Ezekyele 12:1-28
12 Kinenwa kya Yehova kyaiya monka kondi amba:
2 “Mwanā muntu, ushikete mu njibo mitomboke. Badi na meso a kumona nao, ino abo kumona mpika, kadi badi na matwi a kwivwana nao,+ ino abo kwivwana mpika, mwanda abo i njibo mitomboke.+
3 Ino abe, mwanā muntu, longolola bivwe wende mu bu musungi. Ebiya, ukenda dyuba mu bu musungi abo papo batala. Tamba ku njibo yobe wende mu bu musungi ku kifuko kikwabo abo papo batala. Padi bakata’ko mutyima, nansha byobadi bu njibo mitomboke.
4 Dyuba, abo papo batala, lupula bivwe byobe panja mwanda wa kwenda mu bu musungi, ebiya kyolwa abo papo batala, ukataluka pamo bwa muntu waselwa bu musungi.+
5 “Tubula kipunzu mu lubumbu abo papo batala, ulupwile’po bintu byobe.+
6 Abo papo batala, witwike bintu byobe pa kipuji, wibitambije mu fukutu. Wipūte mpala yobe kutyina wakamona pa nshi, mwanda nsa kukulonga kodi kiyukeno ku njibo ya Isalela.”+
7 Nalongele enka mobansoñaninye. Nalupula bivwe byami dyuba pamo bwa bivwe bya kwenda nabyo mu bu musungi, kadi kyolwa natubula kipunzu mu lubumbu na makasa. Apo pakifīta, nalupula bintu byami, nebisela pa kipuji ku meso abo.
8 Lubanga kinenwa kya Yehova kyaiya monka kondi amba:
9 “Mwanā muntu, le njibo ya Isalela, njibo mitomboke, keyakwipangwilepo amba, ‘I bika byolonga?’
10 Wibasapwile amba, ‘Mfumu Mwinē Lupusa Lonso Yehova wanena namino amba: “Uno’u i musapu utala mfumu+ mu Yelusalema ne njibo yonso ya Isalela mu kibundi.”’
11 “Nena’mba, ‘Ami ne kiyukeno komudi.+ Monka monalongela, ye mobakalongelwa. Bakenda bu misungi, mu bu misungi.+
12 Mfumu udi mu bukata mwabo ukasela bintu byandi pa kipuji ne kutamba mu fukutu. Ukatubula kipunzu mu lubumbu ne kutambijija’po bintu byandi.+ Ukapūta mpala yandi kutyina wakamona pa nshi.’
13 Nkamuta bukonde, nandi ukapya mu bukonde bwami bwa buluwe.+ Kupwa nkamuselela ku Babiloni, ku ntanda ya bene Kaladea, ino kakeimonepo, kadi ukafwila’ko.+
14 Kadi bonso bamujokolokele, bakwashi bandi ne bibumbo byandi bya basola, nkebapalakenya ku mitamba yonso;+ kadi nkakulumuna kipete kya kwibalonda lubilo.+
15 Penepo bakayuka’mba ami ne Yehova ponebakusankenya mu mizo ne kwibapalakenya mu matanda.
16 Ino nkapandija batyetye mu bukata mwabo ku kipete, ku kipupo kya nzala, ne ku kipupo kya misongo, amba basapule bilongwa byabo byonso bya munyanji mu mizo mobakenda; penepo bakayuka’mba ami ne Yehova.”
17 Kinenwa kya Yehova kyaiya monka kondi amba:
18 “Mwanā muntu, ukadya mukate obe na luzakalo ne kutoma mema obe na milangwe mivutakane ne kuzumbazumba.+
19 Nena bantu ba ntanda’mba, ‘Mfumu Mwinē Lupusa Lonso Yehova wanena bekadi ba Yelusalema mu ntanda ya Isalela amba: “Bakadya mukate wabo na kuzumbazumba ne kutoma mema abo na nzuba, mwanda ntanda yabo ikasalwa fututu+ pa mwanda wa lūma lwa bonso bashikete’mo.+
20 Bibundi bikelwe na bantu bikasalwa, ntanda nayo ikekala ke mu ntanda mutuputupu;+ kadi mukayuka’mba ami ne Yehova.”’”+
21 Ebiya kinenwa kya Yehova kyaiya monka kondi amba:
22 “Mwanā muntu, le luno lukindi lomudi nalo mu Isalela lunena’mba, ‘Mafuku abai, kadi kimonwa kyonso kekifikidilepo’ i lukindi’ka?+
23 O mwanda wibanene amba, ‘Mfumu Mwinē Lupusa Lonso Yehova wanena namino amba: “Nkajimankanya luno lukindi, kadi kebakelwelapo monka bu lukindi mu Isalela.”’ Ino wibasapwile amba, ‘Mafuku abafwena,+ kadi kimonwa kyonso kikafikidila.’
24 Mwanda kekukekalapo monka kimonwa kya bubela nansha lubuko lwa lushiñanya* mu njibo ya Isalela.+
25 ‘“Mwanda ami, Yehova, nkesamba. Kinenwa kyonso kyonesamba kikalongeka pampikwa kwija.+ A njibo mitomboke, nkanena kinenwa mu enu mafuku+ ne kufikidija’kyo,” i Mfumu Mwinē Lupusa Lonso Yehova unena.
26 Kinenwa kya Yehova kyaiya monka kondi amba:
27 “Mwanā muntu, bantu ba* Isalela abanena namino amba, ‘Kimonwa kyaamona kisa kwija bininge, kadi unenanga bupolofeto bwa bintu bya kumeso bininge.’+
28 O mwanda wibasapwile amba: ‘Mfumu Mwinē Lupusa Lonso Yehova wanena namino amba: “‘I kutupu kinenwa kyami nansha kimo kikeja, kyonso kyonena ami kikalongeka,’ i Mfumu Mwinē Lupusa Lonso Yehova unena.”’”
