Ezekyele 25:1-17
25 Kinenwa kya Yehova kyaiya monka kondi amba:
2 “Mwanā muntu, tadija mpala yobe ku bene Amone,+ kadi nena bupolofeto bubi pobadi.+
3 Ufwaninwe kunena bene Amone amba, ‘Ivwanai kinenwa kya Mfumu Mwinē Lupusa Lonso Yehova. Mfumu Mwinē Lupusa Lonso Yehova wanena namino amba: “Byomwanenene amba ‘Ha ha!’ pa kipandulwe kyami kitatyi kyokyakobakanibwe, ne pa ntanda ya Isalela kitatyi kyoyalēle mu masala, ne pa njibo ya Yuda kitatyi kyoyaselelwe bu musungi,
4 o mwanda nsa kukupāna ku bantu ba Kutunduka bu kintu kyabo. Bakakutūdila mankambi* munda mobe ne kushimika mapema abo mu bukata mobe. Bakadya bipa byobe, kadi bakatoma mabele obe.
5 Nkalamuna Laba+ ke ntanda ya madyo a bangamedia, ntanda ya bene Amone nayo ke kīkalo kya luombe; penepo mukayuka’mba ami ne Yehova.”’”
6 “Mwanda Mfumu Mwinē Lupusa Lonso Yehova wanena namino amba: “Byowakupile makasa+ obe ne kutūtula maulu obe kadi wasangela* ntanda ya Isalela na kafutululo kakatampe uno muswelo,+
7 o mwanda nkakolwela kuboko kwami mwanda wa kukupāna ku mizo bu kintu kya kutūtwa. Nkakutyiba’ko mu bantu ne kukonakanya mu matanda.+ Nkakutukija fututu, penepo ukayuka’mba ami ne Yehova.’
8 “Mfumu Mwinē Lupusa Lonso Yehova wanena namino amba: ‘Moabu+ ne Seila+ byobanena’mba, “Talai! Njibo ya Yuda idi pamo bwa mizo yonso mikwabo,”
9 nsa kusokola patōka mutamba wa* Moabu ku bibundi byandi bya ku mukalo, buya bwa* ntanda yandi, Bete-Yeshimote, ne Bāla-Meone, kutūla ne ku Kidiataimi.+
10 Nkamupāna pamo ne bene Amone ku bantu ba Kutunduka bu kintu kyabo,+ amba bene Amone baleke kuvulukwa mu mizo.+
11 Nkafikidija butyibi mu Moabu,+ penepo bakayuka’mba ami ne Yehova.’
12 “Mfumu Mwinē Lupusa Lonso Yehova wanena namino amba: ‘Edoma walubwila njibo ya Yuda kinongo kadi wapi mambo makatampe pa kwibalubwila kinongo;+
13 o mwanda Mfumu Mwinē Lupusa Lonso Yehova wanena namino amba: “Nkōlola kuboko kwami ne padi Edoma, nkatyiba’ko muntu ne kimunanwa kine, kadi nkamusala.+ Bakapona ku kipete tamba ku Temani kutūla ne ku Dedane.+
14 ‘Nkalubwila Edoma kinongo kupityila ku kuboko kwa bantu bami bene Isalela.+ Bakaleta bulobo bwami ne bukalabale bwami pa Edoma, amba bemwene kinongo kyami,’+ i Mfumu Mwinē Lupusa Lonso Yehova unena.”’
15 “Mfumu Mwinē Lupusa Lonso Yehova wanena namino amba: ‘Pa mwanda wa lwana lwabo lwa endaenda, bene Fidishitia bakimbanga na nshikani* kulubula kinongo ne konakanya.+
16 O mwanda Mfumu Mwinē Lupusa Lonso Yehova wanena namino amba: “Nsa kōlola kuboko kwami pa bene Fidishitia,+ nkatyiba’ko bene Keleta+ kadi nkonakanya bekadi bashele’ko ba ku mbadi ya dijiba.+
17 Nkebalongela bilongwa bikatampe bya kinongo na mfuto mikalabale, penepo bakayuka’mba ami ne Yehova kitatyi kyonkebalubwila kinongo.”’”
Kunshi kwa Dyani
^ Nansha’mba “mankambi a mumbu.”
^ Nansha’mba “muya obe wasangela.”
^ Nansha’mba “kya kuneñenya nakyo.”
^ Nansha’mba “matēlo a.”
^ Nansha’mba “na kafutululo mu muya.”
