Eseta 7:1-10
7 Penepo mulopwe ne Hamane+ baiya ku masobo asobele Eseta Mukaja Mulopwe.
2 Mulopwe wanena monka Eseta mu difuku dya bubidi kitatyi kya masobo a vinyu amba: “A Eseta Mukaja Mulopwe, le i bika byowalomba? Bikakupebwa. Le i bika byosaka? Nansha ke kipindi kya bulopwe bwami, kikakupebwa!”+
3 Eseta Mukaja Mulopwe walondolola’mba: “A mulopwe, shi ubantōkelwa mutyima, kadi shi kibasangaja mulopwe, nabya nalombe būmi* bwami bumpebwe, kadi nasake bantu bami.+
4 Mwanda twi bapotolojibwe,+ amiwa ne bantu bami, amba betutukije fututu, betwipaye, ne kwitonakanya.+ Shi twadi’tu bapotolojibwe bu bapika bana-balume ne bana-bakaji, nadi wa kuba talala. Ino kino kyamalwa kekifwaninwepo, mwanda kikekadila mulopwe bibi.”
5 Penepo Mulopwe wanena Eseta Mukaja Mulopwe amba: “Le aye mwine i ani, ne yao muntu mwine wasomonwa kulonga kyakyo kintu udi kwepi?”
6 Eseta walondolola’mba: “Kinkwa ne walwana i uno muntu mubi Hamane.”
Hamane watuyuka mwanda wa mulopwe ne mukaja mulopwe.
7 Mulopwe waimana na bukalabale pa masobo a vinyu, waenda mu budimi bwa maluba bwa njibo mikatakata, ino Hamane waimana kaesāshila Eseta Mukaja Mulopwe mwanda wa būmi bwandi,* mwanda wajingulwile amba mulopwe i musumininwe kumupa mfuto.
8 Mulopwe watamba mu budimi bwa maluba bwa njibo mikatakata wajokela ku njibo ya masobo a vinyu, wamona Hamane uponene pa butanda padi Eseta. Penepo mulopwe wanena’mba: “Le kasake ne kulāla na mukaja mulopwe ku bukomo mu yami njibo?” Bino binenwa bitamba’tu mu kyakanwa kya mulopwe, bapūta Hamane mu mpala.
9 Penepo Halabona,+ mwingidi umo wa bulēme wa mu kipango kya mulopwe, wanena’mba: “Hamane i mulongolwele ne Modekai+ mutyi, muntu wasapwile myanda yapandije mulopwe.+ Owa wimene ku njibo ya Hamane, wa maboko 50* mu bula.” Ponkapo mulopwe wanena’mba: “Kamuyeyekei’ko.”
10 Penepa bayeyeka Hamane ku mutyi waalongolwedile Modekai, ebiya bukalabale bwa mulopwe bwatūka.
Kunshi kwa Dyani
^ Nansha’mba “muya.”
^ Nansha’mba “muya wandi.”
^ Kintu kya mametele 22,3 (mayo 73). Tala Mbwejo B14.
