Ezekyele 13:1-23
13 Ebiya kinenwa kya Yehova kyaiya monka kondi amba:
2 “Mwanā muntu nena bupolofeto padi bapolofeto ba Isalela,+ kadi lombola boba bafwatakanya bupolofeto bwa abo bene* amba,+ ‘Ivwanai kinenwa kya Yehova.
3 Mfumu Mwinē Lupusa Lonso Yehova wanena namino amba: “Malwa abo bapolofeto babivila, balonda mushipiditu wa abo bene, abo papo kumona kintu mpika!+
4 A Isalela, bapolofeto bobe abaikala pamo bwa mikenge mu masala.
5 Kemukendapo ku bifuko bityumuke bya mumbu ya mabwe mwanda wa kūbakulwila’byo njibo ya Isalela,+ amba Isalela emanije mu bulwi mu difuku dya Yehova.”+
6 “Bamonanga bimonwa bya bubela ne kulaya bya bubela, boba banena’mba ‘Yehova wanena’mba,’ Yehova papo kwibatuma mpika, kadi batengele kufikidila kwa binenwa byabo.+
7 Le ke kimonwapo kya bubela kyomumona ne bubela bomulaya pomunena’mba, ‘Yehova wanena’mba,’ ami papo kunena kintu mpika?”’
8 “‘O mwanda Mfumu Mwinē Lupusa Lonso Yehova wanena namino amba: “‘Byomunena bya bubela kadi bimonwa byenu byobidi bya bubela, ami nsa kulwa nenu,’ i Mfumu Mwinē Lupusa Lonso Yehova unena.”+
9 Kuboko kwami kudi mu lwana na bapolofeto bamona bimonwa bya bubela kadi balaa bya bubela.+ Kebakekalapo mu bantu bami bonkulupile; kadi kebakalembwepo mu mukanda wa njibo ya Isalela; nansha abo kujokela ku ntanda ya Isalela; penepo mukayuka’mba ami ne Mfumu Mwinē Lupusa Lonso Yehova.+
10 Bino byonso’bi i pa mwanda wa kusāsukija kobasāsukija bantu bami pa kunena’mba, “Kudi ndoe!” ayo papo ndoe kutupu’yo.+ Kitatyi kyobobaka lubumbu luzoze, bashinwinanga’lo bitōka.’*+
11 “Sapwila boba bashinwina’ko bitōka amba lukapona. Kinya kya mvula kikāya, mabwe a mvula* akanoka, kadi kimpumpu kikomokomo kya luvula kikeluponeja.+
12 Kadi shi lubumbu lubapone bakemwipangula’mba, ‘Le kushinwina komwadi mushinwina kudi kwepi?’+
13 “O mwanda Mfumu Mwinē Lupusa Lonso Yehova wanena namino amba: ‘Nkapukumija kimpumpu kikomokomo kya luvula na bukalabale bwami, ne kunokeja kinya kikatampe kya mvula na bulobo bwami, ne mabwe a mvula na bukalabale bwami bwa konakanya.
14 Nkapomona lubumbu lomwashinwinine bitōka ne kwiluponeja panshi, kadi kyalwilo kyalo kikashibwa patōka. Pasa kupona kibundi, mukakuba’mo; penepo mukayuka’mba ami ne Yehova.’
15 “‘Shi nalekelela ne pa mfulo bukalabale bwami pa lubumbu ne pa boba belushinwinine bitōka, nkakunena’mba: “Lubumbu kelukidi’kopo, kadi boba belushinwina bitōka nabo kebakidi’kopo.+
16 Bapolofeto ba Isalela abaenda, boba banenena Yelusalema bupolofeto ne kumumwena bimonwa bya ndoe, ayo papo ndoe kutupu’yo,”’+ i Mfumu Mwinē Lupusa Lonso Yehova unena.
17 “Ino abe, mwanā muntu, tadija mpala yobe kudi bana bana-bakaji ba bantu bobe bafwatakanya bupolofeto bwa abo bene, unene bupolofeto pobadi.
18 Wibasapwile amba Mfumu Mwinē Lupusa Lonso Yehova wanena namino amba: “Malwa abo bana-bakaji basonena maboko abo onso milenda* ne balonga bilenda bya ku mitwe ya bukata bo-bonso mwanda wa kupoya būmi bwa* bantu! Lelo mupoyanga būmi bwa* bantu bami, mukimba’ko kulama būmi bwenu?*
19 Lelo mukankobakanya mu bantu bami mwanda wa mikono ya mebele a buluba ne tubibese twa mukate,+ mwipaya’ko boba* kebafwaninwepo kufwa ne kupandija boba* kebafwaninwepo kwikala bōmi, mulonga namino pa kubepela bantu bami bubela, bene bevwana bubela bwenu?”’+
20 “O mwanda Mfumu Mwinē Lupusa Lonso Yehova wanena namino amba: ‘A bana-bakaji, nsa kulwa na milenda yenu, yomwingidija mwanda wa kupoya bantu* pamo’nka bwa byoni, kadi nkeisana ku maboko enu ne kukutulula boba bomupoya pamo bwa byoni.
21 Nkasana bilenda byenu ne kukūla bantu bami ku kuboko kwenu, kadi kebakemwikadilapo monka bu kintu kya kukwata mu buluwe; penepo mukayuka’mba ami ne Yehova.+
22 Mwanda mubatyumuna mutyima wa moloke na bubela+ bwenu ami papo nkyadipo muletela tusua,* kadi mubakomeja maboko a yewa mubi,+ kutyina’mba wakajoka ku dishinda dyandi dibi amba ekale mūmi.+
23 O mwanda, banwe bana-bakaji kemukamonepo monka bimonwa bya bubela ne kubuka lubuko;+ kadi nkakūla bantu bami ku kuboko kwenu, penepo mukayuka’mba ami ne Yehova.’”
Kunshi kwa Dyani
^ Nansha’mba “banena bupolofeto bwa ku mutyima wa abo bene.”
^ Ko kunena’mba, kūbaka lubumbu lwa munda luzoze kadi lushinwinwe na bitōka mwanda wa kwilumwekeja bu lukomo.
^ Kishima pa kishima i, “ne abe, a mabwe a mvula.”
^ Ko kunena’mba, milenda ya maleñanya yadi ivwalwa mu nkongweba nansha nkonyenyo.
^ Nansha’mba “myuya ya.”
^ Nansha’mba “myuya ya.”
^ Nansha’mba “myuya yenu.”
^ Nansha’mba “myuya.”
^ Nansha’mba “myuya.”
^ Nansha’mba “myuya.”
^ Nansha’mba “masusu.”
