Batyibi 19:1-30
-
Busekese bubibubi bwa bene Benjemani mu Ngibea (1-30)
19 Mu mene mafuku’a, kitatyi kyokekwadipo mulopwe mu Isalela,+ mwine Levi umo wadi ushikata mu kine kitatyi’kya mu kipindi kya kulampe kya ntanda ya ngulu ya Efelaimi,+ wasela mukaji wa pafula wa mu Betelema+ mu Yuda ke wandi mukaji.
2 Ino wandi mukaji wa pafula kadipo mwilame, ebiya mukaji wa pafula wamunyema waenda ku njibo ya shandi mu Betelema mu Yuda. Washikata’ko myeji iná.
3 Kupwa wandi mulume wakamulonda kumusenga ajoke; wadi na mwingidi wandi mwana-mulume ne bampunda bandi babidi. Penepo mukaji wa pafula wamuselela mu njibo ya shandi. Shandi pa kumumona, wasangala pa kwitana nandi.
4 Ebiya shandi muko, shandya nsongwakaji’wa, wamunekenya washikata nandi mafuku asatu; kadi badi badya batoma, nandi walāla konka.
5 Mu difuku dya buná, babūka lubanga futwi kebasake kwenda, ino shandya nsongwakaji’wa wanena muko wandi amba: “Dya’ko bidi twakudya twa kukupa bukomo,* penepa kemwenda.”
6 Ponkapo bashikata, abo bonso bubidi badya ne kutoma kya pamo; kupwa shandya nsongwakaji kanena mwana-mulume amba: “Nakwisāshila, lāla buno bufuku wisangaje.”*
7 Padi kepasake mwana-mulume kutaluka ende, shandi muko wamuzenza’nka kumuzenza, nandi walāla monka bwine bufuku’bwa.
8 Aye pa kubūka lubanga futwi mu difuku dya butano kasake kwenda, shandya nsongwakaji wanena’mba: “Nakwisāshila, dya’ko bidi twakudya twa kukupa bukomo.”* Penepo balejaleja kufika ne ku kyolwa bininge, abo bonso bubidi badi badya’nka kudya.
9 Padi kepasake mwana-mulume kutaluka ende na wandi mukaji wa pafula ne mwingidi wandi, shandi muko, shandya nsongwakaji’wa, wamunena’mba: “Tala’po bidi! Ke ku kyolwa. Nakwisāshila, lāla buno bufuku. Difuku kedisa kupwa. Lāla kuno buno bufuku wisangaje. Penepa kesha lubanga mubūkile lwenu lwendo kemwenda ku njibo* yenu.”
10 Inoko, mwana-mulume kakidipo usaka kulāla bufuku bukwabo, o mwanda watalukile waenda kufika ne ku Yebushi, ko kunena’mba Yelusalema.+ Wadi ne na bampunda babidi bavwikwe bishikato, ne wandi mukaji wa pafula, ne mwingidi wandi.
11 Pobafikile kubwipi na Yebushi, mwinya wa dyuba wadi keujimina. Ebiya mwingidi wanena mfumwandi amba: “Lelo tusa kwimana pa kino kibundi kya bene Yebushi tulāle’ko buno bufuku?”
12 Ino mfumwandi wamulondolola’mba: “Ketufwaninwepo kwimana mu kibundi kya bantu bangi ke bene Isalelapo. Tusa kwenda kufika ne ku Ngibea.”+
13 Kupwa wanena mwingidi wandi amba: “Twaya tutompe kufika ku kifuko kimo pa bino; tusa kulāla mu Ngibea nansha mu Lama.”+
14 Ebiya bataluka baenda, dyuba dyadi kedipone kitatyi kyobadi kubwipi na Ngibea wa bene Benjemani.
15 Penepo baimana kwine’kwa batwela kulāla bufuku mu Ngibea. Abo pa kutwela’mo, bashikata mu kīkwe kya mu kibundi, ino i kutupu muntu webaselēle mu yandi njibo balāle’mo bufuku.+
16 Kitatyi pa kupita’po kine kyolwa’kya, mununu umo wadi utamba ku mwingilo wandi wa madimi. Wadi wa ku ntanda ya ngulu ya Efelaimi,+ ino wadi ushikete kitatyi kampanda mu Ngibea; inoko bekadi ba kibundi i bene Benjemani.+
17 Aye pa kwela meso, wamona yewa wadi mu lwendo wikele mu kīkwe kya mu kibundi, mununu’wa waipangula’mba: “Le wendanga kwepi, ne kotamba kwine i kwepi?”
