Divilu 10:1-29
10 Penepo Yehova wanena Mosesa amba: “Katwele kudi Felo, mwanda naleka mutyima wandi ne mityima ya bengidi bandi yūme,+ amba nombole bino biyukeno byami ku meso andi,+
2 ne amba ukasapwile bobe bana ne bobe bankana byonalonga bene Edipito na bulobo ne biyukeno byonalonga umbukata mwabo;+ kadi mukayuka binebine amba amiwa ne Yehova.”
3 Ebiya ba Mosesa ne Alone bakatwela kudi Felo kebamunena’mba: “Yehova Leza wa Bahebelu wanena namino amba, ‘Le ukapela kunkōkelelela kufika ne kitatyi’ka?+ Leka bantu bami bende bakañingidile.
4 Mwanda shi upele’nka nankyo kuleka bantu bami bende, nankyo kesha nsa kuleta njie mu yobe ntanda.
5 Kadi ikajika pangala pa ntanda, kebikabwanikapo kumona nshi. Ikadya byobya byapandile ku mvula wa mabwe ne byomushele nabyo, kadi ikadya mityi yenu yonso ikitama mu ntanda.+
6 Ikayula mu mobo obe, ne mu mobo a bengidi bobe bonso, ne mu mobo a Edipito ense, mu muswelo okeyamwenwe kashā na bashobe ne bankambo obe tamba kitatyi kyobaikele mu ino ntanda kufika ne dyalelo.’”+ Ponkapo wavundamuka, watamba kwa Felo.
7 Penepo bengidi ba Felo bamunena’mba: “Le uno muntu ukendelela kwituletela kyaka* kufika ne kitatyi’ka? Wibaleke bano bantu bende bakengidile Yehova Leza wabo. Le kumwenepo amba Edipito wasadika?”
8 Ebiya bajokeja ba Mosesa ne Alone kudi Felo, kaebanena’mba: “Endai, kengidilei Yehova Leza wenu. Ino le bene basa kwenda i bāni?”
9 Penepa Mosesa wanena’mba: “Tusa kwenda na bansongwalume ne bansongwakaji, ne banunu, ne betu bana bana-balume ne bana-bakaji, ne mikōko ne bañombe betu,+ mwanda tukasobelanga Yehova masobo.”+
10 Nandi webanena’mba: “Shi nemuleke mwende banwe ne benu bana, nabya bine Yehova udi nenu!+ Bibamweka patōka’mba mudi na milangwe ya kulonga bibi.
11 Ke nankyopo! Enka bana-balume kete bo basa kwenda bakengidile Yehova, mwanda e byomwalombele.” Ponkapo bebatambija ku meso a Felo.
12 Yehova wanena Mosesa amba: “Olola kuboko kobe pa ntanda ya Edipito mwanda wa njie ikande pa ntanda ya Edipito, idye munamuna yonso ya mu ntanda, kintu kyonso kyashele ku mvula wa mabwe.”
13 Penepa Mosesa waolwela mukombo wandi pa ntanda ya Edipito, Yehova nandi wapukumija kivula kya kutunduka pa ntanda’ya dyuba dyonso dituntulu ne bufuku bwine. Abo pa kukya lubanga, kivula kya kutunduka kyaleta njie.
14 Njie yakanda pa ntanda yonso ya Edipito, yatumba pa ntanda ya Edipito+ yonso mituntulu. Kyadi kikomo bininge;+ kashā kwadi kekwaikele njie mingi nabya, kadi keikekala’kopo mingi monka nabya.
15 Yapūta pangala pa ntanda yonso mituntulu, yafītyija ntanda fututu; yadya munamuna yonso ya mu ntanda ne bipa byonso bya ku mityi byashele ku mvula wa mabwe; i kutupu kintu kibishi kyashele ku mityi nansha ku munamuna ya mu madimi a mu ntanda yonso ya Edipito.
16 Ebiya Felo waita ba Mosesa ne Alone bukidibukidi kanena’mba: “Napi mambo kudi Yehova Leza wenu ne komudi banwe.
17 Shi ke pano, nakwisāshila, ndekele mambo ami uno musunsa umo kete, kadi zenzai Yehova Leza wenu antalule kino kipupo kileta lufu.”
18 Nandi* watamba kudi Felo wakazenza Yehova.+
19 Penepa Yehova washinta kivula, kyaikala ke kivula kikatampe kya kushika, kyasela njie yonso kyeyela mu Dijiba Dityila. I kutupu lujie nansha lumo lwashele mu ntanda yonso ya Edipito.
20 Inoko, Yehova waleka mutyima wa Felo ūme,+ kalekelepo bene Isalela bende.
21 Penepo Yehova wanena Mosesa amba: “Olola kuboko kobe mūlu amba kwikale mfindi pa ntanda ya Edipito, mfindi imo mikatampe ibwanya kutengwa.”
22 Ponkapo Mosesa waolola kuboko kwandi mūlu, kwaikala mfindi mikatampe mu ntanda yonso ya Edipito mafuku asatu.+
23 Kebadipo bemona, kadi i kutupu muntu nansha umo watalukile pawadi mu mafuku asatu; ino bene Isalela bonso badi na kitōkeji mu bīkalo byabo.+
24 Penepo Felo waita Mosesa kamunena’mba: “Endai, kengidilei Yehova.+ Enka mikōko ne bañombe benu bo basa kushala. Nansha ke benu bana bene, endai nabo.”
25 Ino Mosesa watentulula’mba: “Abe mwine usa kwitupa* ne bitapwa ne byamulambu bisōkwe, kadi tukalambula’byo Yehova Leza wetu.+
26 Tusa kwenda ne na bimunanwa byetu bine. Kekudipo nyema* nansha umo usa kushala, mwanda tukengidijanga’ko bamo pa kutōta Yehova Leza wetu, kadi ketuyukilepo kyotukalambula pa kutōta Yehova poso tufike’ko bidi.”
27 Ebiya Yehova waleka mutyima wa Felo ūme, kadi kaitabijepo kwibaleka bende.+
28 Felo wamunena’mba: “Ntaluke mu meso! Tá mutyima, kokatompa kumona mpala yami monka, mwanda difuku dyokeimona, ukafwanga.”
29 Penepo Mosesa wanena’mba: “Enka mowanenena’mo, nkikatompapo kumona mpala yobe monka.”
Kunshi kwa Dyani
^ Kishima pa kishima i, “kwikala bu dikinga.”
^ Mobimwekela i Mosesa.
^ Nansha’mba “kwituleka tumone.”
^ Kishima pa kishima i, “mukono.”
