Ezekyele 3:1-27
3 Penepo waunena’mba: “Mwanā muntu, dyá kidi ku meso obe’kyo.* Dyá uno muvungo, wende ukesambe na njibo ya Isalela.”+
2 Ebiya naasama kyakanwa kyami, wandisha uno muvungo.
3 Waunena monka’mba: “Mwanā muntu, dyá uno muvungo onakupa, dinga’o mu kifu kyobe.” Ebiya neudya, kadi wadi utobala’nka bwa būki mu kyakanwa kyami.+
4 Waunena’mba: “Mwanā muntu, enda mu bukata mwa njibo ya Isalela wibasapwile binenwa byami.
5 Mwanda kutuminwepo ku bantu ba muneneno mukomo kwivwana ne besamba ludimi lwampikwa kuyukana, ino i ku njibo ya Isalela.
6 Kutuminwepo ku bantu bavule ba muneneno mukomo kwivwana ne besamba ludimi lwampikwa kuyukana, banena binenwa byokubwanyapo kwivwana. Shi nakutumine kobadi, abo badi ba kukwivwana.+
7 Ino njibo ya Isalela ikapela kukwivwana, mwanda abo kebasakilepo kungivwana.+ Bantu bonso ba njibo ya Isalela badi na mitwe myūmu ne mityima myūmu.+
8 Tala! Naumija kilungi kyobe’nka na mūmine bilungi byabo, ne mpala yobe’nka na mūmine mapala abo.+
9 Nalonga mpala yobe pamo bwa dyama, ibaume kupita dibwe dikomo.+ Kokibakwatwa moyo kadi mapala+ abo keakikutuyula, mwanda abo i njibo mitomboke.”
10 Waunena monka’mba: “Mwanā muntu, lama ku mutyima ne kwivwana binenwa byami byonso byonkulombola.
11 Enda mu bukata mwa misungi ya bantu bobe*+ wisambe nabo. Wibasapwile amba: “Bino’bi byo byanena Mfumu Mwinē Lupusa Lonso Yehova,” ekale bevwane nansha bapele kwivwana.”+
12 Penepo mushipiditu waunsela,+ kadi naivwana kunyuma lupumo lwa diwi dikatampe dinena’mba: “Ntumbo ya Yehova itendelwe mu kifuko kyandi.”
13 Kwadi lunwa lwa mapapa a bipangwa byūmi adi etema,+ ne lunwa lwa matonto adi kubwipi nabyo,+ ne lunwa lwa lupumo lukatampe.
14 Ebiya mushipiditu waunsela ne kumpaika, naenda na bululu ne na bukalabale bwa mushipiditu wami, kadi kuboko kwa Yehova kwadi pondi na bukomo.
15 Penepo naenda kudi misungi ku Tele-Abibe, yadi ishikata kubwipi na munonga wa Kebale,+ nashikata nayo kwine’kwa; kadi muvutakanibwe,+ nashikata mu bukata mwayo mafuku asamba-abidi.
16 Ku mfulo kwa mafuku asamba-abidi kinenwa kya Yehova kyaiya kondi amba:
17 “Mwanā muntu, nakutūla bu mulami wa njibo ya Isalela;+ kadi shi ubaivwana kinenwa kya mu kyakanwa kyami, ufwaninwe kundyumwina’bo.+
18 Shi nanena mubi amba, ‘Bine, ukafwa,’ ino abe kumudyumuna mpika, kadi ubakomenwa kwisamba mwanda wa kudyumuna mubi’wa aleke dishinda dyandi dibi amba ekale mūmi,+ aye ukafwa pa mwanda wa kilubo kyandi mwanda i mubi,+ ino nkakulandula mashi andi.*+
19 Inoko shi ubadyumuna mubi ino aye kuleka bubi bwandi ne dishinda dyandi dibi mpika, aye ukafwa pa mwanda wa kilubo kyandi, ino abe ukapandija būmi bobe* binebine.+
20 Ino shi moloke waleka boloke bwandi kalonga bibi,* nkatūla kikukaja ku meso andi, nandi ukafwa.+ Shi kumudyumwinepo, aye ukafwa pa mwanda wa bubi bwandi kadi bilongwa byandi byoloke kebikavulukwapo, ino nkakulandula mashi andi.*+
21 Ino shi ubadyumuna moloke aleke kulonga bubi, nandi waleka kulonga bubi, bine aye ukekala mūmi mwanda wadyumwinwe,+ kadi abe ukapandija būmi bobe.”*
22 Kuboko kwa Yehova kwaiya pondi kwine’kwa, waunena’mba: “Imana, wende mu dilungu dya musanza, nami nkesamba nobe kwine’kwa.”
23 Ebiya naimana, naenda mu dilungu dya musanza, ino tala! kwadi ntumbo ya Yehova,+ pamo bwa ntumbo yonamwene kubwipi na munonga wa Kebale,+ penepa napona mpala panshi.
24 Penepo mushipiditu watwela mondi, wauñimika mu maulu ami,+ nandi kaesambe nami amba:
“Enda, ukeshityile mu njibo yobe.
25 Ino abe, mwanā muntu, bakatūla myonji podi ne kukukuta nayo amba ukomenwe kwenda mu bukata mwabo.
26 Nami nkalamika ludimi lobe mu kilango kya kyakanwa kyobe, abe ukekala kamāma, kukabwanyapo kwibadingila, mwanda abo i njibo mitomboke.
27 Ino shi kenesambe nobe, nkasamija kyakanwa kyobe, nobe ukebasapwila’mba,+ ‘Bino’bi byo byanena Mfumu Mwinē Lupusa Lonso Yehova.’ Yewa wa kwivwana evwane,+ kadi yewa wa kupela kwivwana nandi apele, mwanda abo i njibo mitomboke.+
Kunshi kwa Dyani
^ Kishima pa kishima i, “dyá kyowatana.”
^ Kishima pa kishima i, “ya bana ba bantu bobe.”
^ Nansha’mba “nkakunena wishintulwile pa mwanda wa mashi andi.”
^ Nansha’mba “muya obe.”
^ Nansha’mba “kalonga bukondame.”
^ Nansha’mba “nkakunena wishintulwile pa mwanda wa mashi andi.”
^ Nansha’mba “muya obe.”
