Ezekyele 24:1-27
24 Kinenwa kya Yehova kyaiya monka kondi mu mwaka wa kitema, mu kweji wa dikumi, mu difuku dya dikumi dya kweji amba:
2 “Mwanā muntu, lemba dino difuku dya kweji,* dino difuku’di. Mulopwe wa Babiloni waanza kutamba Yelusalema mu dino difuku.+
3 Kadi ela lukindi* pa njibo mitomboke, wibanene amba:
“‘Mfumu Mwinē Lupusa Lonso Yehova wanena namino amba:
“Tūla kisuku kya kutēka’mo;* tūla’kyo pa mudilo upungulwile’mo ne mema.+
4 Ela’mo biseso bya mwita,+ biseso byonso biyampe,Kidyoma kya kulu ne kya kuboko; yuja’mo bikupa bilumbuluke kutabuka.
5 Yata mikōko milumbuluke kutabuka ya mu luombe,+ ukwike nkuni munshi monso mwa kisuku.
Sabija biseso, ne kutēka’mo bikupa.”’
6 “O mwanda Mfumu Mwinē Lupusa Lonso Yehova wanena namino amba:
‘Malwa akyo kibundi kimwanga mashi,+ kisuku kya kutēka’mo kya nkutu, kisuku kekitalwilwepo nkutu!
Talula’mo biseso kimokimo;+ kokita bubale pa mwanda wabyo.
7 Mwanda mashi akyo adi munda mwakyo;+ wapungulwile’o pa kidibwe pampikwa kintu.
Kapungulwile’opo panshi amba apūtwe na biloba.+
8 Mwanda wa kukolomona bukalabale bwa kulubula kinongo,Natūla mashi andi pa kidibwe kikelema, pampikwa kintuAmba aleke kupūtwa.’+
9 “O mwanda Mfumu Mwinē Lupusa Lonso Yehova wanena namino amba:
‘Malwa akyo kibundi kimwanga mashi!+
Nkalundika mulwi wa nkuni.
10 Kwika nkuni wakije mudilo,Tēka mwita biyampe, mwanga busuku, kadi leka bikupa bitēme.
11 Tūla kisuku kyonka pa makala mwanda wa kukabija’kyoAmba mukuba wakyo utyile pyā.
Busala bwakyo bukasunguluka munda mwakyo,+ kadi nkutu yakyo ikatēma.
12 Bikambakanyanga kadi bikokejana,Mwanda nkutu mingimingi keikatalukapo.+
Wikyele mu mudilo na nkutu yakyo!’
13 “‘Disubi dyobe dyatambile ku mwiendelejo obe wa kiboja.+ Natompele kukutōkeja, ino kwatōkelepo ku disubi dyobe. Kukatōkapo kufika ne bitūka bukalabale bwami.+
14 Ami mwine, Yehova, nesambe’kyo. Kikafika. Nkalonga bintu kwa kubulwa kujokela kunyuma, kwa kubulwa lusa, ne kwa kubulwa kwialakanya.+ Bakakutyibila mambo mwendele mashinda obe ne bilongwa byobe,’ i Mfumu Mwinē Lupusa Lonso Yehova unena.”
15 Kadi kinenwa kya Yehova kyaiya monka kondi amba:
16 “Mwanā muntu, nsa kufundula’ko yewa osenswe na mu kukopa kwa diso.+ Kufwaninwepo kudila madilo;* kadi kukayoyokotapo nansha kusūmija impolo.
17 Binza talala nyā, kadi kokalama bisela bya madilo pa mwanda wa bafwe.+ Wikute kivwalwa kya ku mutwe,+ vwala bikwabilo byobe.+ Kufwaninwepo kupūta mwevu wa pa mulomo wa kūlu,*+ kadi kokidya mukate obakuletela kudi bantu bakwabo.”*+
18 Ebiya nesamba na bantu lubanga, ino wami mukaji wafwa kyolwa. Penepo nalonga lubanga monka mobaunsoñaninye.
19 Bantu badi banena’mba: “Le ubulwepo kwitulombola buluji bwa bino bintu byolonga?”
20 Nebalondolola’mba: “Kinenwa kya Yehova kibaiyanga kondi amba,
21 ‘Lombola njibo ya Isalela amba: “Mfumu Mwinē Lupusa Lonso Yehova wanena namino amba, ‘Kensa kukobakanya kipandulwe kyami,+ nsulo ya mitatulo yenu mikatampe, kintu kyomusenswe kadi kisaka mutyima wenu.* Benu bana bana-balume ne bana bana-bakaji bomwashile bakapona ku kipete.+
22 Penepo mukalonga monka monalongela. Kemukapūtapo mwevu wenu wa pa mulomo wa kūlu, kadi kemukadipo mukate obemuletela kudi bantu bakwabo.+
23 Bya kupūta ku mutwe byenu bikekala ku mitwe yenu kadi bikwabilo byenu bikekala ku maulu enu. Kemukadilapo madilo nansha kuyoyokota. Ino mukabolela mu bilubo byenu,+ kadi mukabinza umo ku mukwabo.
24 Ezekyele waikala ke kiyukeno komudi.+ Monka mwaalongela, nenu ye momukalongela. Pokikafika, mukayuka’mba amiwa ne Mfumu Mwinē Lupusa Lonso Yehova.’”’”
25 “Ino abe, mwanā muntu, mu difuku dyonkebafundula nsakwa yabo mikomo—kintu kilumbuluke kya nsangaji yabo, kintu kyobasenswe, kisaka mutyima* wabo—pamo ne babo bana bana-balume ne bana bana-bakaji,+
26 bakakusapwila’kyo kudi yewa upandile’ko.+
27 Ukāsama kyakanwa kyobe mu dyodya difuku ne kwisamba na yewa upandile’ko, kadi kukekalapo monka kamāma.+ Ukekala bu kiyukeno kobadi, penepo bakayuka’mba amiwa ne Yehova.”
Kunshi kwa Dyani
^ Kishima pa kishima i, “dijina dya difuku.”
^ Nansha’mba “lukoyo.”
^ Nansha’mba “kisuku kya kutēka’mo kikata ku milomo.”
^ Nansha’mba “kwikupila pa kyadi.”
^ Nansha’mba “mulomo wa kūlu.”
^ Kishima pa kishima i, “mukate wa bantu.”
^ Nansha’mba “lusa lwa muya wenu.”
^ Nansha’mba “muya.”
