Ezekyele 20:1-49
20 Penepo mu mwaka wa busamba-bubidi, mu kweji wa butano, mu difuku dya dikumi dya kweji, bakulumpe bamo ba Isalela baiya, bashikata ku meso ami mwanda wa kwipangula Yehova.
2 Ebiya kinenwa kya Yehova kyaiya kondi amba:
3 “Mwanā muntu, wisambe na bakulumpe ba Isalela, wibalombole amba, ‘Mfumu Mwinē Lupusa Lonso Yehova wanena namino amba: “Le mubaiya kungipangula? ‘Bine ne byondi mūmi, nkikalondololapo kyomungipangula’kyo,’+ i Mfumu Mwinē Lupusa Lonso Yehova unena.”’
4 “Lelo wi mwilongolole kwibatyibila mambo?* A mwanā muntu, lelo wi mwilongolole kwibatyibila mambo? Wibayukije bintu bya munyanji byalongele bakulutuba babo.+
5 Wibalombole amba, ‘Mfumu Mwinē Lupusa Lonso Yehova wanena namino amba: “Difuku dyonātongele Isalela,+ nātyipīle* ne lutundu* lwa njibo ya Yakoba mutyipo, kadi nēyukenye kobadi mu ntanda ya Edipito.+ Bine, nebatyipīle kenena’mba, ‘Ami ne Yehova Leza wenu.’
6 Mu dine difuku’dya, nātyipile amba nkebatambija mu ntanda ya Edipito ne kwibendeja mu ntanda yonebakimbīle,* ntanda ikuka mabele ne būki.+ Yādi milumbuluke kutabuka* mu matanda onso.
7 Penepo nebanena’mba, ‘Muntu ne muntu ele kulampe bintu bya munyanji bidi ku meso enu; kemwakesubijai na bilezaleza bya mukenye* bya Edipito.+ Ami ne Yehova Leza wenu.’+
8 “‘“Ino bāuntombokela kadi kebāsakilepo kungivwana. Kebāelelepo kulampe bintu bya munyanji byadi ku meso abo, kadi kebālekelepo bilezaleza bya mukenye bya Edipito.+ Penepo nālaa kwibapungulwila bukalabale bwami ne kulekelela bulobo bwami bonso pobadi mu ntanda ya Edipito.
9 Ino nālongele bintu pa mwanda wa dijina dyami kutyina’mba dyakakobakanibwa ku meso a mizo mobādi bekele.+ Mwanda nēyukenye kobadi* ku meso a ino mizo, ponēbatambije* mu ntanda ya Edipito.+
10 Penepo nēbatambija mu ntanda ya Edipito, nēbendeja mu ntanda mutuputupu.+
11 “‘“Ebiya nēbapa bitungo byami kadi nēbayukija mutyibilo wami wa mambo,+ amba muntu wibilonda amwene’mo būmi.+
12 Nēbapele ne masabato ami+ bu kiyukeno pa bukata bwa ami ne abo,+ amba bayuke amba ami Yehova, ye wibapandula.
13 “‘“Inoko njibo ya Isalela yāuntombokela mu ntanda mutuputupu.+ Kebānangīlepo mu bitungo byami, kadi bāpelele mutyibilo wami wa mambo, mwine ukamwena’mo muntu būmi shi weulonda. Bakobakenye bya binebine masabato ami. Penepo nālaa kwibapungulwila bukalabale bwami mu ntanda mutuputupu mwanda wa kwibakubija.+
14 Nālongele bintu pa mwanda wa dijina dyami kutyina’mba dyakakobakanibwa ku meso a mizo, mwine monēbatambije* ayo imwene.+
15 Kadi nēbatyipīle mu ntanda mutuputupu amba nkikebatwejapo mu ntanda yonēbapele+—ntanda ikuka mabele ne būki,+ milumbuluke kutabuka* mu matanda onso—
16 mwanda bāpelele mutyibilo wami wa mambo, kebānangīlepo mu bitungo byami, kadi bākobakenye masabato ami, ke-pantu mityima yabo yādi ilonda bilezaleza byabo bya mukenye.+
17 “‘“Ino ami* nebevwanine lusa, nkyēbonakenyepo; nkyēbakubijepo mu ntanda mutuputupu.
18 Nālombwele babo bana mu ntanda mutuputupu amba,+ ‘Kemukinangilai mu misoñanya ya bakulutuba benu+ nansha kulama butyibi bwabo nansha kwisubija na bilezaleza byabo bya mukenye.
