Eseta 6:1-14
-
Modekai wazunzulwa na mulopwe (1-14)
6 Bwine bufuku’bwa mulopwe kalēlepo.* Penepo wanena balete mukanda wa bilembwa bya mānga ya bitatyi,+ ebiya batangila’o mulopwe.
2 Batene mulembwe myanda yasapwile Modekai ya ba Bikitana ne Teleshe, bengidi ba bulēme babidi ba mu kipango kya mulopwe, batulama ba pa kibelo, bakutyile kitumba kya kwipaya* Mulopwe Ahaswelusa.+
3 Mulopwe waipangula’mba: “Le Modekai wazunzwilwe ne kupalwa mpalo pa mwanda wa kino’ki?” Ponkapo bengidi ba mulopwe banena’mba: “Kebamulongēlepo kintu.”
4 Kupwa mulopwe wanena’mba: “Le i ani udi mu kipango?” Hamane papo watwelele mu kipango kya panja+ kya njibo* ya mulopwe amba asapwile mulopwe myanda ya kuyeyeka Modekai ku mutyi waamulongolwedile.+
5 Bengidi ba mulopwe bamulondolola’mba: “I Hamane+ wimene mu kipango.” Ebiya mulopwe wanena’mba: “Mutwejei.”
6 Hamane pa kutwela, mulopwe wamwipangula’mba: “Le i bika bifwaninwe kulongelwa muntu obasaka kuzunzula kudi mulopwe?” Hamane kanena mu mutyima wandi amba: “Lelo i ani obasaka kuzunzula kudi mulopwe kumpita ami?”+
7 Penepo Hamane wanena mulopwe amba: “Yewa muntu obasaka kuzunzula kudi mulopwe,
8 bamuselele bivwalwa bya bulopwe bivwalanga mulopwe,+ ne kabalwe kakandanga’po mulopwe, ne kilongo kya bulopwe ku mutwe wako.
9 Kupwa bivwalwa ne kabalwe bape’byo mfumu umo wa bulēme wa mulopwe, bavwike’byo muntu obasaka kuzunzula kudi mulopwe, kadi bamukandije pa kabalwe mu kīkwe kya kibundi. Bakela lubila ku meso andi amba: ‘Bino byo byalongelwa muntu obasaka kuzunzula kudi mulopwe!’”+
10 Ponkapo mulopwe wanena Hamane amba: “Pēlakana! Sela bivwalwa ne kabalwe, kalongele Modekai Muyuda ushikete pa kibelo kya mulopwe byabyo byowanena’byo. Kokaleka kulonga kintu nansha kimo mu byowanena’byo.”
11 Penepo Hamane wasela bivwalwa ne kabalwe, wavwika’byo Modekai+ ne kumukandija’po mu kīkwe kya kibundi, kaela lubila ku meso andi amba: “Bino byo byalongelwa muntu obasaka kuzunzula kudi mulopwe!”
12 Kupwa Modekai wajokela ku kibelo kya mulopwe, ino Hamane waenda lubilo ku yandi njibo, udila wipūtyile ku mutwe.
13 Hamane pa kusapwila wandi mukaji Zeleshi+ ne balunda nandi bonso byonso byamutene, bantu bandi ba tunangu ne wandi mukaji Zeleshi bamunena’mba: “Shi Modekai, mwine owaanza kupona ku meso andi, i mwanā Bayuda,* nankyo kusapo kumunekenya; na bubine usa kupona ku meso andi.”
14 Abo papo bakīsamba nandi, bengidi ba bulēme ba mu kipango kya mulopwe bafika, basela Hamane ende bya bukidi ku masobo asobele Eseta.+
Kunshi kwa Dyani
^ Kishima pa kishima i, “tulo twa mulopwe twanyema.”
^ Kishima pa kishima i, “kōlola kuboko padi.”
^ Nansha’mba “njibo mikatakata.”
^ Kishima pa kishima i, “mutambe ku lukunwa lwa Bayuda.”
