Ezekyele 17:1-24
17 Kinenwa kya Yehova kyaiya monka kondi amba:
2 “Mwanā muntu, tyonka lutyonko ne kwela lukindi pa mwanda wa njibo ya Isalela.+
3 Ukanena’mba, ‘Mfumu Mwinē Lupusa Lonso Yehova wanena namino amba: “Mukebo mukatampe,+ wa mapapa makatampe, mapapwa malampe, wa masala mangi kadi a misombelo, waile ku Lebanona,+ wasela nsongo ya mutyi wa sedele.+
4 Waposola nsongo ya ntonga yao, weiselela ku ntanda ya bansunga,* weitūla mu kibundi kya bansunga.+
5 Kupwa wasela nkunwa imo ya ntanda’ya,+ wakeitūla mu ntanda ya bumeni. Weikuna pamo bwa mutyi wa sole kubwipi na mema mangimangi.
6 Ebiya yamena, yaikala ke muñanza mwīpi, mukase+ wa mani metonte kadi miji yao yeala munshi mwao. Enka nenki yaikala ke muñanza kadi watota mitombo ne kwala misambo.+
7 “‘“Kadi kwaile mukebo mukwabo mukatampe,+ wa mapapa makatampe, mapapwa malampe.+ Penepo uno muñanza watandabwila bukidi bonka miji yao koudi, kulampe na matumba a mu budimi kowadi ukuninwe, kadi wabādila mani ao koudi amba eusangile mema.+
8 Wadi ke mukunwe kala mu budimi buyampe kubwipi na mema mangimangi, amba ulupule misambo, upe bipa ne kwikala muñanza mulumbuluke mpata.”’+
9 “Nena’mba, ‘Mfumu Mwinē Lupusa Lonso Yehova wanena namino amba: “Lelo ao ukekala biyampe? Lelo muntu kakakolapo miji+ yao ne kuboleja bipa byao ne kufumbija ntonga yao?+ Ukōma bininge, kadi pa kutukuna’o ku miji kebikalombepo kuboko kukomo nansha bantu bavule bene.
10 Nansha byowakunununwa, le ukekala biyampe? Le keukomepo tē shi kivula kya kutunduka kibeupukumina? Ukōma pa ditumba dya mu budimi poumenene.”’”
11 Kadi kinenwa kya Yehova kyaiya monka kondi amba:
12 “Nakwisāshila, sapwila njibo mitomboke amba, ‘Le kemuyukilepo mushintulwila bino bintu?’ Nena’mba, ‘Talai! Mulopwe wa Babiloni waile ku Yelusalema, wasela mulopwe wakyo ne bamfumu bakyo waenda nabo ku Babiloni.+
13 Kadi wasela ne muntu umo wa ku lutundu*+ lwa bulopwe, wasamba nandi kipwano ne kumutyipija mutyipo.+ Kupwa wasela bantu ba ntumbo ba ntanda’ya,+
14 amba bulopwe butūke, bukomenwe kwimana, ne amba bwendelele kwikala’ko enka shi bulame kipwano kyandi.+
15 Ino mfulo mfulō mulopwe wamutombokele+ pa kutuma mikendi yandi ku Edipito kukakimba tubalwe+ ne kibumbo kikatampe kya divita kobadi.+ Le ukanekenya? Lelo muntu ulonga bino bintu kakapebwapo mfuto? Le ubwanya kutyiba kipwano ne kupanda?’+
16 “‘“Bine ne byondi mūmi” i Mfumu Mwinē Lupusa Lonso Yehova unena, “aye ukafwila mu Babiloni, mu kifuko mushikatanga mulopwe* wamubikikile* bu mulopwe, mwinē mutyipo waafutulwile kadi mwinē kipwano kyaatyibile.+
17 Kadi kibumbo kikatampe kya divita ne bibumbo bingi bya basola bya Felo kebikakwashapo mu divita,+ pakemikwa mabunda a kasāla ne pakobakwa mumbu ya kasāla mwanda wa konakanya būmi bwa* bavule.
18 Aye wafutulula mutyipo ne kutyiba kipwano. Nansha byaalaile mulao wandi,* walonga bino bintu byonso, kakapandepo.”’
19 “‘O mwanda Mfumu Mwinē Lupusa Lonso Yehova wanena namino amba: “Bine ne byondi mūmi, nkaleta pa mutwe wandi byobya bilupuka ku kufutulula mutyipo+ wami ne ku kutyiba kipwano kyami.
20 Nkamuta bukonde bwami, nandi ukapya mu bukonde bwami bwa buluwe.+ Nkamuselela ku Babiloni ne kutwela nandi mu kidye kwine’kwa mwanda wanongēle bintu pampikwa kikōkeji.+
21 Bonso banyema mu bibumbo byandi bya basola bakapona ku kipete, kadi boba bakashala bakapalakanibwa ku mitamba yonso.*+ Penepo mukayuka’mba ami mwine, Yehova, nesambe’kyo.”’+
22 “‘Mfumu Mwinē Lupusa Lonso Yehova wanena namino amba: “Nkasela ntonga ku nsongo ya mutyi mulampe wa sedele+ ne kwiikuna, nkaposola ntonga inekena ku nsongo ya tumisambo twayo,+ kadi nkakuna’yo pa lūlu lupuñame kadi lulampe.+
23 Nkeikuna pa lūlu lulampe lwa Isalela; misambo yayo ikatama, kadi ikalupula bipa ne kwikala ke mutyi wa sedele mulumbuluke mpata. Byoni bya miswelo yonso bikashikata munshi mwao ne kwikala mu mwemba wa mani ao.
24 Kadi mityi yonso ya mu ntanda ikayuka’mba ami mwine, Yehova natūkija panshi mutyi mulampe ne kuzunzula mutyi mwīpi;+ naumija mutyi mubishi ne kulengeja mutyi mūmu utōye maluba.+ Ami mwine, Yehova, nesambe’kyo ne kulonga’kyo.”’”
Kunshi kwa Dyani
^ Kishima pa kishima i, “ntanda ya Kenani.”
^ Kishima pa kishima i, “lukunwa.”
^ Ko kunena’mba, Nebukaneza.
^ Ko kunena’mba, Zedekia.
^ Nansha’mba “myuya ya.”
^ Kishima pa kishima i, “byaaletele kuboko kwandi.”
^ Kishima pa kishima i, “ku mvula yonso.”
