Ezekyele 26:1-21
26 Mu mwaka wa 11, difuku dibajinji dya kweji, kinenwa kya Yehova kyaiya kondi amba:
2 “Mwanā muntu, Tyila byaanenena Yelusalema bibi amba,+ ‘Ha ha! Kibelo kya bantu kibatyumunwa!+ Bintu byonso bikāya kondi, kadi nkekala mpeta pano pawasalwa’;
3 o mwanda Mfumu Mwinē Lupusa Lonso Yehova wanena namino amba: ‘A Tyila nsa kulwa nobe, kadi nkakukandijija mizo mingimingi, monka mukandijijanga dijiba mantanki adyo.
4 Bakonakanya mumbu ya Tyila ne kupomona biteba byandi,+ kadi nkakolola nshi ne kwiyalamuna ke kidibwe kikelema, pampikwa kintu.
5 Aye ukekala ke kifuko pa kwanika makonde a nkokwa mu bukata mwa dijiba.’+
“‘Mwanda ami mwine nesambe’kyo,’ i Mfumu Mwinē Lupusa Lonso Yehova unena, ‘kadi aye ukekala ke kitūtwa kya mizo.
6 Bīkalo* byandi mu ntanda bikatapwa na kipete, penepo bantu bakayuka’mba ami ne Yehova.’
7 “Mwanda Mfumu Mwinē Lupusa Lonso Yehova wanena namino’mba: ‘Tyila nsa kumutumina Nebukaneza* mulopwe wa Babiloni kungala;+ aye i mulopwe wa balopwe,+ udi na tubalwe,+ makalo a divita,+ basola ba pa tubalwe, ne kibumbo kya divita kya basola* bangibangi.
8 Aye ukonakanya na kipete bīkalo byobe mu ntanda, kadi ukakūbakila lubumbu lwa kasāla ne kukubundila dibunda dya kasāla kadi ukakwimikila ngabo mikatampe.
9 Ukatwa mumbu yobe bukulabukula na kipungwa kyandi kya kutūta nakyo,* kadi ukapomona biteba byobe na tusolwa twandi.*
10 Tubalwe twandi tukavula bininge enka ne byotukakupūta luvumbi, kadi lunwa lwa basola ba pa tubalwe, lwa matonto ne makalo lukatenkanya mumbu yobe pakatwela mu bibelo byobe, pamo bwa bantu batwela lubilo mu kibundi kya mumbu mityumuke.
11 Mikono ya tubalwe twandi ikatyampakanya bipito byobe byonso;+ aye ukepaya bantu bobe na kipete, kadi bikomo byobe bikomokomo bikapona pa nshi.
12 Bakeba bya bupeta byobe, ne kutūta bya busunga byobe,+ ne kupomona mumbu yobe, ne kutyumuna mobo obe malumbuluke; ebiya bakela mabwe obe ne bipungwa byobe bya mityi ne biloba byobe mu mema.’
13 “‘Nkafudija lunwa lwa ñimbo yobe, kadi kuvuma kwa nsense yobe kekukevwanwapo monka.+
14 Nkakwalamuna kodi kidibwe kikelema, pampikwa kintu kadi ukekala kifuko pa kwanika makonde a nkokwa.+ Kukōbakululwapo nansha dimo, mwanda ami mwine, Yehova, nesambe’kyo,’ i Mfumu Mwinē Lupusa Lonso Yehova unena.
15 “Mfumu Mwinē Lupusa Lonso Yehova wanena Tyila namino amba: ‘Pa lunwa lwa kupona kobe, pabinza boba bafwa,* kitatyi kitapwa bantu mu bukata mobe, le bisanga kebikazakalapo?+
16 Bamfumu bonso ba dijiba bakatūka pa mpona yabo ne kuvūla minkukumba* yabo kadi bakavūla bivwalwa byabo bitungule kadi bakakwatwa na* luzakalo. Bakashikata pa nshi ne kuzakala kyaba kyonso, koku bakutala byakanwa pululu.+
17 Bakakwimbila lwimbo lwa bulanda*+ kebakunena’mba:
“Yō, ubaoneka,+ abe wadi wikelwe na bantu ku majiba, kibundi kitendelwa;Abe ne bobe* bekadi mwadi bakomokomo pa dijiba,+Musambakanya luzakalo ku bekadi bonso ba ntanda!
18 Bisanga bikazakala difuku dyokapona,Bisanga bya dijiba bikakambakanibwa shi ubaenda.”’+
19 “Mwanda Mfumu Mwinē Lupusa Lonso Yehova wanena namino amba: ‘Ponkakusala pamo bwa bibundi kebikelwepo na bantu, ponkakutyinya na mema atūta ne pakakupūta mema makomo,+
20 nkakuselela ku bantu ba pa kala, abe ne boba batūkila nobe mu kīna;* nkakwikadija mu kifuko kya munshi bininge, pamo bwa bifuko bya kala byasadilwe, pamo ne boba batūkila mu kīna,+ amba uleke kwikalwa’mo. Penepo nkatumbija* ntanda ya bōmi.
21 “‘Nkakuletela luzakalo lwa mu kitulumukila, kadi kukekala’kopo monka.+ Bakakukimba, ino kebakakutanapo monka nansha dimo,’ i Mfumu Mwinē Lupusa Lonso Yehova unena.”
Kunshi kwa Dyani
^ Kishima pa kishima i, “Bana bana-bakaji.”
^ Kishima pa kishima i, “Nebukadeleza,” mulembelo mukwabo wa dino dijina.
^ Kishima pa kishima i, “bantu.”
^ Nansha’mba “kipungwa kya kutamba nakyo bulwi.”
^ Nansha’mba “bipete byandi.”
^ Kishima pa kishima i, “batapwe.”
^ Nansha’mba “makotyi ampikwa maboko.”
^ Kishima pa kishima i, “bakavwala.”
^ Nansha’mba “lwimbo lwa madilo.”
^ Kishima pa kishima i, “Aye ne bandi.”
^ Nansha’mba “kibundu.”
^ Nansha’mba “nkaneñenya.”
