Divilu 29:1-46
29 “E namino’u mokalongela pa kwibapandula amba bañingidile bu babitobo: Ukayata ñombe mwana, mikōko milume ibidi yampikwa kakoba,+
2 mikate yampikwa kiyujo, mikate yampikwa kiyujo idi bwa ntonto myele’ko māni, ne tumikate tupapakane twampikwa kiyujo tutūte’ko māni.+ Ukalonga’yo na bukula bwa ñano bupēla
3 wiyele mu kilala ne kwiileta mu kilala,+ pamo ne ñombe ne mikōko milume ibidi.
4 “Ukaleta Alone ne bandi bana bana-balume ku kibelo kya pema wa kubungakena’ko+ ne kwiboija mema.+
5 Kupwa ukayata bivwalwa+ wavwika Alone munkukumba, kotyi wa efoda wampikwa maboko, efoda, ne kivwalwa kya pa kyadi, kadi ukamukuta mu kifuka+ na kikaya* kya efoda kisuke wekiningisha.
6 Ukamuvwika ku mutwe wandi kivwalwa kya ku mutwe watūla ne kiyukeno kijila kya kwipāna* ku kivwalwa kya ku mutwe;+
7 kadi ukayata māni a kushinga+ wamupungulwila’o ku mutwe ne kumushinga’o.+
8 “Ebiya ukapityija kumeso bandi bana bana-balume webavwika minkukumba+
9 kadi ukebakuta ne nkuka, Alone ne bandi bana, ukebavwika tupūto twabo; kadi butobo bukekala bwabo bu kitungo kya lonso.+ E namino’u mokatūdila Alone ne bandi bana bengile bu babitobo.*+
10 “Penepo ukaleta ñombe ku meso a pema wa kubungakena’ko, ebiya Alone ne bandi bana bakatenteka makasa abo pa mutwe wa ñombe’wa.+
11 Ukatapa ñombe ku meso a Yehova, pa kibelo kya pema wa kubungakena’ko.+
12 Ukayata’ko mashi a ñombe ku munwe obe waela’o ku masengo a kisōkelo,+ kadi oa mashi onso akashala’ko ukamwanga’o pa kitako kya kisōkelo.+
13 Kupwa ukayata māni onso+ abumbile ku milá, ne bilamete ku dityima, ne mfyo ibidi ne māni adi’ko, ukebisōke amba bifitule mwishi pa kisōkelo.+
14 Ino mwita wa ñombe ne kiseba ne tuvwi twandi, ukebisōka na mudilo panja pa nkambi. I kyamulambu kya bubi.
15 “Penepo ukayata mukōko mulume umo, Alone ne bandi bana bakatenteka makasa abo pa mutwe wa mukōko’wa.+
16 Ukatapa mukōko mulume’wa, wayata mashi ao wakusa’o ku mitamba yonso ya kisōkelo.+
17 Ukasaya mukōko mulume bisesobiseso, wakenda milá yao+ ne maulu ayo, wapanga biseso pamo ne mutwe wao.
18 Ufwaninwe kusōka mukōko mulume onso mutuntulu, weufitula mwishi pa kisōkelo. I kyamulambu kisōkwe kudi Yehova, luvumba luyampe.*+ I kyamulambu kyelwe na mudilo kudi Yehova.
19 “Ebiya ukayata mukōko mulume mukwabo, Alone ne bandi bana bakatenteka makasa abo pa mutwe wa mukōko’wa.+
20 Ukatapa mukōko’wa, wayata’ko mashi amo waela’o ku kanzele ka kutwi kwa lundyo kwa Alone ne ku kanzele ka kutwi kwa lundyo kwa bandi bana ne pa kyala kya kuboko kwabo kwa lundyo ne pa dīna dya mukumo dya kulu kwabo kwa lundyo, kadi ukakusa mashi ku mitamba yonso ya kisōkelo.
21 Kupwa ukayata’ko mashi amo adi pa kisōkelo ne māni a kushinga+ wasūmijija’o Alone ne ku bivwalwa byandi ne bandi bana ne ku bivwalwa bya bandi bana, amba ne aye ne bivwalwa byandi ne bandi bana ne bivwalwa byabo bekale bajila.+
22 “Penepo ku mukōko mulume ukayata’ko māni, mukila munune, māni abumbile ku milá, ne bilamete ku dityima, ne mfyo ibidi ne māni adi’ko,+ ne kulu kwa lundyo, mwanda i mukōko mulume wa pa kutombolwa.+
23 Ukayata ne mukate mujokoloke ne mukate udi bwa lutonto mushinge’ko māni ne tumikate tupapakane mu kilala kya mikate yampikwa kiyujo kidi ku meso a Yehova.
24 Ufwaninwe kutūla yonso mu makasa a Alone ne mu makasa a bandi bana, kadi ukeipēpeja koku ne koku bu kyamulambu kya kupēpeja ku meso a Yehova.
25 Ebiya ukatalula’byo mu makasa abo wasōka’byo pa kisōkelo, pangala pa kyamulambu kisōkwe, ke luvumba luyampe* ku meso a Yehova. I kyamulambu kyelwe na mudilo kudi Yehova.
