Ezekyele 23:1-49
23 Kinenwa kya Yehova kyaiya monka kondi amba:
2 “Mwanā muntu, kwadi bana-bakaji babidi, bana ba inabo umo.+
3 Baikele ke bandumba mu Edipito;+ balongele bundumba tamba pa bwanuke bwabo. Badi bebafinya’mo ku mabele, kadi badi bebapolweja ku mabele abo a bujike.
4 Majina abo i ano: Mukulu i Ohola,* mwanabo nandi i Ohodiba.* Baikele ke bami, babutula bana bana-balume ne bana bana-bakaji. Pa mwanda wa majina abo, Ohola i Samadia,+ Ohodiba nandi i Yelusalema.
5 Ohola washilwile kulonga bundumba+ paadi wami. Wakomwa meso boba badi bamukenene,+ balondakani nandi bene Ashidia.+
6 Badi bambikavu bavwele bifītuluka ne baledi bampingakani—bansongwalume bonso balumbuluke bakandile pa tubalwe twabo.
7 Waendelele kulonga bundumba na bana bonso ba Ashidia balumbuluke kutabuka, kadi wesubije+ na bilezaleza bya mukenye* bya boba baakomenwe meso.
8 Kalekelepo bundumba bwaadi ulonga mu Edipito, mwanda balēle nandi pa bwanuke, kadi bamupolweje ku mabele a bujike, ne kumupungulwila kilokoloko kyabo.*+
9 Penepo namupāna mu kuboko kwa boba badi bamukenene, bana ba Ashidia+ baakomenwe meso.
10 Bapūtwile mutaka+ wandi, bakwata bandi bana bana-balume ne bana bana-bakaji,+ bamwipaya na kipete. Watumba mu bana-bakaji, kadi bafikidija butyibi pādi.
11 “Mwanabo Ohodiba pa kumona kino, kilokoloko kyandi kyabipila’ko, kadi bundumba bwandi bwabipa kupita ne bwa kaka wandi bwine.+
12 Wakomwa meso balondakani nandi bana ba Ashidia,+ bambikavu ne baledi bampingakani badi bavwele bya buya bwa dyangi kadi bakende pa tubalwe—bansongwalume bonso balumbuluke.
13 Aye pa kwisubija, namona’mba abo bonso babidi badi balonda dishinda dimo dyonka.+
14 Ino aye wadi’nka ubweja ku bilongwa byandi bya bundumba. Wamwene bana-balume balongwe ku lubumbu, bankishi basōnge ba bene Kaladea bakundakane,*
15 bavwele mikaba mu bifuka byabo, ne bivwalwa bya ku mutwe biyela ku mitwe yabo, bamweka pamo bwa bantu ba bulwi, abo bonso befwene bene Babiloni, babutwilwe mu ntanda ya bene Kaladea.
16 Aye’tu pa kwibamona washilula kwibakomwa meso, webatumina ne mikendi mu Kaladea.+
17 Penepo bana ba Babiloni badi bāya’nka kwiya ku butanda bwandi bwa buswe, bamusubija na kilokoloko kyabo.* Abo pa kupwa kumusubija, webavundamina* bya mukenye.
18 “Pawaendelele kulonga bundumba pampikwa bumvu ne kupūtula mutaka+ wandi, namuvundamina bya mukenye monka monavundamine* kaka wandi bya mukenye.+
19 Kadi wadi uvudija’nka kuvudija bilongwa byandi bya bundumba,+ uvuluka mafuku a pa bwanuke bwandi aadi ulonga bundumba mu ntanda ya Edipito.+
20 Webakomenwe meso pamo bwa bakaji ba pafula ba bantu badi na ngitu ya bwana-bulume idi pamo bwa ya mpunda ne mutaka udi pamo bwa wa kabalwe.
21 Abe waabile bininge mwiendelejo wa kiboja wa pa bwanuke bobe mu Edipito+ pobadi bakupolweja ku mabele, mabele a pa bwanuke bobe.+
22 “O mwanda, abe Ohodiba, Mfumu Mwinē Lupusa Lonso Yehova wanena namino amba: ‘Nsa kukutunwina boba bakukenene+ bowavundamine* bya mukenye, kadi nkakuletela’bo ku mitamba yonso,+
23 bana ba Babiloni+ ne bene Kaladea+ bonso, bantu ba Pekoda+ ne Shoa ne Koa, pamo ne bana bonso ba Ashidia. Abo bonso i bansongwalume balumbuluke, bambikavu ne baledi bampingakani, bantu ba bulwi kadi batongwe,* bonso bakende pa tubalwe.
24 Bakakutamba na lunwa lwa makalo a divita ne matonto ne na kitango kikatampe kya bibumbo bya basola, na ngabo mikatampe ne ngabo mityetye* ne kilama mutwe. Bakakujokoloka konsokonso, kadi nkebapa lupusa lwa kukutyibila mambo, nabo bakakutyibila mambo monso mobasakila.+
25 Nkamwekeja kufītwa mutyima kwami podi, bakakulongela bintu na bukalabale. Bakakuketa mulu ne matwi, kadi boba bakashala kodi bakapona ku kipete. Bakasela bobe bana bana-balume ne bana bana-bakaji, kadi boba bakashala kodi bakalotejibwa na mudilo.+
26 Bakakuvūla bivwalwa+ byobe ne kukuyata bidyangulwa byobe bilumbuluke.*+
27 Nkafudija mwiendelejo obe wa kiboja ne bundumba bobe,+ bwashilwile mu ntanda ya Edipito.+ Ukaleka kwibatala, kadi kukavulukapo Edipito monka.’