18 Nandi walondolola’mba: “Tutambanga ku Betelema mu Yuda twenda ku kyaba kya kulampe bininge mu ntanda ya ngulu ya Efelaimi, kwine konatambile. Naendele ku Betelema mu Yuda,+ pano ñendanga ku njibo ya Yehova,* ino kekudipo muntu nansha umo wanselela mu njibo yandi.
19 Tudi na biyombo ne bidibwa bya bampunda+ betu, ne mikate+ ne vinyu yami, pamo ne mwana-mukaji, ne mwingidi wetu. Kekudipo kintu kibudilwe.”
20 Ino mununu’wa wanena’mba: “Ndoe ikale nenu! Nsa kwimulongela byonso byomukimba. Inoko kemwakilālai bufuku mu kīkwe.”
21 Penepo wamuselela mu njibo yandi, wapa ne bampunda byakudya.* Kupwa baoya ku maulu, badya batoma.
22 Pobadi bakisangaja, bana-balume bamo ba bitupu ba mu kibundi bajokoloka njibo kebatutula ku mulango, koku banena’nka kunena mununu mwinē njibo’wa amba: “Witulupwile mwana-mulume watwelanga mu yobe njibo tulāle nandi.”+
23 Ponkapo mwinē njibo watambila panja kaebanena’mba: “Lekai, a banabetu, kemukilongai kino kilongwa kibi. Nemwisāshila, uno mwana-mulume i mweni mu njibo yami. Kemukilongai kino kilongwa kya bumvu.
24 Kudi wami mwana mwana-mukaji mujike ne mukaji wa pafula wa uno mwana-mulume. Lekai nemulupwile’bo panja, mubwanya kwibafwija bumvu shi ye momusakila.*+ Ino kemufwaninwepo kulonga kino kilongwa kya bumvu kudi uno mwana-mulume.”
25 Ino bana-balume bapela kumuteja, penepo mwana-mulume wakwata wandi mukaji wa pafula+ webalupwila’ye panja. Balāla nandi ku bukomo bamōna bufuku bonso kufika ne ku lubanga. Kupwa bamuleka ende kibangabanga pa kutamba.
26 Lubanga futwi, mwana-mukaji’wa waiya waponena pa kibelo kya njibo ya mwana-mulume’wa, mwine mwadi mfumwandi, walāla ponka kufika ne byobwatōkele.
27 Mfumwandi pa kubūka lubanga futwi ne kushitula bibelo bya njibo mwanda wa kwendeleja lwendo lwandi, wamona mwana-mukaji, wandi mukaji wa pafula, ulēle pa kibelo kya njibo, makasa andi pa lukala lwa pa kibelo.
28 Ebiya wamunena’mba: “Imana; twaya.” Ino kumulondolola mpika. Kupwa mwana-mulume’wa wamutenteka pa mpunda, wataluka kaenda kwandi.
29 Pa kufika ku njibo yandi, wasela lupete lwa kusaya nalo wakwata wandi mukaji wa pafula wamusaya kidyoma pa kidyoma mu biseso 12, ebiya watumina kipindi ne kipindi kya ntanda ya Isalela kidyoma kimo.
30 Bonso bamwene kino banena’mba: “Kino kintu kekyalongekele kashā nansha kumonwa tamba difuku dyatambile bene Isalela mu ntanda ya Edipito kufika ne dyalelo. Langulukai’po,* kalai ñeni,+ mwitusapwilei bya kulonga.”
Kunshi kwa Dyani
^ Nansha’mba “kukwatakanya mutyima obe.”
^ Nansha’mba “kulengeja mutyima obe wivwane biyampe.”
^ Nansha’mba “kukwatakanya mutyima obe.”
^ Kishima pa kishima i, “pema.”
^ Bibwanika padi i, “ñingilanga ku njibo ya Yehova.”
^ Nansha’mba “wapa bampunda bidibwa bityange.”
^ Nansha’mba “mwibōne ne kulonga byobya biyampe mu meso enu.”
^ Nansha’mba “Tai’po mityima yenu.”