26 “Kupwa ukayata lukudi lwa mukōko mulume wa pa kutombolwa,+ ulambwidilwe Alone, welupēpeja koku ne koku bu kyamulambu kya kupēpeja ku meso a Yehova, kadi lukekalanga kipindi kyobe.
27 Ukapandula lukudi lwa kyamulambu kya kupēpeja ne kulu kwa kipindi kikola kyapēpejibwa ne kiyetwe ku mukōko mulume wa pa kutombolwa,+ walambwidilwe Alone ne bandi bana.
28 Kikekala kya Alone ne kya bandi bana pa musoñanya wa lonso ukalonda bene Isalela, mwanda i kipindi kikola, kadi kikekala kipindi kikola kya kuleta bene Isalela.+ I kipindi kyabo kikola mwanda wa Yehova ku bitapwa byabo bya kipwano.+
29 “Bivwalwa bijila+ bya Alone bikengidijibwa na bandi bana+ bakamulonda kitatyi kyobashingwa māni ne kutūlwa bu babitobo.
30 Kitobo wa mu bandi bana ukamupingakana ne kutwela mu pema wa kubungakena’ko mwanda wa kwingila mu kifuko kijila ukebivwala mafuku asamba-abidi.+
31 “Ukayata mukōko mulume wa pa kutombolwa ne kutēka mwita wao mu kifuko kijila.+
32 Alone ne bandi bana bakadya+ mwita wa mukōko’wa ne mukate udi mu kilala pa kibelo kya pema wa kubungakena’ko.
33 Bakadya bintu byapūtyilwe nabyo bubi pa kwibatūla bu babitobo* ne kwibapandula. Ino muntu kapelwepo lupusa* kakadi’byopo, mwanda i bintu bijila.+
34 Shi kubashala mwita wa kitapwa kya pa kutombolwa ne mukate kufika ne ku lubanga, nankyo ufwaninwe kusōka mu mudilo+ kyokya kyashele’ko. Kekikadibwapo, mwanda i kintu kijila.
35 “Ukalonga namino kudi Alone ne bandi bana, mwendele byonso byonakusoñanya. Ukalonga mafuku asamba-abidi pa kwibatūla bu babitobo.*+
36 Ukalambula ñombe wa kitapwa kya bubi difuku ne difuku mwanda wa kupūta bubi, kadi ukatōkeja kisōkelo ku bubi na kwikipūtyila bubi, kadi ukekishinga māni pa kwikipandula.+
37 Ukalonga mafuku asamba-abidi pa kupūtyila kisōkelo bubi, kadi ufwaninwe kwikipandula’mba kikale kisōkelo kijila+ nakampata. Muntu ense utenga ku kisōkelo ufwaninwe kwikala ujila.
38 “Bino’bi e byokalambula pa kisōkelo: mikōko milume ibidi ya mwaka umo difuku ne difuku, kyaba kyonso.+
39 Ukalambula mukōko mulume mwana umo lubanga, mukōko mulume mukwabo nao kapita i kāni.*+
40 Kipindi kimo kya pa bipindi dikumi bya efa* wa bukula bupēla butyange na kipindi kimo pa biná bya hina* wa māni onkaonka a mpafu miponde, ne kyamulambu kya bitomibwa kya kipindi kimo pa bipindi biná bya hina wa vinyu, mwanda wa mukōko mulume mwana umbajinji.
41 Ukalambula mukōko mulume mwana wa bubidi kapita i kāni,* pamo ne kyamulambu kya miseke ne kyamulambu kya bitomibwa pamo na bya lubanga. Ukebilonga ke luvumba luyampe,* kyamulambu kyelwe na mudilo kudi Yehova.
42 Kikekala kyamulambu kisōkwe kya kyaba ne kyaba mu nkongo yenu yonsololo pa kibelo kya pema wa kubungakena’ko ku meso a Yehova, pene ponkelombola kodi ne kwisamba nobe.+
43 “E ponkelombola kudi bene Isalela, kadi pakapandulwa na ntumbo yami.+
44 Nkapandulanga pema wa kubungakena’ko ne kisōkelo, kadi nkapandulanga Alone ne bandi bana bana-balume+ amba bañingidile bu babitobo.
45 Nkekalanga* umbukata mwa bantu ba Isalela, kadi nkekalanga Leza wabo.+
46 Nabo bine bakayukanga’mba amiwa ne Yehova Leza wabo, webalupwile mu ntanda ya Edipito amba ngikale umbukata mwabo.+ Amiwa ne Yehova Leza wabo.
Kunshi kwa Dyani
^ Nansha’mba “mutolo wa mu kifuka.”
^ Nansha’mba “nkaka ujila.”
^ Kishima pa kishima i, “kuyuja dikasa dya Alone ne dikasa dya bandi bana.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Kishima pa kishima i, “kuyuja makasa abo.”
^ Kishima pa kishima i, “mweni,” ko kunena’mba, muntu ke wa mu kisakapo kya Alone.
^ Kishima pa kishima i, “kuyuja makasa abo.”
^ Kishima pa kishima i, “pa bukata bwa byolwa bibidi.”
^ Efa umo i malitele 22 (makwatyi 20 a byūmu). Tala Mbwejo B14.
^ Hina umo i malitele 3,67. Tala Mbwejo B14.
^ Kishima pa kishima i, “pa bukata bwa byolwa bibidi.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “Nkekalanga mu pema.”
