Ezekyele 22:1-31
22 Kadi kinenwa kya Yehova kyaiya monka kondi amba:
2 “Ino abe, mwanā muntu, le wi mwiteakanye kusapwila* kibundi kya mambo a mashi+ butyibi ne kwikilombola bintu byakyo byonso bya munyanji?+
3 Ukanena’mba, ‘Mfumu Mwinē Lupusa Lonso Yehova wanena namino amba: “Abe kibundi kimwanga mashi+ munda mwakyo, kine kiilwa na kitatyi,+ kadi kilonga bilezaleza bya mukenye* mwanda wa kwisubija akyo kine,+
4 mashi omwangile abakupija mambo,+ kadi bilezaleza byobe bya mukenye bibakusubija.+ Ubapēlakanya mfulo ya mafuku obe, kadi mfulo ya myaka yobe ibaiya. O mwanda nkakwalamuna kodi kintu kya kutukibwa ku mizo ne kintu kya kuzobejibwa ku matanda onso.+
5 Matanda a pabwipi ne a kulampe nobe akakuzobeja,+ abe wa dijina dya disubi kadi muyulwe lupotopoto.
6 Tala! Mfumu ense wa Isalela udi mu bukata mobe wingidijanga lupusa lwandi mwanda wa kumwanga mashi.+
7 Bafutululanga mu bukata mobe shabo ne inabo.+ Badimbanga mweni wa kibundi, kadi basusulanga mwana wampikwa shandi* ne mukaji wa kishala.”’”+
8 “‘Ubasubija bifuko byami bijila, kadi ubakobakanya masabato ami.+
9 Modi mudi bavubavuba basaka kumwanga mashi.+ Badyanga modi bitapwa pa ngulu ne kwiendeja bya kiboja mu bukata mobe.+
10 Bafutululanga modi butanda bwa shabo,*+ kadi bajilulanga mwana-mukaji wa disubi mwende ku mweji.+
11 Muntu umo uloñanga modi bilongwa bya munyanji na mukaja mukwabo,+ mukwabo nandi usubijanga mukaja wandi mwana na mwiendelejo wa kiboja,+ kadi ungi nandi ujilulanga mwanabo mwana-mukaji, mwanā shandi.+
12 Batyibwanga milomo modi mwanda wa kumwanga mashi.+ Abe wapujanga na kamweno+ nansha mwanda wa kumwena’mo,* kadi unyoñomonanga lupeto lwa balondakani nobe.+ Bine, ubaungilwa ilwē,’ i Mfumu Mwinē Lupusa Lonso Yehova unena.
13 “‘Tala! Nakupila bikufi byami bya mukenye pa bya budimbidimbi byomwena’mo ne pa bilongwa bya kumwanga mashi bidi mu bukata mobe.
14 Le bukankamane* bobe bukekala’ko nyeke ne maboko obe kwikala nyeke makomo mu mafuku onkakulonga kintu?+ Ami mwine, Yehova, nesambe’kyo, kadi nkalonga’kyo.
15 Nkakupalakenya mu mizo ne kukukusankenya mu matanda,+ kadi nkafudija disubi dyobe.+
16 Ukafutululwa ku meso a mizo, penepo ukayuka’mba ami ne Yehova.’”+
17 Kinenwa kya Yehova kyaiya monka kondi amba:
18 “Mwanā muntu, njibo ya Isalela ibaikala kondi pamo bwa bityani bya bituputupu. Abo bonso i mukuba, i maningi, i kyuma kadi i fweta mu nkelwa. Abaikala ke bityani bya ndalama.+
19 “O mwanda Mfumu Mwinē Lupusa Lonso Yehova wanena namino amba: ‘Banwe bonso byomwaikala pamo bwa bityani bya bituputupu,+ nsa kwimubungila pamo mu Yelusalema.
20 Monka mubungilwanga ndalama ne mukuba ne kyuma ne fweta ne maningi mu nkelwa mwanda wa kupuja’po mudilo ne kwibisungulula, e monka monkemubungila pamo na bulobo ne bukalabale bwami, kadi nkemupuja ne kwimusungulula.+
21 Nkemukongakanya ne kwimupujija mudilo wa bukalabale bwami,+ kadi mukasungululwa munda mwandi.+
22 Monka musungulwilwanga ndalama mu nkelwa, nenu mukasungululwa munda mwandi; kadi mukayuka’mba ami mwine, Yehova, napungulula bukalabale bwami pomudi.’”
23 Kadi kinenwa kya Yehova kyaiya monka kondi amba:
24 “Mwanā muntu, mulombole amba, ‘Abe wi ntanda keikatōkejibwapo nansha kunokelwa mvula mu difuku dya kufītwa mutyima.
25 Bapolofeto bandi abakute kitumba munda mwandi,+ pamo bwa ntambo ubuluma usasamuna kikwatwa.+ Babokotanga bantu.* Bakwatanga bya bupeta ne bintu bya bulēme. Abavudija bakaji ba kishala munda mwandi.
26 Babitobo bandi abajilula kijila kyami,+ kadi bakobakanyanga nyeke bifuko byami bijila.+ Kebasansanyangapo kintu kijila na kintu kya bitupu,+ abakomenwa kuyukanya kyokya kya disubi ne kyokya kyampikwa disubi,+ bapelanga kulama masabato ami, kadi nakobakanibwa mu bukata mwabo.
27 Bamfumu bandi badi mu bukata mwandi badi pamo bwa bampumpi basasamuna kikwatwa; bamwañanga mashi ne kwipaya bantu* mwanda wa kumwena mu bya budimbidimbi.+
28 Ino bapolofeto bandi bashinwinanga bitōka ku bilongwa byabo. Bamonanga bimonwa bya bubela ne kubuka lubuko lwa bubela,+ kebanena’mba: “Mfumu Mwinē Lupusa Lonso Yehova wanena’mba,” Yehova papo kunena mpika.
29 Bantu ba ntanda’ya badimbanga ne kunyoñomona bintu,+ basusulanga mufudilwe ne mulanda, kadi badimbanga mweni wa kibundi ne kumuponeja mu kidye.’
30 “‘Nadi nkimba muntu mu bukata mwabo wa kulongolola lubumbu lwa mabwe ne kwimanina ntanda’ya ku meso ami mu kipunzu, kutyina’mba yakonakanibwa,+ ino nkyatenepo nansha umo.
31 O mwanda nkebapungulwila kufītwa mutyima kwami ne kwibakubija na mudilo wa bukalabale bwami. Nkebaletela pa mutwe wabo byobya bilupuka ku dishinda dyabo,’ i Mfumu Mwinē Lupusa Lonso Yehova unena.”
Kunshi kwa Dyani
^ Kishima pa kishima i, “le ukatyiba mambo, le ukatyiba mambo a.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Nansha’mba “mwanā nshiye.”
^ Kishima pa kishima i, “bapūtulanga mutaka wa shabo.”
^ Nansha’mba “mwanda wa kumwena’mo kamweno katabuke’mo.”
^ Kishima pa kishima i, “mutyima.”
^ Nansha’mba “myuya.”
^ Nansha’mba “myuya.”