28 “Mwanda Mfumu Mwinē Lupusa Lonso Yehova wanena namino amba: ‘Kensa kukupāna mu kuboko kwa boba boshikilwe, boba bowavundamine* bya mukenye.+
29 Bakakulongela bintu na nshikani ne kukuyata byonso byowasusukīle,+ bakakushiya mutaka kadi pululu. Mutaka wa bumvu wa busekese bobe ne mwiendelejo obe wa kiboja ne bundumba bobe bikasokolwa patōka.+
30 Bino bintu bikakulongwa mwanda walondele mizo lubilo pamo bwa ndumba,+ mwanda wesubije na bilezaleza byabo bya mukenye.+
31 Walondele dishinda dimo dyonka na kaka obe,+ ami nkatūla kitomeno kyandi mu kuboko kobe.’+
32 “Mfumu Mwinē Lupusa Lonso Yehova wanena namino amba:
‘Abe ukatoma kitomeno kilampe kadi kikatampe kya kaka obe,+Kadi ukekala kintu kya kusepibwa ne kufutululwa, kya kitomeno mudi bivule.+
33 Ukanekenibwa na* bunkolwankolwa ne njia,Kitomeno kya nzuba ne musala,Kitomeno kya kaka obe Samadia.
34 Ukatoma’kyo ne kupwa’kyo+ kadi ukabokota ne bibese byakyo bya dilongo.
Kupwa ukasasamuna mabele obe.
“Mwanda ami mwine nesambe’kyo,” i Mfumu Mwinē Lupusa Lonso Yehova unena.’
35 “O mwanda Mfumu Mwinē Lupusa Lonso Yehova wanena namino amba: ‘Byowaungilwa ne kumpēlula,*+ ukangula bipa bya mwiendelejo obe wa kiboja ne bilongwa byobe bya bundumba.’”
36 Penepo Yehova waunena’mba: “Mwanā muntu, le ukasapwila Ohola ne Ohodiba+ butyibi ne kwibatuluja bilongwa byabo bya mukenye?
37 Abalonga makoji,*+ kadi mu maboko abo mudi mashi. Kebalongelepo’tu enka makoji na bilezaleza byabo bya mukenye, ino abapityija ne babo bana bobambutwidile mu mudilo ke byakudya bya bilezaleza byabo.+
38 Ne kadi, abaunonga ne bino’bi: basubije kipandulwe kyami mu dyodya difuku, kadi bakobakenye masabato ami.
39 Abo pa kupwa kutapa babo bana bu bitapwa ku bilezaleza byabo bya mukenye,+ batwelele mu kipandulwe kyami mwanda wa kwikikobakanya+ mu dine difuku’dya. Bino’bi e byobalongele mu njibo yami.
40 Batumine ne mukendi wa kwita bantu bāye kulampe.+ Abo pobadi bāya, abe waoile, wepenta meso obe ne kwineñenya na bya kwidyangula nabyo.+
41 Kadi washikata pa kitalu kya katūtu,+ meza māle ku meso akyo,+ powatūdile ensense yami+ ne māni ami.+
42 Lunwa lwa kibumbo kya bantu bampikwa malangalanga lwaivwanikwa kwine’kwa, mu bukata mwabo mwadi bankolwankolwa baselelwe mu ntanda mutuputupu. Bavwika bana-bakaji nzenze ku maboko ne bilukwa bilumbuluke ku mitwe yabo.
43 “Penepo nanena pa mwanda wa aye wadi mukōke na makoji amba: ‘Pano aye ukendelela kulonga bundumba bwandi.’
44 Badi batwela’nka kutwela kwadi, monka mwendelanga muntu kwa ndumba. Mo mobadi batwelela kwa Ohola ne kwa Ohodiba, bana-bakaji ba mwiendelejo wa kiboja.
45 Ino bantu boloke bakamutyibila mambo amufwaninwe pa mwanda wa makoji+ ne kumwanga mashi;+ mwanda abo i bana-bakaji ba makoji, kadi badi na mashi mu maboko abo.+
46 “Mwanda Mfumu Mwinē Lupusa Lonso Yehova wanena namino amba: ‘Kibumbo kya divita kikebaletelwa mwanda wa kwibalamuna ke kintu kya nzuba ne kintu kya kutūtwa.+
47 Kibumbo kya divita kikebasa mabwe+ ne kwibatapa na bipete byabo. Bakepaya babo bana bana-balume ne bana bana-bakaji+ ne kusōka mobo abo.+
48 Nkafudija mwiendelejo wa kiboja mu ntanda’ya, bana-bakaji bonso bakaboila’ko ñeni kadi kebakeulapo mwiendelejo wenu wa kiboja.+
49 Bakemuletela byobya bilupuka ku mwiendelejo wenu wa kiboja ne ku bubi bomulonga na bilezaleza byenu bya mukenye; kadi mukayuka’mba ami ne Mfumu Mwinē Lupusa Lonso Yehova.’”+
Kunshi kwa Dyani
^ Ko kushintulula’mba “Pema Wandi.”
^ Ko kushintulula’mba “Pema Wami Udi Mwadi.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Nansha’mba “kulonga nandi busekese.”
^ Nansha’mba “batyila.”
^ Nansha’mba “kulonga nandi busekese.”
^ Nansha’mba “muya wandi webavundamina.”
^ Nansha’mba “mwavundamine muya wami.”
^ Nansha’mba “bavundamine muya obe.”
^ Kishima pa kishima i, “betwe.”
^ Kangabo, divule kaselwanga na boba bela miketo.
^ Nansha’mba “bya kwidyangula nabyo.”
^ Nansha’mba “bavundamine muya obe.”
^ Kishima pa kishima i, “Ukayulwa.”
^ Kishima pa kishima i, “kungela kunyuma kobe.”
^ Ko kunena’mba, makoji a ku mushipiditu.