19 Ami ne Yehova Leza wenu, nangilai mu bitungo byami, kadi lamai mutyibilo wami wa mambo ne kwiulonda.+
20 Pandulai masabato ami,+ kadi akekala bu kiyukeno pa bukata bwa ami ne banwe mwanda wa muyuke amba ami ne Yehova Leza wenu.’+
21 “‘“Ino bana bashilula kuntombokela.+ Kebānangīlepo mu bitungo byami, kadi kebālaminepo ne kulonda mutyibilo wami wa mambo, mwine ukamwena’mo muntu būmi shi weulonda. Bākobakenye masabato ami. Penepo nālaa kwibapungulwila bukalabale bwami, ne kulekelela bulobo bwami bonso pobādi mu ntanda mutuputupu.+
22 Ino nēshisa+ kadi nālonga bintu pa mwanda wa dijina dyami,+ kutyina’mba dyakakobakanibwa ku meso a mizo, mwine monēbatambije* ayo imwene.
23 Kadi nēbatyipīle mu ntanda mutuputupu amba nkebapalakenya mu mizo ne kwibakusankenya mu matanda,+
24 mwanda kebālondelepo mutyibilo wami wa mambo kadi bāpelele bitungo byami,+ bākobakenye masabato ami, bālondele* bilezaleza bya mukenye bya bakulutuba babo.+
25 Kadi nēbalekele balonde misoñanya keyadipo miyampe ne mutyibilo wa mambo mokebadipo babwanya kumwena būmi.+
26 Nēbalekele besubije na bitapwa byabo—pobāpityije mwana umbedi yense mu mudilo+—mwanda wa kwibasala, amba bayuke amba ami ne Yehova.”’
27 “A mwanā muntu, wisambe na njibo ya Isalela, wibalombole amba, ‘Mfumu Mwinē Lupusa Lonso Yehova wanena namino amba: “Ne mu uno muswelo namo, bakulutuba benu bāuntukile pa kunongela bintu pampikwa kikōkeji.
28 Nēbatwejeje mu ntanda yonātyipile kwibapa.+ Pobāmwene mikuna yonso milampe ne mityi ya mani mangimangi,+ bāshilula kulambula bitapwa byabo ne byamulambu byabo bisanshija. Bālambula luvumba luyampe* lwa bitapwa byabo ne kupungulwila byamulambu byabo bya bitomibwa kwine’kwa.
29 Penepo nēbepangula’mba, ‘Le uno mutenta komwenda i waka? (Ukitwanga bu Mutenta kufika ne dyalelo.)’”’+
30 “Pano nena njibo ya Isalela amba, ‘Mfumu Mwinē Lupusa Lonso Yehova wanena namino amba: “Le mwisubijanga na mwēsubijije bakulutuba benu pa kulonda bilezaleza byabo bya mukenye mwanda wa kulonga nabyo busekese bwa ku mushipiditu?+
31 Le mukīsubija kufika ne dyalelo na kulambula byamulambu ku bilezaleza byenu byonso bya mukenye, ne kupityija benu bana mu mudilo?+ A njibo ya Isalela, le ami nkalondolola kyomwipangula’kyo mu kitatyi kimo kyonka?+
“‘Bine ne byondi mūmi,’ i Mfumu Mwinē Lupusa Lonso Yehova unena, ‘Nkikalondololapo kyomungipangula’kyo.+
32 Kadi byabyo byomudi nabyo mu ñeni* pomunena’mba, “Twikalei pamo bwa mizo, pamo bwa bisaka bya matanda makwabo, batōta* mityi ne mabwe,”+ kebikalongekapo.’”
33 “‘Bine ne byondi mūmi,’ i Mfumu Mwinē Lupusa Lonso Yehova unena, ‘Nkemubikala bu mulopwe na kuboko kwa bukomo, na kuboko kōlole ne na bukalabale bupunguluka.+
34 Nkemutambija mu bantu ne kwimubungila pamo tamba ku matanda komupalakenine na kuboko kwa bukomo, na kuboko kōlole ne na bukalabale bupunguluka.+
35 Nkemutweja mu ntanda mutuputupu ya bantu kadi nkatwela nenu mu butyibi kwine’kwa mpala na mpala.+
36 “‘Monka monatwelele mu kidye na bakulutuba benu mu ntanda mutuputupu mwa ntanda ya Edipito, mo monkatwelela nenu mu kidye,’ i Mfumu Mwinē Lupusa Lonso Yehova unena.
