Bene Levi 14:1-57
14 Yehova wesamba monka na Mosesa amba:
2 “Kino’ki kyo kifwaninwe kwikala kijila kya wa makopo mu difuku dya kutōkejibwa kwandi, shi kaselelwa kudi kitobo.+
3 Kitobo ukatamba panja pa nkambi ne kumubandaula. Shi wa makopo wabeluka ku makopo andi,
4 nabya kitobo ukamusoñanya asele toni tubidi tūmi twampikwa disubi, ne mutyi wa sedele, ne bityila pyā, ne kimuna kya hisopa bya kumusubula nabyo.+
5 Kitobo ukasoñanya’mba koni kamo kepaibwe mu kintu kya dilongo mudi mema a mulungu.
6 Ino ukayata koni kōmi pamo ne mutyi wa sedele, ne bityila pyā, ne kimuna kya hisopa, ukebitubika byonso pamo mu mashi a koni kepailwe mu mema a mulungu.
7 Kupwa ukakusa’o misunsa isamba-ibidi yewa mwine wisubula ku makopo ne kumutela bu wampikwa disubi, ebiya ukalekelela koni kōmi’ka mu ntanda.+
8 “Yewa wisubula ufwaninwe kukenda bivwalwa byandi ne kutenda myoya yandi yonso ne koya mema, penepa ukekala wampikwa disubi. Kupwa, ubwanya kutwela mu nkambi, inoko ukekala panja pa pema wandi mafuku asamba-abidi.
9 Mu difuku dya busamba-bubidi, ukatenda nywene yonso ku mutwe wandi ne ku matama andi ne makiki andi. Aye pa kupwa kutenda myoya yandi yonso, ukakenda bivwalwa byandi ne koya mema, penepa ukekala wampikwa disubi.
10 “Mu difuku dya mwānda, ukayata mikōko milume ibidi myana yampikwa bulema, ne kana ka mukōko kakaji kampikwa bulema+ ka mwaka umo ne kwika, ne bipindi bisatu bya pa bipindi dikumi bya efa* wa bukula bupēla butyange na māni bu kyamulambu kya miseke,+ ne kipimo kimo kya loki* wa māni;+
11 kitobo mwine umutela bu wampikwa disubi ukaleta muntu wisubula’wa, pamo ne byamulambu, ku meso a Yehova pa kibelo kya pema wa kubungakena’ko.
12 Kitobo ukayata mukōko mulume umo mwana ne kwiulambula bu kyamulambu kya mambo+ pamo ne kipimo kya loki wa māni, ukebipēpeja koku ne koku bu kyamulambu kya kupēpeja ku meso a Yehova.+
13 Penepo ukatapa mukōko mulume mwana’wa pa kifuko patapilwanga+ kyamulambu kya bubi ne kyamulambu kisōkwe, mu kifuko kijila, mwanda, kyamulambu kya bubi ne kyamulambu kya mambo i bya kitobo.+ I kintu kijila nakampata.+
14 “Penepo kitobo ukayata’ko mashi amo a kyamulambu kya mambo, kitobo ukela’o ku kanzele ka kutwi kwa lundyo kwa yewa wisubula ne pa kyala kya kuboko kwandi kwa lundyo ne pa dīna dya mukumo dya kulu kwandi kwa lundyo.
15 Kadi kitobo ukayata’ko māni+ mu kipimo kimo kya loki ne kupungulwila’o mu dikasa dyandi dya lunkuso.
16 Kitobo ukatubika munwe wandi wa ku lundyo mu māni adi mu dikasa dyandi dya lunkuso ne kukusa māni amo na munwe wandi misunsa isamba-ibidi ku meso a Yehova.
17 Kupwa kitobo ukela māni amo akashala mu dikasa dyandi ku kanzele ka kutwi kwa lundyo kwa yewa wisubula ne pa kyala kya kuboko kwandi kwa lundyo ne pa dīna dya mukumo dya kulu kwandi kwa lundyo pangala pa mashi a kyamulambu kya mambo.
