo kitalela kya bufuku.’+
3 Kendi muvūle nkanzo.
Le mvwale’yo kadi monka?
Kendi moye ku maulu.
Le nekufītyije kadi monka?
4 Muswe wami wakoka kuboko kwandi pa kipunzu kya mulango,Penepo mutyima munda keuntu pa mwanda wandi.
5 Nabūka kukashitwila muswe wami;Maboko ami asūma mpakwa,Kadi minwe yami nayo mpakwa misunguluke,Ku bikwatyilo bya lōko.
6 Nashitwila muswe wami,Ino muswe wami waalamukile, waenda.
Aye pa kwenda natyumukwa* mutyima.*
Namukimbile, ino kumusokola mpika.+
Namwita, ino aye kungitaba mpika.
7 Batulama badi bajokoloka mu kibundi bauntene.
Bankupila, ne kuntapa bilonda.
Batulama ba mumbu baumvūla kisandi* kyonadi nepūtyile.
8 A bana ba Yelusalema bana-bakaji, nemutyipija’mba:
Shi mubamone muswe wami,Mulombolei amba mbelanga buswe.”
9 “Le muswe obe i muyampe namani kupita muswe mukwabo yense,Abe muyampe mpata kutabuka bana-bakaji?
Le muswe obe i muyampe namani kupita muswe mukwabo yense,Amba witutyipije nankyo?”
10 “Muswe wami i muyampe kadi utyiluluka;Mu bantu tununu dikumi aye i mutabuke.
11 Mutwe wandi i olo, olo milumbuluke.
Nywene yandi idi pamo bwa malala a mukondo* ajina,Ifīta pamo bwa kinkombe.
12 Meso andi adi pamo bwa bankunda ku tuminonga twa mema,Boya mu mabele,Batumbile ku kijiba kiyule bā.*
13 Matama andi adi pamo bwa butanda bwa binunka mwenye,+Tungulu twa biyombo binunka mwenye.
Milomo yandi i maluba, kusūma mpakwa misunguluke.+
14 Makasa andi i mibumbulu ya olo, kulamike kisodite.
Difu dyandi i dino dya nzovu disenejibwe dipūtwe na safile.
15 Maulu andi i bikomo bya mabwe a mimfinye* bishimikwe pa bitako bya olo milumbuluke.
Mpala yandi idi pamo bwa Lebanona, upityile bakwabo pamo bwa mityi ya sedele.+
16 Kyakanwa’tu* kyandi i butobaji,Kadi kintu kyonso kyadi nakyo kyabilwanga.+
A bana ba Yelusalema bana-bakaji, uno ye muswe wami, uno ye muswedibwe wami.”
Kunshi kwa Dyani
^ Bibwanika padi i, “Aye pa kwisamba muya wami wantamba’mo.”
^ Nansha’mba “muya wami watamba’mo.”
^ Nansha’mba “kilēnda.”
^ Bibwanika padi i, “pamo bwa bisansa bya tukonkoma.”
^ Bibwanika padi i, “milomo ya nsulo ya mema.”
^ Nansha’mba “bikundulu; bikundudyu.”
^ Kishima pa kishima i, “Kilango.”
