Batyibi 15:1-20
-
Kinongo kya Samishoni pa bene Fidishitia (1-20)
15 Kupwa papo, mu mafuku a mwangulo wa ñano, Samishoni waenda kukapempula wandi mukaji koku uselele kana ka mbuji. Kanena’mba: “Nsaka ntwele mudi wami mukaji mu kyumba kya kulāla’mo.”* Ino shandya mukaji kamwitabijijepo kutwela’mo.
2 Shandya mukaji wanena’mba: “Nadi nanga’mba, ‘Na bubine ubamushikwe.’+ O mwanda namupēne kudi mulunda na musoñañani.+ Mwene nkasandi i muyampe bininge kumupita? Musele’tu aye pa kyandi kyaba.”
3 Ino Samishoni webanena’mba: “Pano’ko nkisapo kutopekwa na bene Fidishitia shi nebasanshija.”
4 Ebiya Samishoni waenda, wakwata mikenge 300. Kupwa wayata byenge, wavundamija mikenge’ya mukila na mukila, ne kutūla kyenge pa bukata bwa mikila ibidi ibidi.
5 Penepa waakija byenge’bya, walekelela mikenge yatwela mu madimi a bene Fidishitia a bikunanwa bya miseke. Wasōka bintu byonso, ne bīta ne bikunanwa bya miseke, enka ne madimi a mañanza ne bitongo bya impafu bine.
6 Bene Fidishitia baipangula’mba: “Le i ani walonga namino?” Bebalombola’mba: “I Samishoni muko wa mwine Timina, mwanda wayete wandi mukaji wapa’ye mulunda na musoñañani.”+ Penepa bene Fidishitia bakanda bakasōka mukaji ne shandi mwine na mudilo.+
7 Ebiya Samishoni webanena’mba: “Shi mubalonga namino, nami nkisapo kuleka’byo enka ne byonemulubwila kinongo.”+
8 Ebiya webatapa umo umo,* ke kutapa i kukunya, kupwa papo watūka wakashikata mu mutá* wa kidibwe kya Etame.
9 Mwenda mafuku bene Fidishitia bakanda batūla nkambi mu Yuda, badi bajokoloka koku ne koku mu Lehi.+
10 Penepo bana-balume ba Yuda banena’mba: “I kika kyomwakandila kuno kwitutamba bulwi?” nabo balondolola’mba: “Tubakanda kuno mwanda wa kukwata* Samishoni, tumulonge enka mwaetulongele.”
11 Ebiya bana-balume 3 000 ba Yuda batūkila mu mutá* wa kidibwe kya Etame kebanena Samishoni amba: “Kuyukilepo amba bene Fidishitia i betubikale?+ Kyowetulongela namino i kika le?” Nandi webalondolola’mba: “Monka mobaunongele, nami ye monebalongela.”
12 Ino bamunena’mba: “Tubaiya kukukwata* tukupāne kudi bene Fidishitia.” Penepa Samishoni wanena’mba: “Ntyipilei amba banwe’ko kemusapo kunonga kibi.”
13 Nabo bamutentulula’mba: “Aa, tusa’tu kukukuta tukupāne kobadi, inoko ketusapo kukwipaya.”
Ponkapo bamukuta na myonji ibidi mipya, bamutambija mu kidibwe.
14 Aye pa kufika ku Lehi, bene Fidishitia batūta kyungwe kya bushindañani pa kwitana nandi. Penepa mushipiditu wa Yehova wamupa bukomo,+ myonji yadi ku maboko andi yaikala’nka bwa myonji ya bukonge mitēme mudilo, nkano yandi yaketeka ku maboko andi.+
15 Ebiya wamona kibanga kibishi kya mpunda mulume; waolola kuboko wekiboya, ne kwipaya waipaya nakyo bana-balume 1 000.+
16 Kupwa Samishoni wanena’mba:
“Na kibanga kya mpunda—mulwi umo, milwi ibidi!
Na kibanga kya mpunda natapile bana-balume 1 000.”+
17 Aye pa kupwa kwisamba, waela kibanga’kya, wainika kifuko’kya bu Lamate-Lehi.*+
18 Ebiya waivwana kyumwa bininge, kaite Yehova amba: “I abe wapāna luno lupandilo lukatampe mu kuboko kwa mwingidi obe. Ino pano mfwe’tu kyumwa ne kuponena mu makasa a bantu ba kubulwa kutwela kwisao?”
19 Penepa Leza walala kīna kyadi mu Lehi, ponkapo mema atamba’mo.+ Aye pa kutoma, bukomo* bwamujoka, nandi wejokeja. O mwanda wainikile kine kifuko’kya bu Ene-Hakole,* kikidi mu Lehi kufika ne dyalelo.
20 Watyibīle Isalela mambo mu mafuku a bene Fidishitia mu myaka 20.+
Kunshi kwa Dyani
^ Nansha’mba “kyumba kya munda.”
^ Kishima pa kishima i, “webepaya kulu pa ditangatanga.”
^ Nansha’mba “mpako.”
^ Nansha’mba “kukuta.”
^ Nansha’mba “mpako.”
^ Nansha’mba “kukukuta.”
^ Ko kushintulula’mba “Kifuko kya Pangala kya Kibanga.”
^ Kishima pa kishima i, “mushipiditu.”
^ Ko kushintulula’mba “Nsulo ya Yewa Wita.”
