Ezekyele 10:1-22
10 Ponadi ntala, namona pangala pa lwelēle lwadi peulu pa mitwe ya bakelubi, kintu kyadi pamo bwa dibwe dya safile kyamweka peulu pabo, kadi mumwekelo wakyo wadi wiifwene na lupona.+
2 Penepo wanena muntu wadi uvwele bukonge+ amba: Twela pa bukata bwa matonto ajokoloka,+ munshi mwa bakelubi, uyuje mu maboko obe abidi makala a mudilo+ adi pa bukata bwa bakelubi, ukeakusankanye mu kibundi.”+ Ebiya watwela ami papo ntala.
3 Bakelubi badi bemene ku lundyo lwa njibo patwelele muntu’wa, penepo mu kipango kya munda mwayula dikumbi.
4 Ebiya ntumbo ya Yehova+ yataluka pa bakelubi yaenda ku lukala lwa pa kibelo kya njibo, bityebitye dikumbi dyayula mu njibo,+ kadi kipango kyadi kiyule kitōkeji kya ntumbo ya Yehova.
5 Kadi lunwa lwa mapapa a bakelubi lwadi lubwanya kwivwanwa mu kipango kya panja, pamo bwa lunwa lwa Leza Mwinē Bukomo Bonso shi wisamba.+
6 Penepo wasoñanya muntu wadi uvwele bukonge amba: “Sela mudilo pa bukata bwa matonto ajokoloka, pa bukata bwa bakelubi,” nandi watwela, waimana kubwipi na ditonto.
7 Ebiya kelubi umo waolwela kuboko kwandi ku mudilo wadi pa bukata bwa bakelubi.+ Waopola’ko umo weutūla mu maboko onso abidi a muntu wadi uvwele bukonge’wa,+ nandi wasela’o watamba.
8 Bakelubi badi na kintu kyadi kimweka pamo bwa maboko a muntu munshi mwa mapapa abo.+
9 Ponadi ntala, namona matonto aná kubwipi na bakelubi, ditonto dimo kubwipi na kelubi ne kelubi, kadi matonto adi amweka bwa akelema pamo bwa dibwe dya kisodite.+
10 Ao onso aná adi amweka muswelo umo, amweka wita’mba ditonto dimo didi munda mwa ditonto dikwabo.
11 Poadi enda, adi abwanya kwenda ku mutamba o-onso pa mitamba iná pampikwa kutonta, mwanda adi enda pampikwa kutonta ku kifuko kwadi kutadidila mutwe.
12 Imbidi yabo yonso, manyuma abo, maboko abo, mapapa abo, ne matonto, matonto a abo bonso baná, adi mayule meso konsokonso.+
13 Pa mwanda wa matonto, naivwene diwi dieta’mba, “Matonto ajokoloka!”
14 Ense* wadi na mapala aná. Mpala mibajinji yadi mpala ya kelubi, mpala ya bubidi yadi mpala ya muntu,* ya busatu yadi mpala ya ntambo, ya buná nayo yadi mpala ya mukebo.+
15 Kadi bakelubi badi batekuka—i enka byobya bipangwa byūmi* byonamwene ku munonga wa Kebale+—
16 padi penda bakelubi, matonto nao adi enda pamo nabo; kadi padi patekuna bakelubi mapapa abo mwanda wa kutekuka peulu pa ntanda, matonto keadipo atonta nansha kwibasonsoloka.+
17 Shi abaimana, nao adi emana; shi abatekuka, nao adi atekuka pamo nabo, mwanda mushipiditu wadi wingila mu bipangwa byūmi* wadi moadi.
18 Penepo ntumbo ya Yehova+ yataluka pa lukala lwa pa kibelo kya njibo yakemana pa bakelubi.+
19 Ebiya bakelubi batekuna mapapa abo, batekuka panshi ami papo ntala. Matonto nao adi nabo pamo pobaendele. Bakemana pa ntwelelo ya kibelo kya kutunduka kya njibo ya Yehova, kadi ntumbo ya Leza wa Isalela yadi peulu pabo.+
20 Bino byadi bipangwa byūmi* byonamwene munshi mwa Leza wa Isalela ku munonga wa Kebale,+ ebiya nayuka’mba badi bakelubi.
21 Abo bonso baná badi na mapala aná, mapapa aná, ne kyokya kyadi kimweka bu maboko a muntu munshi mwa mapapa abo.+
22 Mapala abo adi amweka pamo bwa mapala onamwene kubwipi na munonga wa Kebale.+ Abo bonso badi benda kumeso bolokele swā.+
Kunshi kwa Dyani
^ Nansha’mba “ya bu muntu.”
^ Ko kunena’mba, kelubi ne kelubi.
^ Kishima pa kishima i, “i kipangwa kyūmi.”
^ Kishima pa kishima i, “mushipiditu wa kipangwa kyūmi.”
^ Kishima pa kishima i, “Kino i kipangwa kyūmi.”
