Ezekyele 29:1-21
29 Mu mwaka wa dikumi, kweji wa dikumi, mu difuku dya 12 dya kweji, kinenwa kya Yehova kyaiya kondi amba:
2 “Mwanā muntu, tadija mpala yobe kudi Felo mulopwe wa Edipito, nena bupolofeto pādi ne pa Edipito ense.+
3 Nena bino binenwa’mba: ‘Mfumu Mwinē Lupusa Lonso Yehova wanena namino amba:
“Nsa kulwa nobe, abe Felo mulopwe wa Edipito,+Kipangwa kikatampe kya lui kilēle mu tuminonga twa Nile* wandi,+Mwine wanena’mba, ‘Munonga wami wa Nile i wami.
Nelongele’o ami mwine.’+
4 Ino nkakutunga malobo mu bibanga byobe ne kulengeja mwita wa Nile obe ulamate mu mabamba obe.
Nkakwabula mu Nile obe pamo ne mwita onso wa Nile ulamete ku mabamba obe.
5 Nkakushiya mu ntanda mutuputupu, abe ne mwita onso wa Nile obe.
Ukaponena mu ntanda, kadi kukakongakanibwapo nansha kubungilwa pamo.+
Nkakupāna bu byakudya ku banyema ba ntanda ne ku byoni bya mūlu.+
6 Ebiya bekadi bonso ba Edipito bakayuka’mba ami ne Yehova,Mwanda kebakweshepo monka njibo ya Isalela kupita kayombo.*+
7 Pobakwete kuboko kobe, wavingakene,Kadi walengeje kipuji kyabo kityumuke.
Pobaeyalele kodi, watyumukile,Kadi walengeje maulu* abo azakale.”+
8 “‘O mwanda Mfumu Mwinē Lupusa Lonso Yehova wanena namino amba: “Nsa kukuletela kipete,+ kadi nkatyiba mu bukata mobe muntu ne nyema mwine.
9 Ntanda ya Edipito ikekala ke kifuko kya masala, kyonakanibwe;+ penepo bakayuka’mba ami ne Yehova, mwanda abe* ubanena’mba, ‘Munonga wa Nile i wami; ami ye weulongele.’+
10 O mwanda nsa kulwa nobe, abe ne Nile obe, kadi nsa kwalamuna ntanda ya Edipito ke mu ntanda mutuputupu, myonakanibwe,+ myūmu kadi misalwe tamba ku Mikedole+ kutūla ku Sevene+ kufika ne ku mukalo wa Efiopya.
11 I kutupu muntu nansha kimunanwa kikatyampa’mo lwayo,+ kadi keikashikatwa’mopo myaka 40.
12 Nkalamuna ntanda ya Edipito ke ntanda misalwe kutabuka matanda onso, kadi bibundi byayo bikasalwa kutabuka bibundi byonso myaka 40;+ nkapalakenya bene Edipito mu mizo ne kwibakusankenya mu matanda.”+
13 “‘Mwanda Mfumu Mwinē Lupusa Lonso Yehova wanena namino’mba: “Myaka 40 shi ibapu nkajokeja bene Edipito kutamba ku bantu kobapalakenine;+
14 nkajokejeja misungi ya Edipito ku ntanda ya Patalose,+ ku ntanda koitambile, kadi ikekala ke bulopwe butyetye kwine’kwa.
15 Edipito ukekala munshi mwa malopwe makwabo, kadi kakabikalapo monka mizo mikwabo,+ nami nkebatyepeja bininge byokebakabwanyapo kunekenya mizo mikwabo.+
16 Kakekalapo monka bu nsulo ya kikulupiji ku njibo ya Isalela,+ ino ukebavuluja’nka kilubo kyabo kya kulomba bukwashi ku bene Edipito. Penepo bakayuka’mba ami ne Mfumu Mwinē Lupusa Lonso Yehova.”’”
17 Penepo mu mwaka wa 27, kweji umbajinji, mu difuku dibajinji dya kweji, kinenwa kya Yehova kyaiya kondi amba:
18 “Mwanā muntu, Nebukaneza*+ mulopwe wa Babiloni waingidije kibumbo kyandi kya divita mingilo mikomo pa kulwa na Tyila.+ Mitwe yonso yashele na mabala, kadi bipuji byonso byapulukile. Ino aye ne kibumbo kyandi kya divita kebapelwepo mfutwa pa mingilo mikomo yawaingile pa Tyila.
19 “O mwanda Mfumu Mwinē Lupusa Lonso Yehova wanena namino amba, ‘Nsa kupāna ntanda ya Edipito kudi Nebukaneza* mulopwe wa Babiloni,+ nandi ukasela bupeta bwandi kadi ukayata’mo bikwatwa ne bitūtwa bivule; ikekala ke mfutwa ya kibumbo kyandi kya divita.’
20 “‘Nkamupa ntanda ya Edipito bu mpalo ya mingilo yandi mikomo pādi,* mwanda balongele bintu pa mwanda wami,’+ i Mfumu Mwinē Lupusa Lonso Yehova unena.
21 “Mu dine difuku’dya nkamenejeja njibo ya Isalela disengo,*+ kadi nkakupa mukenga wa kwisamba mu bukata mwabo; penepo bakayuka’mba ami ne Yehova.”
Kunshi kwa Dyani
^ Pano ne kunshi, “Nile” ufunkila pa munonga ne pa mikola yandi isangila.
^ Kishima pa kishima i, “dibungu.”
^ Kishima pa kishima i, “bifuka.”
^ Kishima pa kishima i, “aye.”
^ Kishima pa kishima i, “Nebukadeleza,” mulembelo mukwabo wa dino dijina.
^ Kishima pa kishima i, “Nebukadeleza,” mulembelo mukwabo wa dino dijina.
^ Ko kunena’mba, padi Tyila.
^ Nansha’mba “nkapa njibo ya Isalela bukomo.”