18 Kitobo ukatūta māni ashele mu dikasa dyandi ku mutwe wa yewa wisubula’wa, kadi kitobo ukamupūtyila bubi ku meso a Yehova.+
19 “Kitobo ukela kyamulambu kya bubi+ ne kupūta bubi bwa yewa wisubula ku disubi dyandi, kupwa ukatapa kyamulambu kisōkwe.
20 Kitobo ukalambula kyamulambu kisōkwe ne kyamulambu kya miseke+ pa kisōkelo, kupwa kitobo ukamupūtyila bubi,+ penepa ukekala wampikwa disubi.+
21 “Inoko, shi i mulanda kadi kadipo na misokwe, nabya ukayata mukōko mulume mwana bu kyamulambu kya mambo mwanda wa kyamulambu kya kupēpeja, mwa kupūtyila bubi bwandi, pamo ne kipindi kimo pa bipindi dikumi bya efa* wa bukula bupēla butyange na māni bu kyamulambu kya miseke, ne kipimo kimo kya loki wa māni,
22 ne tukutyikutyi tubidi nansha bibondya bya bankunda bibidi, mungya misokwe yandi. Koni kamo kakekala ka kyamulambu kya bubi, kakwabo nako bu kyamulambu kisōkwe.+
23 Mu difuku dya mwānda,+ ukebiselela kudi kitobo mwanda wa kutōkejibwa kwandi pa kibelo kya pema wa kubungakena’ko ku meso a Yehova.+
24 “Kitobo ukayata owa mukōko mulume mwana wa kyamulambu kya mambo+ ne kipimo kimo kya loki wa māni, kadi kitobo ukapēpeja’byo koku ne koku bu kyamulambu kya kupēpeja ku meso a Yehova.+
25 Ebiya ukatapa owa mukōko mulume mwana wa kyamulambu kya mambo, kitobo ukayata mashi amo a kyamulambu kya mambo ne kwela’o ku kanzele ka kutwi kwa lundyo kwa yewa wisubula ne pa kyala kya kuboko kwandi kwa lundyo ne pa dīna dya mukumo dya kulu kwandi kwa lundyo.+
26 Kitobo ukapungulwila māni amo mu dikasa dyandi dya lunkuso,+
27 penepa ukakusa na munwe wandi wa ku lundyo māni amo adi mu dikasa dyandi dya lunkuso misunsa isamba-ibidi ku meso a Yehova.
28 Kadi kitobo ukela māni amo akashala mu dikasa dyandi ku kanzele ka kutwi kwa lundyo kwa yewa wisubula ne pa kyala kya kuboko kwandi kwa lundyo ne pa dīna dya mukumo dya kulu kwandi kwa lundyo pantu pamo ponka pawaelanga mashi a kyamulambu kya mambo.
29 Penepo kitobo ukatūta māni ashele mu dikasa dyandi ku mutwe wa yewa wisubula’wa, mwanda wa kumupūtyila bubi ku meso a Yehova.
30 “Ukalambula’ko kakutyikutyi kamo nansha kibondya kimo kya nkunda, mungya misokwe yandi,+
31 kyabwanya kusokola, kimo bu kyamulambu kya bubi kikwabo nakyo bu kyamulambu kisōkwe+ pamo ne kyamulambu kya miseke; kadi kitobo ukapūta bubi bwa yewa wisubula ku meso a Yehova.+
32 “Kino’ki kyo kijila kya yewa wadi na misongo ya makopo ino kadipo na misokwe pa kutōkejibwa kwandi.”
33 Ebiya Yehova wanena ba Mosesa ne Alone amba:
34 “Pomukatwela mu ntanda ya Kenani+ yonemupa bu kintu kyenu,+ shi natūla misongo ya makopo ku njibo imo mu ntanda yenu,+
35 nankyo mwinē njibo ukāya kulombola kitobo amba, ‘Kudi misongo yamweka mu yami njibo.’
36 Kitobo ukasoñanya balupule bintu byonso mu njibo kumeso kwa aye kwiya kubandaula misongo’ya, kutyina’mba wakatela bintu byonso bidi mu njibo amba i bya disubi; kupwa kitobo ukatwela kutadija njibo.
