Eseta 8:1-17

VUMIJA MU

Modekai wakandijibwa (1, 2)
Eseta uzenza mulopwe (3-6)
Mulopwe waleta lubila lwa kulwa na lubajinji (7-14)
Kukūlwa ne kusangala kwa Bayuda (15-17)

8 Mu dine difuku’dya Mulopwe Ahaswelusa wapa Eseta Mukaja Mulopwe njibo ya Hamane,+ walwana na Bayuda;+ ebiya Modekai waiya ku meso a mulopwe, mwanda Eseta wamulombwele mobabutwilwa.+ ² Penepo mulopwe wavūla lumpete lwandi lwa kashé+ lwawayete Hamane wapa’lo Modekai. Kadi Eseta wapa Modekai lupusa lwa kutala njibo ya Hamane.+ ³ Ne kadi, Eseta wesamba monka na mulopwe. Waponena ku maulu andi udila koku umuzenza afundule bibi byalongele Hamane mwine Akaka ne nkuku yandi yaakutyīle Bayuda.+ ⁴ Mulopwe watambika Eseta nkonto wa olo,+ Eseta nandi walanguka kaimene ku meso a mulopwe. ⁵ Kanena’mba: “Shi kibasangaja mulopwe ne shi wauntōkelwa mutyima, kadi shi i kyendele’mo kudi mulopwe ne shi namusangaja ku meso andi, kulembwe lubila lwa kwipaya bilembwa bya Hamane+ mudyumuku mwanā Hamedata mwine Akaka,+ byaalembele mwanda wa konakanya Bayuda mu matanda onso a bubikavu* a mulopwe. ⁶ Mwanda le mbwanya kutyumwina mu manwi namani pa kumona kyamalwa kisa kuponena bantu bami, kadi mbwanya kutyumwina mu manwi namani pa kumona bonakani bwa babutule bami?” ⁷ Penepo Mulopwe Ahaswelusa wanena Eseta Mukaja Mulopwe ne Modekai Muyuda amba: “Talai! Nape Eseta+ njibo ya Hamane kadi namuyeyekeje ku mutyi+ mwanda wa kitumba kyandi kya kutamba* Bayuda. ⁸ Shi ke pano mubwanya kulemba mu dijina dya mulopwe kintu kyonso kyomumona’mba kibwanya kukwasha Bayuda, mukome’po ne kashé na lumpete lwa kashé lwa mulopwe, mwanda lubila lulembelwe mu dijina dya mulopwe kadi lukomwe’po ne kashé na lumpete lwa kashé lwa mulopwe kelubwanyapo kutalulwa’ko.”+ ⁹ Penepo balembi ba mulopwe baitwa mu kine kitatyi’kya mu kweji wa busatu, ko kunena’mba kweji wa Shivana,* mu difuku dya 23, balemba byonso byasoñenye Modekai ku Bayuda, ne ku babilolo,+ ne ku bambikavu, ne ku bamfumu ba matanda a bubikavu*+ tamba ku India kutūla ne ku Efiopya, matanda a bubikavu* 127, ntanda ne ntanda ya bubikavu* mu mulembelo wayo kadi bantu ne bantu mu ludimi lwabo ne Bayuda nabo mu mulembelo wabo ne mu ludimi lwabo. ¹⁰ Walemba’lo mu dijina dya Mulopwe Ahaswelusa, wakoma’po ne kashé na lumpete lwa kashé+ lwa mulopwe, watuma bilembwa’bya na basedi ba mikanda bakandanga pa tubalwe; nabo bakanda pa tubalwe twa lubilo twa kutūla nato mikanda, tumuninwe mwanda wa mingilo ya bulopwe. ¹¹ Mu bino bilembwa, mulopwe wapele’mo Bayuda ba mu bibundi palapala lupusa lwa kwibunga pamo ne kulwila būmi bwabo,* ne kutukija fututu, kwipaya ne konakanya bibumbo byonso bya bantu nansha bya ntanda ya bubikavu* bibwanya kwibatamba, kubadila’mo ne bana-bakaji ne bana, kadi bebayate ne bintu byabo.+ ¹² Kino kyadi kya kulongeka mu difuku dimo mu matanda onso a bubikavu* a Mulopwe Ahaswelusa, mu difuku dya 13 dya kweji wa 12, ko kunena’mba, kweji wa Adala.*+ ¹³ Bilembwa* bya mukanda’wa byadi bya kuletwa bu kijila mu matanda onso a bubikavu.* Byadi bya kusapwilwa bantu bonso, mwanda wa Bayuda beteakanye ku dyodya difuku amba balubwile balwana nabo kinongo.+ ¹⁴ Basedi ba mikanda bakanda pa tubalwe twa kutūla nato mikanda twadi twingidijibwa mu mingilo ya bulopwe, baenda bukidi kadi lubilo na kishima kya mulopwe. Kijila kyaletwa ne mu Shushane*+ kibundi kya nsakwa.* ¹⁵ Penepo Modekai wataluka ku meso a mulopwe uvwele bisandi bya bulopwe bifītuluka ne bitōka, uvwele kilukwa kikatampe kya olo ne kikanzo kya pangala kya mbwija milumbuluke kya myoya ityilakana.+ Kadi kibundi kya Shushane* kyaela nsadi ya tusepo. ¹⁶ Ku Bayuda kwadi kukūlwa* ne nsangaji ne kusepelela ne bulēme. ¹⁷ Kadi mu matanda onso a bubikavu* ne mu bibundi byonso, konso kwafikile lubila lwa mulopwe ne kijila kyandi, Bayuda basangele ne kusepelela, basoba masobo ne kulonga mafetyi. Bantu bavule ba ntanda’ya badi betēla bu Bayuda,+ mwanda moyo wa kutyina Bayuda webaponēne.