Divilu 7:1-25
7 Penepo Yehova wanena Mosesa amba: “Tala, nakulonga kodi bwa Leza* kudi Felo, mwanenu Alone nandi ukekalanga mupolofeto obe.+
2 Abe ufwaninwe kupitulukila Alone mwanenu byonso byonkakusoñanya, aye nandi ukasapwila’byo Felo, nandi ukaleka bene Isalela batambe mu yandi ntanda.
3 Ami nami, nkaleka mutyima wa Felo ūme,+ kadi nkavudija biyukeno ne bingelengele byami mu ntanda ya Edipito.+
4 Ino Felo kakemwivwanapo, nami nkatenteka kuboko kwami pa Edipito ne kutambija bibumbo* byami, bantu bami, bene Isalela, mu ntanda ya Edipito na butyibi bukatampe.+
5 Bene Edipito bakayuka bine amba amiwa ne Yehova+ ponkōlola kuboko kwami pa Edipito ne kulupula bene Isalela umbukata mwabo.”
6 Ba Mosesa ne Alone balongele byebasoñenye Yehova; balonga enka nabya.
7 Mosesa wadi na myaka 80, Alone nandi na myaka 83 kitatyi kyobakesambile na Felo.+
8 Penepo Yehova walombola ba Mosesa ne Alone amba:
9 “Shi Felo wemunena’mba, ‘Longai kingelengele,’ nankyo ukalombola Alone amba, ‘Yata mukombo obe, ela’o pa nshi ku meso a Felo.’ Penepa ukalamukanga ke nyoka mukatampe.”+
10 Ebiya ba Mosesa ne Alone batwela kwa Felo, balonga monka mwasoñaninye Yehova. Alone waela mukombo wandi pa nshi ku meso a Felo ne a bengidi bandi, nao waalamuka ke nyoka mukatampe.
11 Ino Felo waityija bantu ba tunangu ne ba majende, ne babitobo ba maleñanya ba Edipito,+ nabo balonga bintu bimo byonka na maleñanya abo.+
12 Muntu ne muntu waela mukombo wandi pa nshi, nayo yaalamuka ke banyoka bakatampe; ino mukombo wa Alone wamina mikombo yabo.
13 Nansha nankyo, mutyima wa Felo waumine,+ kadi kebevwenepo enka mwanenene Yehova.
14 Penepa Yehova wanena Mosesa amba: “Mutyima wa Felo i mūmu.+ Wapele kuleka bantu bende.
15 Enda kudi Felo lubanga. Tala! Usa kutamba kwenda ku mema! Abe ufwaninwe kwimana mwa kwitanina nandi kufula kwa Munonga wa Nile; kadi sela mu kuboko kobe mukombo waalamukile ke nyoka.+
16 Ufwaninwe kumusapwila’mba, ‘Yehova Leza wa Bahebelu wantume kodi,+ wanena’mba: “Leka bantu bami bende bakañingidile mu ntanda mutuputupu,” ino abe kukōkelepo kufika ne pano.
17 Yehova wanena namino amba: “E pokayukila’mba amiwa ne Yehova.+ Nsa kukupila mema adi mu Munonga wa Nile na mukombo udi mu kuboko kwami, nao asa kwalamuka ke mashi.
18 Mwita udi mu Nile usa kufwa, Nile usa kununka luvumba lubi, kadi bene Edipito basa kukomenwa kutoma mema a Nile.”’”
19 Ebiya Yehova walombola Mosesa amba: “Nena Alone amba, ‘Yata mukombo obe ōlole kuboko kobe pa mema a Edipito,+ pa minonga yandi, pa mikola* yandi, pa bijiba byandi,+ ne pa bibīko byandi byonso, amba alamuke ke mashi.’ Kusa kwikala mashi mu ntanda yonso ya Edipito enka ne mu bintu bya mityi ne bya mabwe bine.”
20 Ponkapo ba Mosesa ne Alone balonga enka mwebasoñaninye Yehova. Alone watulula mukombo, wakupila mema a Munonga wa Nile ku meso a Felo ne a bengidi bandi, ebiya mema onso adi mu munonga aalamuka ke mashi.+
21 Mwita wadi mu munonga wafwa,+ munonga washilula kununka luvumba lubi, bene Edipito nabo kebabwenyepo kutoma mema a Nile,+ kwadi mashi konsokonso mu ntanda ya Edipito.
22 Inoko, babitobo ba maleñanya ba Edipito balonga bintu bimo byonka na bya maleñanya byabo,+ ebiya mutyima wa Felo waumina’ko, kadi kebevwenepo, enka mwanenene Yehova.+
23 Penepo Felo wajokela ku yandi njibo, katele’kopo ne mutyima mwine.
24 Ebiya bene Edipito bonso badi bakola kufulakufula kwa Nile bakimba mema a kutoma, mwanda kebadipo babwanya kutoma mema o-onso a Nile.
25 Kadi papityile mafuku asamba-abidi matuntulu Yehova pa kupwa kukupila Nile.
Kunshi kwa Dyani
^ Kishima pa kishima i, “nakulonga bu Leza.”
^ Kishima pa kishima i, “bibumbo bya divita.”
^ Ko kunena’mba, mikola itamba ku Nile.