37 Ukabandaula popa padi luba, shi mumbu ya njibo idi na bīna bya musombelo wa mani masābuke nansha bityilakana kadi bimweka bu bikole mu lubumbu,
38 nabya kitobo ukatamba panja pa njibo dya pa kibelo kya njibo ne kushita njibo’ya mafuku asamba-abidi.+
39 “Ebiya kitobo ukajoka mu difuku dya busamba-bubidi ne kutadija. Shi misongo ibaandabila ku mumbu ya njibo,
40 nabya kitobo ufwaninwe kusoñanya’mba mabwe makwatwe na misongo akonkolwe ne kwelwa panja pa kibundi mu kifuko kya disubi.
41 Penepo ukakolweja njibo yonso munda, biloba byadi bishinwine’ko ne byobayengele nabyo byatalulwa’ko bikelwa panja pa kibundi mu kifuko kya disubi.
42 Ebiya bakasomeka mabwe makwabo momwa mobatalwile mabwe, kadi bakengidija bitoto bikwabo ne kushinwina njibo’ya.
43 “Ino shi misongo ibajoka, ibamweka mu njibo pa kupwa kukonkola mabwe ne pa kupwa kukololwa ne kushinwinwa’yo monka,
44 nabya kitobo ukatwela kwiitadija. Shi misongo ibaandabila mu njibo, nankyo i makopo mabimabi+ a mu njibo. Njibo’ya i ya disubi.
45 Penepo ukatūtyija njibo—mabwe ayo, mityi yayo, ne biloba byonso byadi bishinwine’ko ne byobayengele nabyo njibo—bikaselelwa panja pa kibundi ku kifuko kya disubi.+
46 Ino muntu ense utwela mu njibo’ya mafuku oishityilwe+ ukekala wa disubi kufika ne ku kyolwa;+
47 kadi muntu ense ulāla mu njibo’ya ukakenda bivwalwa byandi, ne muntu ense udīla mu njibo’ya ukakenda bivwalwa byandi.
48 “Inoko, shi kitobo waiya, wamone amba misongo keyandabilepo mu njibo papo ke mipwe kala kushinwinwa monka, nankyo kitobo ukatela njibo’ya bu yampikwa disubi, mwanda misongo ibapu.
49 Pa kutōkeja njibo’ya ku disubi,* ukayata toni tubidi, ne mutyi wa sedele, ne bityila pyā, ne kimuna kya hisopa.+
50 Ukepaila koni kamo mu kintu kya dilongo kidi’mo mema a mulungu.
51 Penepo ukayata mutyi wa sedele, ne kimuna kya hisopa, ne bityila pyā, ne koni kōmi, webitubika mu mashi a koni kaipailwe mu mema a mulungu, kupwa ukakusa’o ku njibo misunsa isamba-ibidi.+
52 Kadi ukatōkeja njibo’ya ku disubi* na mashi a koni, ne mema a mulungu, ne koni kōmi, ne mutyi wa sedele, ne kimuna kya hisopa, ne bityila pyā.
53 Kupwa ukalekelela koni komi’ka panja pa kibundi mu ntanda, ne kupūtyila njibo bubi, nayo ikekala yampikwa disubi.
54 “Kino’ki kyo kijila kitala misongo yonso ya makopo, ne luba lwa ku mutwe nansha ku myevu,+
55 ne makopo a ku kivwalwa+ nansha a ku njibo,+
56 ne bimenwa, bitāto ne makeme,+
57 pa kuyuka shi kintu i kya disubi ne shi kintu i kyampikwa disubi.+ Kino’ki kyo kijila kya makopo.”+
Kunshi kwa Dyani
^ Bipindi bisatu bya pa bipindi dikumi bya efa i malitele 6,6 (makwatyi 6 a byūmu). Tala Mbwejo B14.
^ Loki umo i bipindi 0,31 bya litele. Tala Mbwejo B14.
^ Kipindi kimo kya pa bipindi dikumi bya efa i malitele 2,2 (makwatyi 2 a byūmu). Tala Mbwejo B14.
^ Kishima pa kishima i, “bubi.”
^ Kishima pa kishima i, “bubi.”
