Ezekyele 27:1-36
-
Lwimbo lwa bulanda pa kyombo kya Tyila kishika (1-36)
27 Kinenwa kya Yehova kyaiya monka kondi amba:
2 “Ino abe, mwanā muntu, imbila Tyila+ lwimbo lwa bulanda,*
3 nena Tyila amba,‘Abe ushikete pa bibelo bya dijiba,Nsunga wa bantu ba pa bisanga bingibingi,Mfumu Mwinē Lupusa Lonso Yehova wanena namino amba:
“A Tyila, ubanena abe mwine amba, ‘Ami ne wa buya bubwaninine.’+
4 Matanda obe adi mu bukata mwa dijiba,Kadi bōbaki bobe abalengeja buya bobe bwikale bubwaninine.
5 Balongele mbao yobe yonso na mityi ya jenevidiye ya ku Senila,+Kadi baselele mityi ya sedele ya ku Lebanona ya kukulongela nayo mikabo ya kidindo.
6 Balongele misupi yobe na mityi ya shene ya ku Bashane,Kadi mutofi obe wa kumeso wadi wa mutyi wa shipele mubambe’ko meno a nzovu a ku bisanga bya Kitimi.+
7 Bukonge bwa misombelo mingimingi bwa ku Edipito kyo kyadi kisandi kya kidindo kyobe,Kadi mbwija ya kitala kyobe yadi ya nyushi ifītuluka ne myoya ityilakana ya ku bisanga bya Edishā.+
8 Bekadi ba Shidona ne Alavada+ bo badi bobe ba kuvua.
Bantu bobe ba bwino, badi bengidi bobe ba mu kyombo, abe Tyila.+
9 Bantu bapotolwele myanda* kadi ba bwino ba ku Ngebale+ badi bakujikila mitanta.+
Byombo byonso bya dijiba ne bengidi bobe ba mu masua badi bāya kodi kusunga bya busunga.
10 Bantu ba Peleshia, ne Luda, ne Puta+ badi mu kibumbo kyobe kya divita, bantu bobe ba divita.
Badi bakobeka mangabo abo ne bilama mutwe kodi, kadi badi bakuletela buya bwa dyangi.
11 Bantu ba Alavada mu kibumbo kyobe kya divita badi bemene konsokonso pa mumbu yobe,Kadi bana-balume bankanka badi balama biteba byobe.
Bakobekele mangabo abo majokoloke konsokonso ku mumbu yobe.
Kadi balengeje buya bobe bwikale bubwaninine.
12 “‘“Talashishi+ wadi usunga nobe mwanda wa bupeta bobe bungibungi.+ Bakupotele bintu byobe ku ndalama, byuma, maningi, ne fweta.+
13 Yavana, Tubala,+ ne Mesheke+ basungile nobe, bakupota bya busunga byobe ku bapika+ ne bintu bya mukuba.
14 Njibo ya Tongalama+ yakupotele bintu byobe ku tubalwe ne tubalwe twa divita ne bimbulu.
15 Bantu ba Dedane+ basungile nobe; waingidije bansunga pa bisanga bivule; bakupele mulambu wa meno a banzovu+ ne mityi ya ebene.
16 Edoma wasungile nobe mwanda wa bintu byobe bingibingi. Bakupotele bintu byobe ku tilekwaze, myoya ityilakana, bintu bitungule na misombelo mingimingi, mbwija milumbuluke, mabwe a kolaye, ne mabwe a lubi.
17 “‘“Yuda ne ntanda ya Isalela basungile nobe, bakupota bintu byobe+ ku ñano ya Minite,+ byakudya bilumbuluke kutabuka, būki,+ māni, ne balasome.+
18 “‘“Damakasa+ wasungile nobe mwanda wa bintu byobe bingibingi ne bupeta bobe bonso, wasunga vinyu ya Helebone ne myoya ya Zahala.*
19 Vedane ne Yavana ku Uzala bakupotele bintu byobe ku byuma bifule, kasia* ne kanele.*
20 Dedane+ wasungile nobe bisandi bya pa bishikato* pa kushikata.
21 Abe waingidije Balabu ne bamfumu bonso ba Kedala,+ bansunga ba twana twa mikōko ne mikōko milume ne bambuji.+
22 Bansunga ba Sheba ne Laama+ basungile nobe; bakupotele bintu byobe ku mananshi a miswelo yonso malumbuluke kutabuka, mabwe malēme, ne olo.+
23 Halane,+ ne Kane, ne Edena,+ ne bansunga ba ku Sheba,+ ne Ashule,+ ne Kilemade basungile nobe.
24 Basungile mu nsoko yobe bivwalwa bilumbuluke, ne bikanzo bya pangala bilongwe na bifītuluka ne bintu bitungule bya misombelo mingimingi, ne matapi a misombelo mivule, byonso bikutwe ne kuningishibwa na myonji.
25 Byombo bya Talashishi+ byadi bibumbo bya bañenda mwanda wa bya busunga byobe,Penepo wayula ne kulēmenwa* mu bukata mwa dijiba.
26 Bantu bobe ba kuvua abakuselela mu majiba makatampe;Kivula kya kutunduka kibakonakanya mu bukata mwa dijiba.
27 Bupeta bobe, ne bintu byobe, ne bya busunga byobe, ne bengidi bobe ba ku masua, ne bengidi bobe ba ku kyombo,Boba bakujikila mitanta, ne boba basunga bya busunga byobe,+ ne bantu bonso ba divita+—Kibumbo* kyonso kidi modi—Byonso bikashika mu bukata mwa dijiba difuku dyokapona.+
28 Bengidi bobe ba ku kyombo pobakadila, matanda a kwijiba akazakala.
29 Bantu bonso bakwete misupi, ne bengidi ba ku masua, ne bengidi ba ku kyomboBakatūka mu byombo byabo kebemene pa ntanda.
30 Bakatulula mawi abo kebakudila bya bulanda+Koku betūta luvumbi ku mitwe yabo ne kwialañanya mu buto.
31 Baketenda lupole ne kuvwala masāka;Bakakudila bya bulanda* na miyoa mikatampe.
32 Mu madilo abo bakemba lwimbo lwa bulanda ne kukwimbila’mba:
‘Le i ani udi pamo bwa Tyila, watalala nyā mu bukata bwa dijiba?+
33 Bintu byobe pobyatambile mu dijiba, waikwishe bantu bavule.+
Bupeta bobe bungibungi ne bya busunga byobe byapeteje balopwe ba pa ntanda.+
34 Pano ubaoneka mu dijiba, mu mema malampe,+Kadi bya busunga byobe byonso ne bantu bobe abashika pamo nobe.+
35 Bekadi bonso ba pa bisanga bakakutala byakanwa pululu,+Kadi balopwe babo bakatetema na nzuba+—mapala abo akakalala.
36 Bansunga mu mizo bakela muluji pangala pa bintu bikakufikila.
Mfulo yobe ikekala ya mu kitulumukila kadi mibimibi,Kadi kukekala’kopo kitatyi kyonso.’”’”+
Kunshi kwa Dyani
^ Nansha’mba “lwimbo lwa madilo.”
^ Kishima pa kishima i, “Banunu.”
^ Nansha’mba “ne myoya itōkoloka na ityilakana.”
^ Mutyi wa musaka umo na mutyi wa shinamona.
^ Dibungu dya luvumba luyampe.
^ Nansha’mba “mbwija misuke.”
^ Bibwanika padi i, “ne kutumba.”
^ Kishima pa kishima i, “Kipwilo.”
^ Nansha’mba “na bululu bwa muya.”
