Eseta 4:1-17
4 Modekai+ pa kuyuka byonso byalongekele,+ wasana bivwalwa byandi, wavwala sāka ne kwitūta buto. Kupwa waenda mu bukata mwa kibundi, kadila bininge kadi bya bulanda.
2 Waenda kufika ne ku kibelo kya mulopwe, mwanda i kutupu muntu nansha umo wadi ubwanya kutwela ku kibelo kya mulopwe koku uvwele sāka.
3 Kadi mu ntanda yonso ya bubikavu*+ mwafikile kinenwa kya mulopwe ne mbila yandi, mwadi madilo makatampe mu bukata mwa Bayuda, badi bashikilwa na nzala,+ badila ne kuyoyokota. Bavule badi balēle mu masāka ne buto.+
4 Bengidi ba Eseta bana-bakaji ne bantungu bandi pa kwiya kumusapwila’byo, mukaja mulopwe wajingwa mutyima bininge. Penepa watumina Modekai bivwalwa bya kuvwala pa kyaba kya sāka, ino aye webipela.
5 Ponkapo Eseta waityija Hatake, ntungu umo wa mulopwe, waamutongēle amba amwingidile, wamusoñanya akepangule Modekai kine kyalongela nabya ne bine byalongeka.
6 Penepo Hatake waenda kudi Modekai mu kīkwe kya kibundi kumeso kwa kibelo kya mulopwe.
7 Modekai wamulombola myanda yonso yamufikīle ne bungi bwine bwa lupeto+ bwalaile Hamane kufuta mu kibīko kya byabulēme bya mulopwe mwanda wa konakanya Bayuda.+
8 Wamupa ne mukanda mutentule wa mbila milembe yaletelwe mu Shushane*+ mwanda wa kwibatukija fututu. Wadi wa kukalombola’yo Eseta ne kumushintulwila’yo, ne kumulombola+ akatwele kwa mulopwe, akamuzenze amba ebatōkelwe mutyima ne kumwisāshila aye mwine pa mwanda wa bantu bandi.
9 Hatake wajoka, walombola Eseta byanenene Modekai.
10 Eseta wanena Hatake alombole Modekai+ amba:
11 “Bengidi bonso ba mulopwe ne bantu ba matanda a bubikavu* a mulopwe bayukile biyampe amba shi mwana-mulume nansha mwana-mukaji watwela mu kipango kya munda+ kya mulopwe kwampikwa kwitwa, kudi enka kino kijila kikalondwa kya amba: Yao muntu ukepaibwa; ukekala mūmi poso’nka shi mulopwe wamutambika nkonto wa olo.+ Ino amiwa nkityilwepo kwa mulopwe pano ke mafuku 30.”
12 Pobalombwele Modekai byanenene Eseta,
13 walondolola Eseta amba: “Kokifwatakanya’mba usa kupanda kupita’ko Bayuda bakwabo bonso mwanda udi mu kipango kya mulopwe.
14 Mwanda shi ūbe talala mu kino kitatyi, kukūlwa ne kunyongololwa kwa Bayuda kukatamba kungi,+ ino abe ne njibo ya shobe musa kufwa. Kadi le i ani uyukile shi i pa mwanda wa kitatyi pamo bwa kino’ki kyowaikadile bu mukaja mulopwe?”+
15 Penepo Eseta walondolola Modekai amba:
16 “Enda, kakongakanye Bayuda bonso badi mu Shushane,* mushikilwe na nzala+ pa mwanda wami. Kemwakidyai nansha kutoma mu mafuku asatu,+ dyuba ne bufuku. Ami nami ne bengidi bami bana-bakaji, tusa kushikilwa na nzala. Nsa kutwela kwa mulopwe, nansha byokebikwatañenepo na kijila, shi kufwa mfwe.”
17 Ebiya Modekai waenda kadi walonga byonso byamulombwele Eseta kulonga.
Kunshi kwa Dyani
^ Nansha’mba “buludiki bwa kipindi kya ntanda.”
^ Nansha’mba “Susa.”
^ Nansha’mba “buludiki bwa bipindi bya ntanda.”
^ Nansha’mba “Susa.”
