Ezekyele 31:1-18
-
Kupona kwa Edipito, mutyi wa sedele mulamula (1-18)
31 Mu mwaka wa 11, kweji wa busatu, mu difuku dibajinji dya kweji, kinenwa kya Yehova kyaiya monka kondi amba:
2 “Mwanā muntu, nena Felo mulopwe wa Edipito ne kibumbo kyandi kikatampe amba,+
‘Le i ani odingakene nandi ku bukatampe?
3 Kwadi mwine Ashidia umo, mutyi wa sedele mu Lebanona,Wadi na misambo milumbuluke pamo bwa kivunda* kya mwemba, mulamula;Nsongo yao yadi mu makumbi.
4 Mema eubaije, masulo malampe a mema eulepeje.
Tuminonga twadi tujokolokele powadi ukuninwe;Mikola yato yadi isangila mityi yonso ya mu budimi.
5 O mwanda walepele kupita mityi yonso ya mu budimi.
Misambo yao mikatampe yavudile, kadi misambo yao yalepelePa mwanda wa mema mangimangi a mu tuminonga twao.
6 Byoni byonso bya mūlu byaadile manswa ku misambo yao mikatampe,Kadi banyema bonso ba ntanda babutwidile munshi mwa misambo yao,Mizo yonso ya bantu bavule nayo yadi ishikete mu mwemba wao.
7 Waikele ke mulumbuluke bininge pa mwanda wa buya bwao ne bula bwa misambo yao,Mwanda miji yao yatwelele mu mema mangimangi.
8 I kutupu mityi mikwabo ya sedele ya mu budimi bwa Leza+ yadi idingakene nao.
I kutupu mityi ya jenevidiye yadi na misambo mikatampe pamo bwa ao,Kadi i kutupu mityi ya palatane yadi na misambo na yao.
I kutupu mutyi mukwabo mu budimi bwa Leza wadi ubwanya kwitāka na buya bwao.
9 Neuneñenya na mani mavulevule,Kadi mityi mikwabo yonso ya mu Edena, budimi bwa Leza wa bine, yewabila.’
10 “O mwanda Mfumu Mwinē Lupusa Lonso Yehova wanena namino amba: ‘Ao* byowalepele bininge, ubafikija nsongo yao mu makumbi, kadi mutyima wao waikala na kibengo pa mwanda wa bula bwao,
11 nkeupāna kudi mulopwe mukomokomo wa mizo.+ Aye ukalwa nao, kadi nami nkeupela pa mwanda wa bubi bwao.
12 Beni, mizo yampikwa kafuku kutabuka, bakeutēta, kadi bakeushiya pa ngulu, mani ao akapona mu misanza yonso, misambo yao ikalāla mityumuke mu tuminonga twa ntanda.+ Bantu bonso ba pa ntanda bakataluka mu mwemba wao ne kwiushiya.
13 Byoni byonso bya mūlu bikekala pa kimutyi kyao kipone, banyema bonso ba mu ntanda nabo bakekala ku misambo yao.+
14 Bidi uno muswelo kutyina’mba mutyi udi kubwipi na mema wakalepa bininge nansha kufikija nsongo yao mu makumbi, ne amba mutyi musangilwe biyampe wakalepa ufike’mo. Mwanda ayo yonso ikapānwa ku lufu, ku ntanda ya munshi bininge, pamo ne bana ba bantu, batūkilanga mu kīna.’*
15 “Mfumu Mwinē Lupusa Lonso Yehova wanena namino amba: ‘Difuku dyoukatūkila mu Kibundu,* nkalengeja madilo. O mwanda, nkapūta mema malampe ne kukankaja tuminonga twao amba mema mangimangi emane. Nkafītyija Lebanona pa mwanda wao, kadi mityi ya mu budimi ikafumba yonso.
16 Pa lunwa lwa kupona kwao, nkazakaja mizo ponkeutūkija mu Kibundu* pamo ne boba bonso batūkila mu kīna,* kadi mityi yonso ya mu Edena,+ miyampe bininge ne milumbuluke ya Lebanona, yonso misangilwe senene, ikasengibwa mu ntanda ya munshi bininge.
17 Ibatūkila pamo nandi mu Kibundu,* kudi boba batapwe na kipete,+ pamo ne boba bamwitabīle* badi bashikete mu mwemba wandi mu bukata mwa mizo.’+
18 “‘Le i mutyi’ka wa mu Edena wadi udingakene nobe ku ntumbo ne ku bukatampe?+ Ino bine abe ukatūkijibwa pamo ne mityi ya mu Edena ku ntanda ya munshi bininge. Ukalāla panshi mu bukata mwa ba kubulwa kutwejibwa kwisao, pamo na boba batapwe na kipete. Bino byo bikafikila Felo ne bibumbo byandi bikatampe,’ i Mfumu Mwinē Lupusa Lonso Yehova unena.”
Kunshi kwa Dyani
^ Nansha’mba “kifinga.”
^ Kishima pa kishima i, “Abe.”
^ Nansha’mba “kibundu.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “kibundu.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Kishima pa kishima i, “kuboko.”