37 ‘Nkemupityija munshi mwa mukombo wa mukumbi+ ne kwimutweja mu kijimba kya kipwano.
38 Ino nkatalula momudi bantomboki ne boba banjilwila.+ Mwanda nkebatambija mu ntanda yabo ya bweni, ino kebakatwelapo mu ntanda ya Isalela;+ penepo mukayuka’mba ami ne Yehova.’
39 “Ino banwe, a njibo ya Isalela, Mfumu Mwinē Lupusa Lonso Yehova wanena namino amba: ‘Muntu ne muntu ende akengidile bilezaleza byandi bya mukenye.+ Ino kupwa shi kemungivwenepo, kemukabwanyapo monka kukobakanya dijina dyami dijila na bitapwa byenu ne bilezaleza byenu bya mukenye.’+
40 “‘Mwanda mu lūlu lwami lujila, pa lūlu lulampe lwa Isalela,’+ i Mfumu Mwinē Lupusa Lonso Yehova unena, ‘po pakañingidila njibo yonso ya Isalela, abo bonso mu ntanda’ya.+ Nkebasangela kwine’kwa, kadi nkemulomba byabuntu byenu ne byangulwa bibajinji bya byamulambu byenu, bintu byenu byonso bijila.+
41 Nkemusangela pa mwanda wa luvumba luyampe,* ponkemutambija mu bantu ne kwimubungila pamo tamba ku matanda komupalakenine;+ kadi nkapandulwa mu bukata mwenu ku meso a mizo.’+
42 “‘Kadi mukayuka’mba ami ne Yehova+ ponkemutweja mu ntanda ya Isalela,+ mu ntanda yonatyipile kupa bakulutuba benu.
43 Kwine’kwa mukavuluka mwiendelejo wenu ne bilongwa byenu byonso byomwesubije nabyo,+ kadi mukekwatyilwa* mukenye pa mwanda wa bintu byonso bibi byomwalongele.+
44 Penepa mukayuka’mba ami ne Yehova ponkemulongela bintu pa mwanda wa dijina dyami,+ ke mwendelepo mwiendelejo wenu mubi nansha mwendele bilongwa byenu bibi, abe njibo ya Isalela,’ i Mfumu Mwinē Lupusa Lonso Yehova unena.”
45 Kadi kinenwa kya Yehova kyaiya monka kondi amba:
46 “Mwanā muntu, tadija mpala yobe ku mutamba wa mukenza wa kunshi kadi sapwila kunshi, unene ne bupolofeto ku ditó dya budimi bwa kunshi.
47 Nena ditó dya kunshi amba, ‘Ivwana kinenwa kya Yehova. Mfumu Mwinē Lupusa Lonso Yehova wanena namino amba: “Nsa kwakija mudilo podi,+ nao usa kusōka mityi yonso mibishi ne mityi yonso myūmu idi modi. Lubimbi lwa mudilo kelukabulepo,+ kadi lukasōka mapala onso, tamba kunshi kutūla ne kungala.
48 Kadi ngitu yonso* ikamona amba ami mwine Yehova, nedisōka mudilo, amba dileke kubula.”’”+
49 Kadi nanenene amba: “Yō, a Mfumu Mwinē Lupusa Lonso Yehova! Banenanga ami amba, ‘Mwene unenanga’tu mu ntyonko?’”*
Kunshi kwa Dyani
^ Nansha’mba “kwibemukija?”
^ Kishima pa kishima i, “natulwile kuboko kwami.”
^ Kishima pa kishima i, “lukunwa.”
^ Nansha’mba “yonēbabeledile.”
^ Nansha’mba “mineñenye.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Ko kunena’mba, Isalela.
^ Ko kunena’mba, Isalela.
^ Ko kunena’mba, Isalela.
^ Nansha’mba “mineñenye.”
^ Kishima pa kishima i, “diso dyami.”
^ Ko kunena’mba, Isalela.
^ Kishima pa kishima i, “meso abo adi ku.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Kishima pa kishima i, “mushipiditu.”
^ Nansha’mba “bengidila.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Kishima pa kishima i, “mukakwatyilwa mapala enu.”
^ Nansha’mba “bantu bonso.”
^ Nansha’mba “mu nkindi?”
