Danyele 1:1-21
1 Mu mwaka wa busatu wa bulopwe bwa Yehoyakimi+ mulopwe wa Yuda, Nebukaneza mulopwe wa Babiloni waiya ku Yelusalema wekitēkela kasāla.+
2 Mwenda mafuku Yehova wapāna Yehoyakimi mulopwe wa Yuda mu kuboko kwandi,+ pamo ne bipungwa bimo bya njibo* ya Leza wa bine, webiselela ku ntanda ya Shinadi*+ ku njibo* ya leza wandi. Watūla bipungwa’bya mu kibīko kya byabulēme kya leza wandi.+
3 Penepo mulopwe wasoñanya Ashepenaza mukulu wa bengidi bandi ba bulēme ba mu kipango asele bene Isalela* bamo, ne boba ba ku musuku wa bulopwe ne wa ba bulēme.+
4 Badi bafwaninwe kwikala bankasampe* bampikwa kabulema, bayampe mapala, bapebwe tunangu, buyuki, ne kusansanya,+ kadi babwanya kwingila mu njibo mikatakata ya mulopwe. Wadi wa kwibafundija bilembwa ne ludimi lwa bene Kaladea.
5 Ne kadi, mulopwe webatūdila mposo ya difuku ne difuku ku byakudya bya munsonso bya mulopwe ne ku vinyu yaadi utoma. Badi ba kufundijibwa* myaka isatu, kadi ku mfulo kwa kine kitatyi’kya badi ba kwingila mingilo ya mulopwe.
6 Ino mu bukata mwabo mwadi bamo ba ku kisaka* kya Yuda: Danyele,*+ Hanania,* Mishaele,* ne Azadia.*+
7 Kadi mukatampe wa bengidi ba bulēme ba mu kipango webenika majina;* wainika Danyele bu Beleteshazale,+ Hanania bu Shadelake, Mishaele bu Meshake, Azadia nandi bu Abedenengo.+
8 Ino Danyele wasumininwe mu mutyima wandi amba kakesubijapo na byakudya bya munsonso bya mulopwe nansha na vinyu yaadi utoma. Ebiya walomba mukatampe wa bengidi ba bulēme ba mu kipango amupe lupusa lwa kuleka kwisubija mu uno muswelo.
9 Leza wa bine walengeja mukatampe wa bengidi ba bulēme ba mu kipango atōkelwe Danyele mutyima* ne kumwivwanina lusa.+
10 Ino mukatampe wa bengidi ba bulēme ba mu kipango wanena Danyele amba: “Ntyinanga mfumwami mulopwe, mwine watūdile’ko byakudya ne byakutoma byenu. Le bikekala namani shi wamone’mba mapala enu ababipa kupita a bankasampe* ba yenu myaka? Mukampija* mambo ku meso a mulopwe.”
11 Ino Danyele wanena mulami obatūdile kudi mukatampe wa bengidi ba bulēme ba mu kipango kutala ba Danyele, Hanania, Mishaele, ne Azadia amba:
12 “Nakwisāshila, tompa bengidi bobe mafuku dikumi, betupe’ko byakudya bya mani ne mema a kutoma;
13 Kupwa udingakanye mapala etu na mapala a bankasampe* badyanga byakudya bya munsonso bya mulopwe, ebiya longa bengidi bobe mungya byobya byowakamona.”
14 Penepo waitabija mulangwe wabo, webatompa mafuku dikumi.
15 Ku mfulo kwa mafuku dikumi mapala abo alumbuluka kadi ajika* kupita a bankasampe* bonso badi badya byakudya bya munsonso bya mulopwe.
16 Ebiya mulami wadi utalula byakudya byabo bya munsonso ne vinyu yabo ne kwibapa byakudya bya mani.
17 Penepo Leza wa bine wapa bano bankasampe* baná buyuki ne bujinguludi mu bilembwa bya miswelo yonso ne tunangu; kadi Danyele wapelwe ñeni mu bimonwa ne bilotwa bya miswelo yonso.+
18 Ku mfulo kwa kitatyi kyatungile mulopwe kya kwibatweja,+ mukatampe wa bengidi ba bulēme ba mu kipango webaleta ku meso a Nebukaneza.
19 Pesambile nabo mulopwe, mu kibumbo kyonso kemwatenwepo muntu nansha umo wadi pamo bwa Danyele, Hanania, Mishaele, ne Azadia;+ kadi baendelele kwingila ku meso a mulopwe.
20 Mu mwanda onso wadi ulomba tunangu ne ñeni wadi wibepangula mulopwe, webamwene amba i batabuke misunsa dikumi babitobo ba maleñanya ne bampaki ba manga+ bonso ba mu ntanda yandi yonso.
21 Danyele waikala konka kufika ne mu mwaka mubajinji wa Mulopwe Kilusa.+
Kunshi kwa Dyani
^ Nansha’mba “tempelo.”
^ Ko kunena’mba, Babiloni.
^ Nansha’mba “tempelo.”
^ Kishima pa kishima i, “bana ba Isalela bana-balume.”
^ Kishima pa kishima i, “bana.”
^ Bibwanika padi i, “kudishibwa.”
^ Ko kushintulula’mba “Yehova Wakwasha.”
^ Pakwabo kishintulula’mba “I Ani Udi bwa Leza?”
^ Ko kushintulula’mba “Yehova Wantōkelwa Mutyima.”
^ Kishima pa kishima i, “bana bana-balume.”
^ Ko kushintulula’mba “Mutyibi Wami I Leza.”
^ Ko kunena’mba, majina a bene Babiloni.
^ Nansha’mba “akwatyilwe Danyele kanye.”
^ Kishima pa kishima i, “Mukapija mutwe wami.”
^ Kishima pa kishima i, “bana.”
^ Kishima pa kishima i, “bana.”
^ Kishima pa kishima i, “anuna mwita.”
^ Kishima pa kishima i, “bana.”
^ Kishima pa kishima i, “bana.”
